COVID-19
អន្តរជាតិ
COVID-19៖ កូរ៉េខាងត្បូងសម្រេចបិទសាលាបឋម មត្តេយ្យ និងអនុវិទ្យាល័យ១៤ថ្ងៃ
រូបភាព៖ AFP
×![]()
ដោយ: ធៀន ភារិន្ទ
កូរ៉េខាងត្បូង នារសៀលថ្ងៃទី២ ខែមីនា បានបន្តរកឃើញអ្នកឆ្លងCOVID-19 ចំនួន ១២៣ករណី និងអ្នកស្លាប់ ៤ករណីបន្ថែមទៀត បន្ទាប់ពីប្រទេសមួយនេះ ទើបតែរកឃើញអ្នកឆ្លង COVID-19 ចំនួន ៤៧៦ករណីនាវេលាព្រឹកក្នុងថ្ងៃដដែល។ សរុបករណីទាំងអស់ កូរ៉េខាងត្បូងបានរកឃើញកូរ៉ូណាវីរុសចំនួន ៤៣៣៥ករណី និងអ្នកស្លាប់ ២៦ករណី។ 
ទីក្រុង Daegu នៅតែជាចំណុចក្តៅបំផុតរបស់កូរ៉េខាងត្បូង ដែលមានអ្នកជំងឺផ្ទុកCOVID-19 ច្រើនជាងគេបំផុត ពោលគឺមានប្រមាណជាង ៣០០០ករណី។ ក្នុងចំនួនដ៏ច្រើនបែបនេះ ភាគច្រើននៃអ្នកជំងឺ គឺមានទាក់ទងទៅនឹងព្រះវិហារសាសនាក្នុងកូរ៉េខាងត្បូង។ គ្រាន់តែក្រុង Daegu អ្នកជំងឺចំនួន ៥៧ភាគរយ គឺឆ្លងមកពីវិហារ shincheonji។ ចំណែកក្រុងប៊ូសាន ដែលបានកើនពី៥ករណី ទៅ ៨៨ករណីនោះ មាន៣៣ករណី មានជាប់ពាក់ព័ន្ធនឹងព្រះវិហារមួយកន្លែងក្នុងស្រុក Dongnae។
បើតាមការបញ្ជាក់របស់មជ្ឈមណ្ឌលទប់ស្កាត់ និងបង្ការជំងឺឆ្លងរបស់កូរ៉េខាងត្បូង អាជ្ញាធរសុខាភិបាលបានរកឃើញ អ្នកជំងឺចំនួន ១២៣ករណី និងអ្នកស្លាប់ ៤ករណីបន្ថែមទៀត។ តួលេខសរុប បានកើនដល់ ៤៣៣៤ករណី និងអ្នកស្លាប់ ២៦ករណីនៅទូទាំងកូរ៉េខាងត្បូង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ដើម្បីការពារក្មេងៗ និងសិស្សសាលាផ្សេងទៀត នាថ្ងៃទី២ ខែមីនា រដ្ឋមន្ត្រីក្រសួងអប់រំ លោកស្រី Yoo Eun-hae បានប្រកាសពន្យារពេលចូលរៀនជាលើកទីពីរនៃឆ្នាំសិក្សាថ្មី រយៈពេលពីរសប្តាហ៍បន្ថែមទៀត។ បទបញ្ជានេះ នឹងអនុវត្តចំពោះសាលាមត្តេយ្យ សាលាបឋមសិក្សា និងអនុវិទ្យាល័យនៅទូទាំងប្រទេសទាំងអស់ ដើម្បីទប់ស្កាត់ និងការពារសិស្សសាលាពីករណីឆ្លង COVID-19។ ប្រសិនគ្មានការប្រែប្រួលទេ ឆ្នាំសិក្សាថ្មីនៅកូរ៉េខាងត្បូង នឹងបើកបវេសនកាលនៅថ្ងៃទី២៣ ខែមីនាខាងមុន។
សូមបញ្ជាក់ថា គិតត្រឹមថ្ងៃទី២ ខែមីនានេះ មានប្រទេសចំនួន៣៦ បានចេញចំណាត់ការហាមឃាត់អ្នកដំណើរទៅកូរ៉េខាងត្បូង ឬហាមឃាត់អ្នកដំណើរមកពីកូរ៉េខាងត្បូងចូលប្រទេសខ្លួន ខណៈប្រទេសចំនួន ៤៥ បានចេញវិធានការដាក់ចត្តាឡីស័កអ្នកដំណើរមកពីកូរ៉េខាងត្បូងទាំងអស់៕
Tag:
កូរ៉េខាងត្បូង
COVID-19
© រក្សាសិទ្ធិដោយ thmeythmey.com
