ជាតិ
លោក នុត ពុធដារ៉ា ត្រូវផ្ទេរពីអភិបាលរងខេត្តក្រចេះ មកខេត្តកណ្តាលវិញ លោក នុត ពុធដារ៉ា (រូបភាពពីគេហទំព័ររបស់ គណបក្សប្រជាជនកម្ពុជា)
× ភ្នំពេញ៖ លោក នុត ពុធដារ៉ា ត្រូវបានសម្ដេច ហ៊ុន សែន ចេញអនុក្រឹត្យផ្ទេរភារកិច្ចមន្រី្តរាជការ ពីអភិបាលរងខេត្តក្រចេះ មកកាន់មុខតំណែងអភិបាលរងខេត្តកណ្ដាលវិញ។ នេះបើតាមអនុក្រឹត្យចុះថ្ងៃទី២១ កុម្ភៈ ឆ្នាំ២០២០។
លោក នុត ពុធដារ៉ា ត្រូវកាន់តំណែងជាអភិបាលរងជំនួស លោក នៃ ចារី អភិបាលរងខេត្តកណ្ដាល។ លោក នុត ពុធដារ៉ា បច្ចុប្បន្នជាមន្រី្តថ្នាក់លេខ២ ធ្លាប់ជា អគ្គនាយករងរដ្ឋបាលក្រសួងរៀបចំដែនដី នគរូបនីយកម្ម និងសំណង់, អភិបាលរងខណ្ឌដង្កោ រាជធានីភ្នំពេញ, អភិបាលរងខេត្តក្រចេះ និងជំនួយការសម្ដេច ហ៊ុន សែន។ នេះបើតាមការចេញផ្សាររបស់គេហទំព័រគណបក្សប្រជាជនកម្ពុជា។
នៅថ្ងៃទី៤ មីនា ឆ្នាំ២០២០នេះ សម្ដេច ស ខេង នឹងចូលរួមប្រកាសឱ្យចូលកាន់តំណែង អភិបាលខេត្ត និងអភិបាលរងខេត្តកណ្ដាល។ សូមបញ្ជាក់ថា កាលពីថ្ងៃទី១៧ កុម្ភៈ ឆ្នាំ២០២០នេះ ព្រះមហាក្សត្រ បានចេញព្រះរាជក្រឹត្យតែងតាំង លោក គង់ សោភ័ណ្ឌ ជាអភិបាលខេត្តកណ្ដាល ជំនួសលោក ម៉ៅ ភិរុណ៕
© រក្សាសិទ្ធិដោយ thmeythmey.com