អន្តរជាតិ
លោក ស៊ី ជិនភីង៖ វិទ្យាសាស្ត្រនិងបច្ចេកវិទ្យា ជាអាវុធដ៏សំខាន់បំផុតក្នុងការប្រយុទ្ធ COVID-19
លោកប្រធានាធិបតីចិន ស៊ី ជិនភីង កំពុងពិនិត្យមើលនីតិវិធីស្រាវជ្រាវ នៃការបង្កើតវ៉ាក់សាំង និងថ្នាំព្យាបាល COVID-19។ រូបភាព៖ Xinhua
×![]()
ដោយ: ធៀន ភារិន្ទ
ក្នុងដំណើរទស្សនកិច្ចទៅវិទ្យាស្ថានវិទ្យាសាស្ត្រឱសថយោធា និងសកលវិទ្យាល័យ Tsinghua នាថ្ងៃទី២ ខែមីនា ប្រធានាធិបតីចិន ស៊ី ជិនភីង បានលើកឡើងថា អាវុធដ៏មានអំណាចបំផុត ក្នុងការប្រយុទ្ធប្រឆាំងជាមួយជំងឺឆ្លង គឺវិទ្យាសាស្ត្រ និងបច្ចេកវិទ្យា។ លោកប្រធានាធិបតីចិនរូបនេះ បានទទួលស្គាល់ថា ការថយចុះនៃអត្រាឆ្លង និងស្លាប់ដោយសារCOVID-19 គឺមិនអាចកាត់ផ្តាច់ចេញវិទ្យាសាស្ត្រ និងបច្ចេកវិទ្យាបានឡើយ។ 
តាមរយៈដំណើរទស្សនកិច្ចទៅវិទ្យាស្ថានឱសថចិន លោកប្រធានាធិបតី ស៊ី ជិនភីង បានទទូចឲ្យអ្នកវិទ្យាសាស្ត្រ និងអ្នកជំនាញផ្សេងទៀតទាំងអស់ ជួយពន្លឿននីតិវិធីនៃការបង្កើតវ៉ាក់សាំងការពារ និងថ្នាំព្យាបាល COVID-19 ។
ពាក់ព័ន្ធនឹងជំងឺ COVID-19 លោក ស៊ី បានចង្អុលបង្ហាញថា អាវុធដ៏មានអំណាចបំផុត ក្នុងការប្រយុទ្ធប្រឆាំងជាមួយជំងឺឆ្លង គឺវិទ្យាសាស្ត្រ និងបច្ចេកវិទ្យា។ បើតាមលោកប្រធានាធិបតី ដោយសារតែវិទ្យាសាស្ត្រ និងបច្ចេកវិទ្យា ចិនអាចទប់ស្កាត់ និងកាត់បន្ថយអត្រាមរណភាព ហើយករណីឆ្លងដោយសារកូរ៉ូណាវីរុស បានយ៉ាងច្រើនគួរឲ្យកត់សម្គាល់។
ក្នុងករណីនេះ លោកស៊ី និយាយថា ការស្រាវជ្រាវវិទ្យាសាស្ត្រស្តីពី COVID-19 គឺជាកិច្ចការចំបង និងបន្ទាន់បំផុត ហើយកិច្ចសហប្រតិបត្តិការរវាងអ្នកវិទ្យាសាស្ត្រ និងអ្នកជំនាញទាំងអស់ គឺសំខាន់ណាស់ ដើម្បីពន្លឿនការផលិតថ្នាំ និងវ៉ាក់សាំងការពារកូរ៉ូណាវីរុស។ នេះបើតាមការចុះផ្សាយរបស់ទីភ្នាក់ងារព័ត៌មាន Xinhua។
ក្នុងន័យនេះ មេដឹកនាំចិនរូបនេះចង់សំដៅថា ជ័យជម្នះលើជំងឺរលាកសួតថ្មីនេះ គឺមិនអាចផ្តាច់ចេញបានឡើយពីគំនិតអភិវឌ្ឍបច្ចេកវិទ្យា និងវិទ្យាសាស្ត្រថ្មីៗ ហើយកិច្ចការជួយសង្គ្រោះប្រជាជនចិន មិនអាចបង្អង់បានជាដាច់ខាត។ ដំណើរទស្សនកិច្ចរបស់ប្រធានាធិបតីចិនទៅវិទ្យាល័យស្រាវជ្រាវឱសថ និងវ៉ាក់សាំងទាំងពីរក្នុងពេលនេះ គឺជាការលើកទឹកចិត្តមួយ ដល់អ្នកវិទ្យាសាស្ត្រទាំងអស់ឲ្យបន្តកិច្ចខិតខំប្រឹងប្រែងអភិវឌ្ឍវ៉ាក់សាំង និងថ្នាំព្យាបាលបន្តទៀត ដើម្បីប្រយុទ្ធប្រឆាំងជាមួយកូរ៉ូណាវីរុស។
នាថ្ងៃទី២ ខែមីនា ករណីឆ្លងនៅចិនចំនួន ២០២ករណី និងអ្នកស្លាប់ ៤២ករណីប៉ុណ្ណោះ។ ចំណែកនៅព្រឹកថ្ងៃទី៣ ខែមីនា ករណីឆ្លងនៅចិន មានត្រឹមតែ ១២៥ករណី និងអ្នកស្លាប់ ៣១ករណី។ ការណ៍នេះ ត្រូវបានគេមើលឃើញថា តួលេខអ្នកឆ្លង និងអ្នកស្លាប់នៅចិន គឺមានការធ្លាក់ចុះគួរឲ្យកត់សម្គាល់។ ចំណែកអ្នកជំងឺ ដែលត្រូវបានគេអនុញ្ញាតឲ្យចាកចេញពីមន្ទីពេទ្យវិញ ក៏មានចំនួនបន្តកើនឡើងផងដែរ។ គិតត្រឹមថ្ងៃទី២ ខែមីនា អ្នកជំងឺ COVID-19 ចំនួន ៤៧២០៤នាក់ បានចាកចេញពីមន្ទីរពេទ្យ។
សូមបញ្ជាក់ថា គិតមកត្រឹមថ្ងៃនេះ នៅទូទាំងពិភពលោក COVID-19 ត្រូវបានគេបន្តរកឃើញអ្នកឆ្លងប្រមាណ ៩ម៉ឺនករណី និងអ្នកស្លាប់ជាង ៣ពាន់ករណីនៅទូទាំងពិភពលោកទាំងមូល៕
Tag:
ចិន
ស៊ី ជិនភីង
COVID-19
© រក្សាសិទ្ធិដោយ thmeythmey.com
