COVID-19
ជាតិ
សង្គមជាតិ
សុខភាព
មនុស្ស២៧៤នាក់ហើយ ដែលបានធ្វើតេស្តរកវីរុសកូវីដ-១៩ តែអវិជ្ជមានទាំងអស់ រូបភាពពីនាយកដ្ឋានប្រយុទ្ធនឹងជំងឺឆ្លង (CDC)
× ភ្នំពេញ៖ គិតត្រឹមថ្ងៃទី៤ ខែមីនា ឆ្នាំ២០២០ មានមនុស្ស២៧៤នាក់ហើយ ដែលបានទៅធ្វើតេស្តនៅវិទ្យាស្ថានប៉ាស្ទ័រកម្ពុជា ក្រោយសង្ស័យពីការឆ្លងវីរុសកូវីដ ប៉ុន្តែលទ្ធផល គឺសុទ្ធតែអវិជ្ជមានកូវីដ-១៩។ ដោយឡែកអ្នកទេសចរជាង២ពាន់នាក់ដែលជិះនៅក្នុងកប៉ាល់ Westerdam ដែលបានចាកចេញពីកម្ពុជាកន្លងទៅក៏មិនមានវីរុសកូវីដ-១៩ដែរ។ នេះបើតាមការផ្សាយរបស់នាយកដ្ឋានប្រយុទ្ធនឹងជំងឺឆ្លងលើបណ្តាញសង្គម។
កម្ពុជាមិនទាន់រកឃើញអ្នកផ្ទុកវីរុសកូវីដ-១៩ បន្ថែមនោះទេ ក្រៅតែពីបុរសជនជាតិចិនវ័យ៦០ម្នាក់ ដែលរកឃើញថា ផ្ទុកវីរុសនេះ កាលពីចុងខែមករាកន្លងទៅ តែបានជាសះស្បើយឡើងវិញ និងបានចាកចេញពីមន្ទីរពេទ្យនៅដើមខែកុម្ភៈ បន្ទាប់មក ក៏បានចាកចេញពីកម្ពុជាទៅប្រទេសខ្លួនវិញ។
ទោះបីជាមិនទាន់រកឃើញអ្នកផ្ទុកវីរុសកូវីដ-១៩ បន្ថែម ប៉ុន្តែកម្ពុជាក៏បានរៀបចំក្រុមគ្រួពេទ្យតាមព្រំដែន ដើម្បីឃ្លាំមើលអ្នកដំណើរចេញចូលនៅតាមព្រំដែនគោក ថៃ ឡាវ វៀតណាម ផ្លូវសមុទ្រ និង អាកាសយាន្តដ្ឋានអន្តរជាតិទាំង៣ ភ្នំពេញ សៀមរាប និង ក្រុងព្រះសីហនុ តាមរយៈម៉ាស៊ីនស្ទង់កម្តៅ និងពិនិត្យសុខភាព។
កាលណា ពលរដ្ឋសង្ស័យលើអាការណាមួយដែលស្រដៀងនឹងរោគសញ្ញាកូវីដ-១៩ អាចទាក់ទងទៅទូរសព្ទលេខ១១៥ ដោយមានក្រុមមន្ត្រីជំនាញ១០រូបរង់ចាំំទទួលការហៅចូលនិងបំភ្លឺចំពោះចម្ងល់។
សូមបញ្ជាក់ថា វីរុសកូវីដ-១៩ បានសម្លាប់មនុស្សអស់ជាង៣២០០នាក់ហើយ ដោយអ្នកជំងឺមានជាង៩៣០០០នាក់ ហើយវា បានរាលដាលទៅដល់ជិត៨០ប្រទេសហើយ ដោយគិតត្រឹមថ្ងៃទី៤ ខែមីនា៕
Tag:
ជំងឺកូរ៉ូណា
សុខភាព
© រក្សាសិទ្ធិដោយ thmeythmey.com