COVID-19
អន្តរជាតិ
COVID-19៖ ស្ថានការណ៍ក្នុងស្រុកកាន់តែធូរស្រាល ចិនងាកទៅទប់ស្កាត់ការឆ្លងពីខាងក្រៅ អ្នកដំណើរកំពុងដើរនៅឯព្រលានយន្តហោះទីក្រុងស៊ិនជិន ខេត្តគ័ងតុង។ រូបភាព Xinhua
× នៅថ្ងៃទី៤ ខែមីនា ចិន បានប្រកាសពីការបន្តធ្លាក់ចុះករណីឆ្លងកូរ៉ូណាវីរុសថ្មី (COVID-19) ក្នុងប្រទេស។ ការធ្លាក់ចុះនេះ បង្ហាញពីលទ្ធផលវិជ្ជមាននៃវិធានការតឹងរ៉ឹងរបស់ទីក្រុងប៉េកាំងក្នុងការគ្រប់គ្រង និងទប់ស្កាត់ការរាលដាលវីរុសដែលគេជឿថា ផ្ទុះចេញពីទីក្រុងវូហាន ខេត្តហ៊ូប៉ីអំឡុងខែធ្នូ ឆ្នាំ២០១៩ ។ ស្របពេលគ្នានេះ ទីក្រុងប៉េកាំង កំពុងបារម្ភពីការឆ្លងមកពីក្រៅប្រទេស បន្ទាប់ពីរកឃើញករណីឆ្លងលើប្រជាជនខ្លួន។
គណៈកម្មការសុខាភិបាលចិន នៅថ្ងៃទី៤ ខែមីនា បានប្រកាសតួលេខឆ្លងជំងឺ COVID-19 នៅថ្ងៃទី៣ ខែមីនា ដែលមានចំនួន១១៩នាក់ ធ្លាក់ចំនួន៦ករណី ប្រៀបធៀបថ្ងៃទី២ ខែមីនា។ ការធ្លាក់ចុះនេះ ជានិន្នការទូទៅមួយដែលកំពុងកើតឡើងនៅចិនចាប់តាំងពីពាក់កណ្ដាលខែកុម្ភៈ ខណៈ COVID-19 បានរាលដាលដល់ប្រទេសជិត៨០ទៅហើយនោះ។ ករណីឆ្លងកូរ៉ូណាវីរុសនៅចិននៅតែខ្ពស់ គឺជាង៨ម៉ឺននាក់ទៅហើយដែរ។
ទន្ទឹមនឹងការធ្លាក់ចុះករណីឆ្លងថ្មីៗ ចំនួនអ្នកស្លាប់ក្នុងមួយថ្ងៃៗក៏បន្តស្ថិតក្នុងអត្រាទាបផងដែរ។ សម្រាប់ថ្ងៃទី៣ ខែមីនា ករណីស្លាប់នៅចិនមានចំនួន៣៨នាក់ ដែលកើតឡើងនៅខេត្តហ៊ូប៉ីទាំងអស់។ បណ្ដាខេត្តខណ្ឌផ្សេងៗ ត្រូវបានមើលឃើញថា មានស្ថានភាពល្អប្រសើរខ្លាំង ដែលបណ្ដាលមកពីចំណាត់ការតឹងតែងរបស់រដ្ឋាភិបាលចិនក្នុងការទប់ស្កាត់ការឆ្លងរាលដាលវីរុសប្រភេទថ្មី។
យ៉ាងណាមិញ ក្ដីបារម្ភមួយទៀតសម្រាប់ចិន ក៏លេចឡើង។ គិតត្រឹមថ្ងៃទី៣ ខែមីនា ចិនរកឃើញករណីឆ្លងលើជនជាតិខ្លួនដែលធ្វើដំណើរពីបរទេសចំនួន៧៥នាក់។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។ ប៉េកាំង និងសៀងហៃ ជាទីក្រុងដែលបញ្ជាក់ពីករណីឆ្លងក្នុងចំណោមជនជាតិចិនដែលទើបត្រឡប់ពីប្រទេសផ្សេងចុងក្រោយនេះ។ ប្រទេសដែលជាប្រភពចម្លងជនជាតិចិនមានអ៊ីតាលី អ៊ីរ៉ង់ និងកូរ៉េខាងត្បូងជាដើម ខណៈចិនក៏បានចាត់វិធានការទប់ស្កាត់ផងដែរ។
កន្លងទៅ ចិន ក៏បានចាត់វិធានការក្ដៅដើម្បីគ្រប់គ្រងការឆ្លងពីក្រៅប្រទេសនេះ តាមរយៈការចេញបញ្ជាឲ្យអ្នកដំណើរទាំងអស់ដែលមកពីប្រទេសមានករណីឆ្លងច្រើន ត្រូវនៅដោយឡែករយៈពេល១៤ថ្ងៃ។ ទីក្រុងប៉េកាំង ខេត្តគ័ងតុង និងទីក្រុងសៀងហៃ កំពុងអនុវត្តវិធានការនេះលើអ្នកដំណើរមកពីបរទេសទាំងអស់។ ចិន ក៏ណែនាំឲ្យពលរដ្ឋខ្លួននៅបរទេស គិតគូរពីផែនការធ្វើដំណើរឡើងវិញផងដែរ សំដៅទប់ស្កាត់ការឆ្លងវីរុស។
វិធានការនេះ រងប្រតិកម្មខ្លាំងពីប្រទេសដែលរងផលប៉ះពាល់ដូចជាកូរ៉េខាងត្បូងជាដើម។ មានមតិខ្លះលើកឡើងថា អ្វីដែលចិនធ្វើហាក់ដូចជាតឹងរ៉ឹងពេក និងទៅហួសពីអ្វីដែលប្រទេសផ្សេងបានធ្វើ ពេល COVID-19 កំពុងឆ្លងខ្លាំងនៅចិន ដែលកាលនោះចិន ក៏រិះគន់ប្រទេសផ្សេងលើចំណាត់ការបែបនេះដែរ។ យ៉ាងណាមិញ ក្រុងប៉េកាំងនិយាយការពារខ្លួនថា អ្វីដែលខ្លួនធ្វើ គឺផ្អែកលើហេតុផលវិទ្យាសាស្ត្រ និងមិនសំដៅប្រទេសណាមួយឡើយ៕
© រក្សាសិទ្ធិដោយ thmeythmey.com