ជាតិ
ក្រសួងបរិស្ថាន៖ កសិករគួរចិញ្ចឹមពូជជ្រូកឦសាន ដើម្បីពង្រឹងជីវភាពសហគមន៍នៃតំបន់ការពារធម្មជាតិ រូបភាពពីក្រសួងបរិស្ថាន
× ភ្នំពេញ៖ ក្រសួងបរិស្ថាន បានចុះពិនិត្យការចិញ្ចឹមជ្រូកពូជឦសាន នៅស្ថានីយចិញ្ចឹមជ្រូកនៃដែនជម្រកសត្វព្រៃភ្នំឱរ៉ាល់ ដែលស្ថិតក្នុងភូមិសាស្ត្រ ខេត្តពោធិ៍សាត់ ដើម្បីពង្រឹងការចិញ្ចឹមសត្វជ្រូកពូជឦសាននេះ។
លោក ខៀវ បូរិន អគ្គនាយកដ្ឋានសហគមន៍មូលដ្ឋាននៃក្រសួងបរិស្ថាន បានបញ្ជាក់ថា ការចុះពិនិត្យនេះ គឺដើម្បីឱ្យអ្នកជំនាញក្រសួង បានបណ្ដុះបណ្ដាលបន្ថែមដល់អ្នកអភិរក្សឧទ្យានឲ្យមានវិធានការររក្សាសុវត្ថិភាពសត្វជ្រូក និងបន្សុទ្ធពូជជ្រូកទាំងនោះ ឱ្យបានត្រឹមត្រូវ ដើម្បីជួយលើកកម្ពស់ដល់ការចិញ្ចឹមជ្រូករបស់សហគមន៍។
ថ្លែងក្នុងនៅពេលចុះពិនិត្យ កាលពីថ្ងៃទី២មីនានោះ អគ្គនាយកដ្ឋានសហគមន៍មូលដ្ឋានរូបនេះ បានលើកឡើងថា៖«ពូជជ្រូកក្នុងស្រុក ជាពូជមានសក្ដានុពុលធន់នឹងជំងឺ ហើយអាចស៊ីចំណីដែលផលិតតាមមូលដ្ឋាននិងបំលែងជាសាច់បានខ្ពស់ ជាងពូជជ្រូកនាំចូល។ ជ្រូកប្រភេទនេះ ចិញ្ចឹមតាមធម្មជាតិនៅទិសភាគឦសាន ក្នុងខេត្តក្រចេះ ស្ទឹងត្រែង មណ្ឌលគិរី និងរតនគិរី ហើយគេចិញ្ចឹមឲ្យស៊ីចំណីតាមព្រៃ និងគ្រាន់ផ្ដល់ចំណីបន្ថែមតិចតួចប៉ុណ្ណោះ។ ព្រោះតែតម្រូវការខ្ពស់ ពូជជ្រូកប្រភេទនេះត្រូវឲ្យបង្កាត់ជាមួយពូជជ្រូកនាំចូលដើម្បីបង្កើនផលិតផល ដែលនាំឲ្យមានការថយចុះនូវពូជជ្រូកឦសាននេះពីមួយឆ្នាំទៅមួយឆ្នាំ។ ជ្រូកប្រភេទនេះមានតែនៅតំបន់ខ្ពង់រាប និងភូមិភាគឦសាន ប៉ុន្តែមិនមាននៅតំបន់វាលទំនាបទេ»។
ស្ថានីយចិញ្ចឹមជ្រូកពូជឦសានតាមធម្មជាតិនេះត្រូវបានបង្កើតឡើងនៅថ្ងៃទី១៦ ខែមិថុនា ឆ្នាំ២០១៨ នៅដែនជម្រកសត្វព្រៃ ភ្នំឱរ៉ាល់ ដោយបង្កើតដំបូងមានជ្រូកចំនួន៥៤ក្បាល នៅតំបន់ការពារធម្មជាតិក្នុងភូមិសាស្ត្រខេត្តពោធិ៍សាត់។ បច្ចុប្បន្នមានជ្រូកកើនឡើងប្រមាណ១០០ក្បាល ក្រោយពីមានការថែទាំពីឧទ្យានុរក្សដែលមានការបណ្ដុះបណ្ដាលពីអ្នកជំនាញ។ ស្ថានីយចិញ្ចឹមជ្រូកនេះ អាចបម្រើតម្រូវការដល់ភ្ញៀវទេសចរឲ្យមកកម្សាន្តអាចទស្សនាធម្មជាតិព្រៃភ្នំ និងតំបន់ទេសចរណ៍ធម្មជាតិទឹកធ្លាក់ច្រកល្អៀងផងដែរ។ នេះបើតាមក្រសួងបរិស្ថាន។
សូមបញ្ជាក់ផងដែរថា ក្រសួងបរិស្ថានបានគ្រប់គ្រងតំបន់ការពារធម្មជាតិចំនួនជាង៦០កន្លែង លើផ្ទៃដីសរុបប្រមាណជាង៧លានហិកតា ដោយមានសហគមន៍តំបន់ការពារធម្មជាតិចំនួន១៦៨ នៅទូទាំងប្រទេសគ្រប់ដណ្ដប់លើដីព្រៃសរុបចំនួន ២៨៥ ៦០៩ហិកតា។ សហគមន៍តំបន់ការពារធម្មជាតិ ជាខ្សែក្រវាត់ការពារ អភិរក្សធម្មជាតិ និងជំរុញការលើកកម្ពស់ជីវភាពរស់នៅរបស់ប្រជាជនតាមរយៈការធ្វើកសិកម្ម ការដាំដំណាំ ការចិញ្ចឹមសត្វ និងការផ្ដល់សេវាកម្មទេសចរណ៍ធម្មជាតិជាដើម៕
Tag:
ពូជជ្រូកឦសាន
សហគមន៍
តំបន់ការពារធម្មជាតិ
© រក្សាសិទ្ធិដោយ thmeythmey.com