ជាតិ
សង្គមជាតិ
មួយថ្ងៃ ភ្លើងឆេះព្រៃដល់ទៅ៧ពាន់កន្លែងនៅកម្ពុជា តែថយចុះវិញ ជាបន្តបន្ទាប់
× សម្តេចនាយករដ្ឋមន្ត្រី ហ៊ុន សែន អះអាងថា ថ្មីៗនេះ ប្រទេសកម្ពុជា មានភ្លើងឆេះព្រៃដល់ទៅ៧ពាន់កន្លែងឯណោះ។ សម្តេច ចាត់ទុក ភ្លើងឆេះព្រៃនេះ ថាជាបញ្ហាមួយដែលត្រូវដោះស្រាយ។
ក្នុងពិធីបិទសន្និបាតបូកសរុបការងារឆ្នាំ២០១៩របស់ក្រសួងសុខាភិបាល នារសៀលថ្ងៃទី៤ ខែកុម្ភៈ ឆ្នាំ២០២០ ប្រមុខរដ្ឋាភិបាល ថ្លែងដូច្នេះថា៖«តំបន់នៅខេត្តកំពង់ធំ ខេត្តព្រះវិហារ ខេត្តឧត្តរមានជ័យ... ភ្លើងឆេះព្រៃច្រើនណាស់....»។
ជាមួយគ្នានេះ ប្រមុខរដ្ឋាភិបាល អំពាវនាវឲ្យប្រជាពលរដ្ឋ ឈប់ដុតព្រៃ ដើម្បីដេញចាប់សត្វ និងឈប់បោះកន្ទុយបារីឬកន្ទុយឧស ចូលទៅក្នុងព្រៃ ព្រោះវា ក៏ជាមូលហេតុ ដែលនាំឲ្យមានការឆេះរាលព្រៃកាន់តែខ្លាំងដែរ។
លោក នេត្រ ភក្ត្រា អ្នកនាំពាក្យក្រសួងបរិស្ថាន ប្រាប់សារព័ត៌មានថ្មីៗតាមទូរស័ព្ទ ភ្លើងឆេះព្រៃ៧ពាន់កន្លែងនេះ គឺជាចំនួនប្រចាំថ្ងៃ តែលោក ពុំបានចាំថាថ្ងៃណាឡើយ ដោយគ្រាន់តែបញ្ជាក់ថា បានកើតឡើងកាលពីពេលថ្មីៗនេះ។ លោក សង្កត់ធ្ងន់ថា៖«ឆេះ៧ពាន់កន្លែងនេះ គឺជាចំនួនខ្ពស់បំផុត»។
យ៉ាងណា លោក លើកឡើងថា ការឆេះព្រៃ បានថយចុះមកវិញ ក្រោយពីក្រសួងបរិស្ថាន បានចេញវិធានការទប់ស្កាត់ និងណែនាំជារឿយៗទៅកាន់ប្រជាពលរដ្ឋ និងមជ្ឈដ្ឋាននានា។ លោក បន្តថា ជាក់ស្តែង នៅថ្ងៃទី៣ ខែមីនា ឆ្នាំ២០២០ ភ្លើងឆេះព្រៃ បានថយមកនៅត្រឹមជាង១ពាន់កន្លែង។ លោក និយាយថា៖«យើង បានរៀបចំនិងត្រៀមកម្លាំង ដើម្បីពន្លន់ភ្លើងឆេះព្រៃនេះ»៕
Tag:
ហ៊ុន សែន
ភ្លើងឆេះព្រៃ
© រក្សាសិទ្ធិដោយ thmeythmey.com