COVID-19
អន្តរជាតិ
COVID-19 រាលដាលដល់៨០ប្រទេសហើយ ចុងក្រោយគឺហុងគ្រី ស្លូវេនី និងកោះហ្វារ៉ូ លោកនាយករដ្ឋមន្ត្រីហុងគ្រី Viktor Orban។ រូបថត AFP
× ហុងគ្រី ស្លូវេនី និងកោះហ្វារ៉ូ ទើបតេស្តឃើញករណីឆ្លងមេរោគកូរ៉ូណាប្រភេទថ្មី (COVID-19) នៅទឹកដីរៀងៗខ្លួន ដែលធ្វើឲ្យចំនួនប្រទេសដែលឆ្លងឡើងដល់ជាង៨០ហើយ (ក្នុងករណីរួមបញ្ចូលទាំងប្រទេសស្វយ័ត) បើគិតត្រឹមព្រឹកថ្ងៃព្រហស្បតិ៍ ទី៥ ខែមីនា នេះ។
ហុងគ្រី បានរកឃើញពីរករណី ដោយអ្នកជំងឺជានិស្សិតអ៊ីរ៉ង់ និងត្រូវបានបញ្ជូនទៅមន្ទីរពេទ្យ St. Ladislaus។ នេះបើតាមការអះអាងរបស់លោកនាយករដ្ឋមន្ត្រី Viktor Orban។ ហុងគ្រីបានដាក់មនុស្ស២១នាក់ក្រោមវិធានចត្តាឡីស័ក ហើយបានធ្វើតេស្តមនុស្ស២៣០នាក់នាពេលកន្លងមក។
នៅស្លូវេនី រដ្ឋមន្ត្រីក្រសួងសុខាភិបាល លោក Ales Sabeder បានពិនិត្យឃើញវិជ្ជមានលើបុរសម្នាក់ដែលទើបត្រឡប់ពីប្រទេសម៉ារ៉ុក ដោយឆ្លងកាត់អ៊ីតាលី។ អ្នកជំងឺត្រូវបានដាក់នៅដាច់ដោយឡែកនៅគ្លីនិក UKC Ljubljana Infection Clinic។
ជាមួយគ្នានេះ ប្រជុំកោះហ្វារ៉ូ បានរកឃើញអ្នកជំងឺដំបូងផងដែរ ដែលជាបុរសម្នាក់ទើបត្រឡប់ពីកិច្ចប្រជុំនៅក្រុងប៉ារីស កាលពីថ្ងៃទី២៤ ខែកុម្ភៈ។ ទោះបីជាយ៉ាងណាក៏ដោយ អង្គការសុខភាពពិភពលោក បានចាត់បញ្ចូលជាករណីនៅក្នុងប្រទេសដាណឺម៉ាក ដោយសារតែប្រជុំកោះហ្វារ៉ូ ជាប្រទេសស្វយ័ត ស្ថិតក្រោមប្រទេសដាណឺម៉ាក។
៨០ដែលមានករណីឆ្លង COVID-19 រួមមាន៖
-អាស៊ី៖ ចិន (បញ្ចូលទាំង ហុងកុង តៃវ៉ាន់ និងម៉ាកាវ) កូរ៉េខាងត្បូង ជប៉ុន (បូកករណីនាវា Diamond Princess) អ៊ីរ៉ង់ សិង្ហបុរី ថៃ អេមីរ៉ាតអារា់ប់រួម ម៉ាឡេស៊ី វៀតណាម អូម៉ង់ ហ្វីលីពីន លីបង់ អ៊ីរ៉ាក់ កូវ៉ែត ប៉ារែន អាហ្វហ្គានីស្ថាន ឥណ្ឌា ណេប៉ាល់ កម្ពុជា ស្រីលង្កា ប៉ាគីស្ថាន កាតា ឥណ្ឌូណេស៊ី ហ្ស៊កដានី និងអារ៉ាប៊ីសាអូឌីត។
-អឺរ៉ុប៖ អ៊ីតាលី បារាំង ចក្រភពអង់គ្លេស (មានករណីនៅអង់គ្លេស វេលស៍ ស្កុតឡេន អៀរឡង់ខាងជើង និងហ្ស៊ីប្រាល់តា) អាល្លឺម៉ង់ ស៊ុយអែត រុស្ស៊ី អេស្ប៉ាញ ហ្វាំងឡង់ បែលហ្ស៊ិក អូទ្រីស ក្រូអាស៊ី ស្វីស ក្រិក រូម៉ានី ន័រវេស ម៉ាសេដ្វានខាងជើង ដាណឺម៉ាក (បញ្ចូលករណីនៅប្រជុំកោះហ្វារ៉ូ) អេស្តូនី ហូឡង់ និងសាំងម៉ារាំង លីទុយអានី បេឡារុស អ៊ីស្លង់ ម៉ូណាកូ អៀរឡង់ លុចសំបួ អាមេនី សាធារណរដ្ឋឆេក អង់ដូរ៉ា ព័រទុយហ្គាល់ ឡេតូនី អ៊ុយក្រែន លិចតិញស្តាញ ប៉ូឡូញ ស្លូវេនី និងហុងគ្រី។
-អាមេរិកខាងជើង៖ សហរដ្ឋអាមេរិក កាណាដា ម៉ិកស៊ិក។
-អាមេរិកឡាទីន៖ ប្រេស៊ីល, អេក្វាឌ័រ, អាហ្សង់ទីន, ស៊ីលី។
-អាហ្វ្រិក៖ អេហ្ស៊ីប, អាល់ហ្សេរី, នីហ្សេរីយ៉ា, ទុយនីស៊ី, សេណេហ្គាល់, ម៉ារ៉ុក។
-អូសេអានី៖ អូស្ត្រាលី, នូវែលសេឡង់។
-ផ្សេងៗ៖ អាស៊ែបៃហ្សង់, ហ្សកហ្ស៊ី, អ៊ីស្រាអែល, សាធារណរដ្ឋដូមីនិក៕
© រក្សាសិទ្ធិដោយ thmeythmey.com