ពីនេះ ពីនោះ
×![]()
ដោយ: ថ្មីៗ
បើទោះបីជា សំណាង និងសុធីរ មិនសូវចង់និយាយរឿងនយោបាយក៏ដោយក្តី តែប្រធានបទនយោបាយនៅតែជាស្រមោលអន្ទោលតាមប្រាណពួកគេដដែល។ ព្រោះ នៅនាទីចុងក្រោយនយោបាយជាអ្នកសម្រេចអ្វីៗស្ទើរទាំងអស់នៅក្នុងសង្គមទូទៅ។ តើអ្នកនយោបាយបែបណាដែលប្រជាជនចូលចិត្ត ពេញចិត្ត និងចង់បោះឆ្នោតគាំទ្រ? អ្នកនយោបាយប្រជាភិថុតិ? ឬអ្នកនយោបាយអភិវឌ្ឍ?
សុធីរ៖ អាណាង! ដូចជាពាក្យបច្ចេកទេសពេកទេដឹង ប្រជាភិថុតិ? មានន័យថាម៉េច?
សំណាង៖ អញមើលក្នុងវចនានុក្រមសម្តេចសង្ឃ ជួន ណាត គេពន្យល់ពាក្យប្រជាភិថុតិថា គឺជាទង្វើបញ្ជោរ ឬបញ្ចើចលើកជើងប្រជារាស្ត្រ។ បើនិយាយឲ្យសាមញ្ញ មានន័យថា ធ្វើអ្វីៗគ្រប់យ៉ាងឲ្យរាស្ត្រសប្បាយចិត្ត ហើយត្រឡប់មកវិញ រាស្ត្រគាំទ្រ បោះឆ្នោតឲ្យ ឬក៏តបស្នងតាមវិធីផ្សេងៗ។ បើក្នុងន័យនយោបាយវិញ ពាក្យថា ប្រជាភិថុតិ គឺជាការបញ្ចុះបញ្ចូលទៅកាន់នរណាម្នាក់ក្នុងន័យ«មិនសូវស្មោះត្រង់»ដើម្បីតែប្រយោជន៍ខ្លួនឯង។ ចុះពាក្យថា អ្នកនយោបាយអភិវឌ្ឍ អ្ហែងយល់អត់ អាធីរ?
សុធីរ៖ អានេះ សួរដូចជាមើលងាយអញពេកហើយ។ ពាក្យនេះ វាជាពាក្យធម្មតាតើ! សួរដូចឆោត តើពលរដ្ឋចូលចិត្តអ្នកនយោបាយប្រជាភិថុតិ ឬអ្នកនយោបាយអភិវឌ្ឍ?
សំណាង៖ នៅក្នុងប្រទេសជឿនលឿន និងស៊ីវីល័យ ប្រជាពលរដ្ឋចេះដឹងច្បាស់លាស់ ដូច្នេះនយោបាយប្រជាភិថុតិ គ្មានប្រសិទ្ធភាពឡើយ សូម្បីតែបន្តិច។ អ្នកនយោបាយប្រជាភិថុតិ អត់មានកៅអីអង្គុយទេណា អា សុធីរ!
សុធីរ៖ ចុះនៅកម្ពុជាវិញ អ្នកនយោបាយប្រជាភិថុតិនៅអាចទាញការគាំទ្របានឬទេ?
សំណាង៖ អាចនៅទាក់ទាញបានខ្លះ។ ការសន្យាខ្យល់អាចនៅគេជឿខ្លះ ព្រោះ ពលរដ្ឋខ្មែរនៅមានជំនឿច្រើន ដូច្នេះ ពួកគាត់នៅជឿការសន្យារបស់គេ បើទោះបីជាខ្យល់ក៏ដោយក្តី។ តែទោះជាយ៉ាងណាក៏ដោយ ក៏ពលរដ្ឋភាគច្រើនលើសលុប លែងជឿអ្នកនយោបាយប្រជាភិថុតិទៀតហើយ។ ពលរដ្ឋឥឡូវនេះ ត្រូវការអ្នកនយោបាយនិយាយហើយ ធ្វើជាក់ស្តែង។ ពលរដ្ឋត្រូវការអ្នកនយោបាយប្រាកដនិយម ឬអ្នកនយោបាយអភិវឌ្ឍជាក់ស្តែង។ ពលរដ្ឋមិនត្រូវការអ្នកនយោបាយសន្យាអភិវឌ្ឍទេ តែត្រូវការអ្នកនយោបាយធ្វើ ធ្វើ ធ្វើ…ទោះធ្វើតិចតួចក៏ដោយក្តី។ ដូចជា ជំរុញវិស័យទេសចរណ៍តាមភូមិឃុំ, លើកតម្កើងផលិតផលអត្តសញ្ញាណតាមតំបន់, ជំរុញផលិតផលកសិកម្ម, ថែរក្សា កែលម្អរធនធានតាមឃុំស្រុក។ល។ សរុបមកវិញ អញចង់ប្រាប់អ្ហែងថា ពលរដ្ឋឥឡូវឆ្លាតណាស់ណា៎! ពួកគាត់ស្តាប់ ហើយតាមសង្កេតមើលថា តើអ្នកនយោបាយហ្នឹងនិយាយហើយ ធ្វើឬអត់? បើគ្រាន់តែនិយាយ ឲ្យតែទ្រឹស្តី ហើយអត់ធ្វើ ពួកគាត់មិនជឿទេ។ អា សុធីរ អំណោយសារ៉ុង អង្ករ ប្រេងខ្យល់…។ល។ បើអ្នកនយោបាយចង់ជូនជាអំណោយទៅប្រជាជន គឺឱ្យបាន ក្នុងន័យជាទឹកចិត្ត និងការគួរសមបែបទំនៀមទម្លាប់ខ្មែរ។ ប៉ុន្តែ អ្នកនយោបាយមិនត្រូវគិតថា អំណោយនោះជាថ្នូរនឹងសន្លឹកឆ្នោតដូចមុនទៀតទេ។ លែងមានន័យទៀតហើយ។
សុធីរ៖ បើស្តាប់អ្ហែងនិយាយ មានន័យថា រាស្ត្រ ដូចជាចាប់ផ្តើមឆ្លាតជាងតំណាងរាស្ត្រហើយហ្នឹង។ ហើយបើអ៊ីចឹងមែននោះ តិច តំណាងរាស្ត្រ លែងបានធ្វើជាតំណាងរបស់រាស្ត្រទៅ?
សំណាង៖ អញមិនដឹងទេអារឿងហ្នឹង៕
© រក្សាសិទ្ធិដោយ thmeythmey.com
