អត្ថបទពាណិជ្ជកម្ម
លោក ឃិន វណ្ឌី៖ សៀវភៅ «វិធីសាស្ត្របង្រៀន» ជួយឱ្យគ្រូសតវត្សទី២១ ចេះពីការបង្រៀនបែបថ្មី
លោក ឃិន វណ្ឌី គ្រូឧទ្ទេសនៅវិទ្យាស្ថានជាតិអប់រំ ដែលជាអ្នករៀបរៀងសៀវភៅ «វិធីសាស្រ្តបង្រៀន» ក្នុងចំណោមគ្រូឧទ្ទេស៥នាក់
×![]()
ភ្នំពេញ៖ សៀវភៅ «វិធីសាស្ត្របង្រៀន» ជាកម្រងឯកសារស្រាវជ្រាវវិធីសាស្ត្របង្រៀនដែលរៀបរៀងដោយក្រុមគ្រូឧទ្ទេសឧត្តមសិក្សានៃវិទ្យាស្ថានជាតិអប់រំ ។ សៀវភៅនេះ នឹងជួយបង្ហាញផ្លូវដល់គ្រូបង្រៀន គរុនិស្សិត គរុសិស្ស ឱ្យបានជ្រាបកាន់តែច្បាស់ពីការបង្រៀន។ លោក ឃិន វណ្ឌី គ្រូឧទ្ទេសនៅវិទ្យាស្ថានជាតិអប់រំ ដែលជាអ្នករៀបរៀងសៀវភៅ «វិធីសាស្ត្របង្រៀន» ក្នុងចំណោមគ្រូឧទ្ទេស៥នាក់ លើកឡើងថា៖ «សៀវភៅនេះ អាចយកទៅប្រើប្រាស់គ្រប់ភូមិសិក្សាតាំងពីថ្នាក់បឋមរហូតដល់មហាវិទ្យាល័យ និងគ្រប់មុខវិជ្ជា ជាពិសេសធ្វើឱ្យគ្រូបង្រៀន ចេះពីការបង្រៀនបែបថ្មី»។
សូមអញ្ជើញស្ដាប់បទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយលោក ឃិន វណ្ឌី គ្រូឧទ្ទេសនៅវិទ្យាស្ថានជាតិអប់រំ ដែលជាអ្នករៀបរៀងសៀវភៅ «វិធីសាស្ត្របង្រៀន» ក្នុងចំណោមគ្រូឧទ្ទេស៥នាក់ដូចតទៅ៖
ក្រុមគ្រូឧទ្ទេសកម្រិតឧត្តមមុខវិជ្ជាសីលធម៌ពលរដ្ឋនៃវិទ្យាស្ថានជាតិអប់រំ(NIE) ចំនួន ៥រូប បានចំណាយពេលចងក្រង និងបោះពុម្ពផ្សាយសៀវភៅមួយក្បាល ចំណងជើងថា «វិធីសាស្ត្របង្រៀន»។ សៀវភៅ «វិធីសាស្ត្របង្រៀន» ទទួលបានការគាំទ្រខ្លាំងពីសំណាក់អ្នកអប់រំដូចជា គ្រូបង្រៀន គរុនិស្សិត គរុសិស្ស។ សៀវភៅនេះបានបោះពុម្ព និងកែសម្រួលចំនួន៣លើក ដើម្បីអភិវឌ្ឍការអប់រំកាន់តែប្រសើរនិងបត់បែនទៅតាមទំនើបកម្មនិងពិពិធកម្មអប់រំ។
បើតាមលោក ឃិន វណ្ឌី សៀវភៅនេះចែកចេញជា៥ជំពូក ជំពូកទី១ ណែនាំឲ្យស្គាល់ពីវិធីសាស្ត្របង្រៀនជាអ្វី, ជំពូកទី២ ណែនាំឱ្យយល់ដឹងពីរបៀបនៃការបញ្ជ្រាបការអប់រំប្រកបដោយនិរន្តភាព(ESD) ការបញ្ជ្រាបទ្រឹស្តីប្ល៊ូមតាសូណូមីនៅក្នុងកិច្ចតែងការបង្រៀន, ជំពូកទី៣ ខ្លឹមសារនៅក្នុងជំពូកនេះគឺពន្យល់បកស្រាយអំពី ការកំណត់វត្ថុបំណងមេរៀន, ជំពូកទី៤ បង្ហាញពីរបៀបនៃការបង្រៀនបែបប្រពៃណីនិយម ដែលប្រព័ន្ធអប់រំពីដើមគេបានអនុវត្ត ដោយសិស្សរង់ចាំតែស្តាប់ ចាំតែទទួល ដោយគ្មានសកម្មភាព ហើយគ្រូចាំតែផ្តល់ឱ្យ និងជំពូកទី៥ បង្ហាញផ្លូវពីវីធីសាស្ត្របង្រៀនបែបទំនើបកម្មដូចជា វិធីវិទ្យាសាស្ត្រ ការបង្រៀននិងរៀនតាមបែបរិះរក(IBL) ដែលជាការបង្រៀនផ្តល់ឱ្យសិស្សរកចំណេះដឹងតាមរយៈសំណួរគន្លឹះ។
សម្រាប់អ្នកគ្រូ រិទ្ធិ លីដា គ្រូបង្រៀនថ្នាក់ទី៦ នៅសាលាបឋមសិក្សាវត្តបូព៌ ដែលបានអានសៀវភៅនេះ បានឲ្យដឹងថា៖ «នៅក្នុងសៀវភៅនេះ បាននិយាយពីវិធីសាស្ត្របង្រៀនជាច្រើន។ ហើយសៀវភៅនេះ ជាមាគ៌ាសម្រាប់ផ្ដល់ចំណេះដឹងបន្ថែម និងល្បិចក្នុងការបង្រៀនផ្សេងៗ។ ខ្ញុំគិតថា សៀវភៅនេះពិតជាមានសារៈសំខាន់សម្រាប់គ្រូបង្រៀន»។
ទោះបីមានបទពិសោធន៍បង្រៀនសិស្ស ១៦ឆ្នាំក៏ដោយ អ្នកគ្រូ រិទ្ធិ លីដា ក៏នៅតែអានវិធីសាស្ត្របង្រៀននេះដែរ។ «វិធីសាស្ត្របង្រៀនរបស់យើង ចាស់ក៏មិនបោះចោល ថ្មីក៏មិនបោះបង់។ វិធីសាស្ត្របង្រៀន គឺមានភាពបត់បែន បើមានកាន់តែច្រើន កាន់តែល្អ។ ដូច្នេះគ្រូបង្រៀន ត្រូវចេះពីវិធីសាស្ត្របង្រៀនឱ្យកាន់តែច្រើន»។ នេះជាការលើកឡើងរបស់អ្នកគ្រូ រិទ្ធិ លីដា។
លោក ស៊ូ វណ្ណា គ្រូបង្រៀននៅវិទ្យាល័យពាមជាំង ខេត្តត្បូងឃ្មុំ បានបង្ហាញចំណាប់អារម្មណ៍ចំពោះសៀវភៅវិធីសាស្ត្របង្រៀនយ៉ាងដូច្នេះ៖ «ខ្ញុំគិតថាសៀវភៅនេះ មានសារប្រយោជន៍ជាច្រើនសម្រាប់លោកគ្រូអ្នកគ្រូ។ ខ្ញុំគាំទ្រចំពោះសៀវភៅនេះ ជាខ្លាំង សៀវភៅនេះ ជាឯកសារមួយ ដែលចាំបាច់សម្រាប់គ្រូបង្រៀន វាដូចជាគម្ពីរមួយដ៏សំខាន់មួយ។ ព្រោះសៀវភៅនេះ បានបង្ហាញពីការបង្រៀនតាមលក្ខណៈផ្សេងៗជាច្រើន»។
លោក-អ្នក អាចទិញសៀវភៅនេះ នៅតូបលេខ៤ ក្នុងពិធីតាំងពិព័រណ៍ទិវាជាតិអំណាន នាវិទ្យាស្ថានតិចណូ ចាប់ពីថ្ងៃទី៦-៩ មីនា ឬក៏អាចទាក់ទងទៅលេខ០៩២ ៨៨៨ ៥១២ និង០៨៩ ៨៥៦ ៧៦៤។ សូមបញ្ជាក់ថា នៅថ្ងៃពិព័រណ៍ទិវាជាតិអំណាន សៀវភៅ «វិធីសាស្ត្របង្រៀន» នឹងបញ្ចុះតម្លៃ ១១ភាគរយ៕
Tag:
សៀវភៅ
វិធីសាស្ត្របង្រៀន
គ្រូបង្រៀន
© រក្សាសិទ្ធិដោយ thmeythmey.com
