COVID-19
អន្តរជាតិ
ចំនួនអ្នកឆ្លង COVID-19 កើនឡើងជាបន្តបន្ទាប់នៅសិង្ហបុរី ម៉ាឡេស៊ី និងថៃ
រូបភាព AFP
×![]()
ដោយ: តន ចាន់រិទ្ធារ៉ា
ករណីឆ្លងជំងឺផ្លូវដង្ហើមធ្ងន់ធ្ងរបង្កដោយកូរ៉ូណាវីរុស (COVID) នៅអាស៊ាន នៅតែមានការរាយការណ៍ជាបន្តបន្ទាប់។ សិង្ហបុរី នៅតែជាប្រទេសមានករណីឆ្លងច្រើនជាងគេក្នុងតំបន់ ដោយមានតួលេខសរុប១១៧នាក់។ ករណីឆ្លង COVID-19 បន្ថែម ក៏ត្រូវបានរាយការណ៍នៅម៉ាឡេស៊ី និងថៃផងដែរ ខណៈប្រទេសមួយចំនួននៅរក្សាករណីឆ្លងដដែល ស្របពេលដែលប្រទេសបីទៀត មិនទាន់ករណីឆ្លងវីរុសនៅឡើយទេ។ 
នៅថ្ងៃទី៥ ខែមីនា ក្រសួងសុខាភិបាលសិង្ហបុរី បានប្រកាសពីករណីឆ្លងកូរ៉ូណាវីរុសចំនួន៥ថែមទៀត ដែលនាំឲ្យករណីឆ្លងសរុបនៅប្រទេសកើនដល់១១៧ ។ មួយករណីថ្មី គឺនាំចូលពីប្រទេសខាងក្រៅ ខណៈបួនករណីសេសសល់ គឺពាក់ព័ន្ធនឹងការឆ្លងពិធីអាហារពេលល្ងាចមួយកាលពីថ្ងៃទី១៥ ខែមករា។
បើតាមក្រសួងសុខាភិបាលសិង្ហបុរី តួលេខអ្នកជំងឺ COVID-19 ដែលត្រូវបានអនុញ្ញាតឲ្យចេញពីមន្ទីរពេទ្យឡើងដល់៨១នាក់ផងដែរ គិតត្រឹមថ្ងៃទី៥ ខែមករា។ ដូចនេះ ចំនួនអ្នកជំងឺដែលបន្តស្ថិតក្នុងព្យាបាលមានចំនួន៣៦នាក់ ដែលភាគច្រើនមានសុខភាពល្អប្រសើរ តែ៧នាក់ មានសភាពធ្ងន់ធ្ងរ។ នេះបើតាមការផ្សាយរបស់ទូរទស្សន៍ Channel NewsAsia ។ អ្នកជិតខាងសិង្ហបុរី គឺម៉ាឡេស៊ី ក៏មានករណីឆ្លងដែរ ដោយសរុបមានចំនួន៥៥នាក់ ក្នុងនោះ២២នាក់ ចាកចេញពីមន្ទីរពេទ្យហើយ។
ថៃជាប្រទេសដែលមានករណីឆ្លងច្រើនបន្ទាប់ គឺ៤៧ករណី។ ក្នុងនោះ អ្នកស្លាប់មានម្នាក់ ករណីធ្ងន់ធ្ងរម្នាក់ ហើយ៣១នាក់ ត្រូវបានអនុញ្ញាតឲ្យចេញពីមន្ទីរពេទ្យក្រោយព្យាបាលរួចរាល់។
ក្រៅពីសិង្ហបុរី ថៃ និងម៉ាឡេស៊ី ករណីឆ្លងនៅប្រទេសសមាជិកអាស៊ានឯទៀតមានមិនការកើនឡើងអ្វីទេ។ វៀតណាម ដែលមានករណីឆ្លងចំនួន១៦នាក់នោះ បានព្យាបាលសះស្បើយអស់ហើយ។ ឯហ្វីលីពីន ដែលមានករណីឆ្លងបីករណី (ស្លាប់ម្នាក់) នោះ មិនមានការឆ្លងថ្មីទេ។ ឥណ្ឌូណេស៊ី ដែលទើបប្រកាសពីការឆ្លងពីរករណីដំបូង ក៏មិនបានរាយការណ៍ពីការឆ្លងថែមដែរ ខណៈអ្នកជំងឺទាំងពីរ នៅសម្រាកក្នុងមន្ទីរនៅឡើយ។
ឯកម្ពុជាដែលមានការឆ្លងមួយករណីនោះ ក៏មិនមានការឆ្លងថែមដែរ។ ប៉ុន្តែនៅថ្ងៃទី៥ ខែមីនា មនុស្សចំនួន៤នាក់ដែលមានទំនាក់ទំនងដោយផ្ទាល់ជនជាតិជប៉ុនម្នាក់ដែលរកឃើញថា មានផ្ទុក COVID-19 ពេលទៅដល់ជប៉ុននោះ ត្រូវបានដាក់ឲ្យដោយឡែក១៤ថ្ងៃ ខណៈដែលមនុស្សជាង៤០នាក់ទៀត ត្រូវដាក់ឲ្យស្ថិតក្រោមការត្រួតពិនិត្យសុខាភិបាល។
ប្រទេសបីទៀតមានឡាវ មីយ៉ាន់ម៉ា និងព្រុយណេ ក៏នៅតែមិនទាន់ប្រកាសពីការរកឃើញករណីឆ្លងដដែល៕
Tag:
COVID-19
សិង្ហបុរី
ថៃ
ម៉ាឡេស៊ី
© រក្សាសិទ្ធិដោយ thmeythmey.com
