អ្នកនាំពាក្យ៖«មន្ទីរពេទ្យយើងនីមួយៗ សឹងតែប្រហែលនឹងប្រទេសគេហើយ»

COVID-19

ជាតិ

សង្គមជាតិ

អ្នកនាំពាក្យ៖«មន្ទីរពេទ្យយើងនីមួយៗ សឹងតែប្រហែលនឹងប្រទេសគេហើយ»

06, Mar 2020 , 7:39 pm

រូបភាព

ដោយ: ថ្មីៗ

ស្របពេលមជ្ឈដ្ឋានមួយចំនួន ហាក់មិនទុកចិត្តនិងគ្មានជំនឿលើប្រព័ន្ធសុខាភិបាលកម្ពុជា ក្នុងការទប់ទល់នឹងវីរុសកូវីដ-១៩ អ្នកស្រីវេជ្ជបណ្ឌិត ឱ វណ្ឌឌីន អ្នកនាំពាក្យក្រសួងសុខាភិបាល ព្យាយាមរំលេចពីគុណភាពនិងការធ្វើទំនើបកម្មនៃប្រព័ន្ធសុខាភិបាលកម្ពុជា ដើម្បីទាញទំនុកចិត្តពីមជ្ឈដ្ឋានទាំងនោះមកវិញ។

អ្នកស្រី ឱ វណ្ឌឌីន ដែលធ្លាប់ទទួលបានការសរសើរពីសម្តេចនាយករដ្ឋមន្ត្រីថាជាអ្នកនាំពាក្យខ្លាំងពូកែជាងគេ បានបង្ហាញពីការរីកចម្រើនក្នុងវិស័យសុខាភិបាលកម្ពុជា ទាំងផ្នែកធនធានមនុស្សនិងសម្ភារពេទ្យ ដោយមិនចាញ់ប្រទេសដទៃប៉ុន្មានឡើយ។ អ្នកស្រី ថ្លែងក្នុងសន្និសីទសារព័ត៌មានស្តីពីស្ថានភាពវីរុសកូវីដ-១៩នៅកម្ពុជា កាលពីរសៀលថ្ងៃទី៥ ខែមីនា ឆ្នាំ២០២០ យ៉ាងដូច្នេះថា៖«...ដំណើរការនៃការអភិវឌ្ឍវិស័យសុខាភិបាលរបស់យើង មកដល់បច្ចុប្បន្ននេះ ខ្ញុំចង់ជម្រាបជូនថា នៅតាមមន្ទីរពេទ្យនីមួយៗ វា មានស្ថានភាព សឹងតែប្រហាក់ប្រហែលនឹងប្រទេសគេហើយ...»។

អ្នកស្រី បានលើកទឡ្ហីករណ៍ថា បច្ចុប្បន្ន មន្ទីរពេទ្យថ្នាក់ជាតិមួយចំនួន ដូចជា មន្ទីរពេទ្យកាល់ម៉ែត្រ និង មន្ទីរពេទ្យព្រះកុសុមៈ ជាដើម កំពុងសាងសង់អគារធំថ្មី និងត្រៀមបំពាក់គ្រឿងបរិក្ខារទំនើបៗ។ អ្នកស្រី បន្ថែមថា ទន្ទឹមនឹងនេះ មន្ទីរពេទ្យព្រះអង្គដួង ក៏កំពុងធ្វើទំនើបកម្មដែរ ដោយកំពុងប្រើប្រព័ន្ធឌីជីថល ក្នុងការគ្រប់គ្រង។

អ្នកស្រី បន្តថា ក្រៅពីមន្ទីរពេទ្យថ្នាក់ជាតិ នៅមានមន្ទីរពេទ្យតំបន់ផ្សេងទៀត ដូចជា នៅត្បូងឃ្មុំ និងនៅបាត់ដំបង ជាដើម ក៏កំពុងសាងសង់អគារធំដែរ។ អ្នកស្រី មានប្រសាសន៍ថា៖«មានមន្ទីរពេទ្យច្រើនទៀត ខ្ញុំ រៀបរាប់មិនអស់ទេ មានការសាងសង់និងការធ្វើទំនើបកម្ម និងបំពាក់នូវសម្ភារបរិក្ខា»។

លើសពីនេះ អ្នកស្រី ក៏បរិយាយដែរថា កម្ពុជា បានអភិវឌ្ឍធនធានមនុស្សបានយ៉ាងច្រើន ក្នុងវិស័យសុខាភិបាល។ អ្នកស្រី រម្លឹកទៅអតីតកាលថា ក្រោយថ្ងៃរំដោះ៧មករា ធនធានមនុស្សក្នុងវិស័យសុខាភិបាល មានមិនដល់៥០នាក់ផង តែបច្ចុប្បន្ន កើនឡើងដល់ទៅរាប់ម៉ឺននាក់។

ជាមួយគ្នានេះ អ្នកស្រីវេជ្ជបណ្ឌិត បានអះអាងថា ចំនួនអ្នកប្រើប្រាស់សេវាសុខាភិបាលរបស់រដ្ឋ បានកើនឡើងពីមួយថ្ងៃទៅមួយថ្ងៃ។ អ្នកស្រី បង្ហាញតួលេខថា ក្នុងឆ្នាំ២០១៩ ប្រជាពលរដ្ឋជាង១២លានករណី បានប្រើប្រាស់សេវាសុខាភិបាលរបស់រដ្ឋ ហើយក្នុងនោះ ចំនួនអ្នកពេញចិត្ត មានលើសពី៨០ភាគរយ។

អ្នកស្រី សរសើរប្រព័ន្ធសុខាភិបាលថា៖«ឥឡូវ យើងឃើញថា បងប្អូនប្រជាពលរដ្ឋយើង ចាប់ផ្តើមពេញចិត្តពេញថ្លើមទៅហ្នឹងសេវាសុខាភិបាលរបស់យើង ហើយប្រព័ន្ធសុខាភិបាលរបស់យើង ក៏មានភាពមាំទាំគួរសម ដែលយើងអាចអនុវត្តភារកិច្ចរបស់យើងបាន»។

មិនទាន់អស់ចិត្ត អ្នកនាំពាក្យរូបនេះ ឆ្លៀតរម្លឹកពីគុណសម្បត្តិរបស់ក្រសួងសុខាភិបាល ដែលបានរកឃើញករណីឆ្លងវីរុសកូវីដ-១៩លើកទីមួយ លើបុរសជនជាតិចិនវ័យ៦០ឆ្នាំម្នាក់ កាលពីកន្លងនេះ និងបានព្យាបាលគាត់ឲ្យជាសះស្បើយឡើងវិញ។ អ្នកស្រី ទាញហេតុផលថា បើប្រព័ន្ធសុខាភិបាលកម្ពុជា មិនកើតការមែននោះ ម្ល៉េះក្រសួងសុខាភិបាល ច្បាស់ជាមិនអាចចាត់ចែងវិធានការការពារវីរុសកូវីដ-១៩ បានឡើយ។

អ្នកស្រី គូសបញ្ជាក់ថា៖«បើប្រព័ន្ធសុខាភិបាលយើង មិនកើត មួយករណីនៅខេត្តព្រះសីហនុ យើងរកអត់ឃើញទេ មិនថារកអត់ឃើញទេ នៅព្យាបាលអត់កើតទៀត ច្បាស់ជាឆ្លងប៉ាតណាប៉ាតណីហើយ...»។

ក្រៅពីបុរសជនជាតិចិននោះ កម្ពុជា មិនទាន់រកឃើញអ្នកឆ្លងវីរុសកូវីដ-១៩ បន្ថែមនោះទេ។ ប៉ុន្តែ កន្លងមក មានជនជាតិចិន៣នាក់ ត្រូវបានរកឃើញថាផ្ទុកវីរុសកូវីដ-១៩ ក្រោយចេញពីកម្ពុជា ទៅដល់ចិនវិញ។

បន្ទាប់មក មានករណីស្រដៀងនេះកើតឡើងម្តងទៀត ដោយមានស្ត្រីជនជាតិអាមេរិកវ័យ៨៣ឆ្នាំម្នាក់ ត្រូវបានម៉ាឡេស៊ី អះអាងថា ឆ្លងវីរុសកូវីដ-១៩ ក្រោយគាត់ បានចេញពីនាវា Westerdam ដែលចូលចតនៅកំពង់ផែព្រះសីហនុ ហើយហោះទៅកាន់ម៉ាឡេស៊ី។ ប៉ុន្តែ ក្រោយមក មាឡេស៊ី បានប្រកាសថា គាត់បានជាសះស្បើយឡើងវិញ។ កម្ពុជា បានហៅ ការធ្វើតេស្តរបស់ម៉ាឡេស៊ី ក្នុងការរកវីរុសកូវីដ-១៩លើស្ត្រីអាមេរិករូបនោះ ថា មានភាពមិនប្រក្រតី។

បន្ទាប់មកទៀត មានករណីបែបនេះ បានកើតឡើងជាលើកទី៣ ដោយមានបុរសជនជាតិជប៉ុនម្នាក់ បានចាកចេញពីព្រលានយន្តហោះសៀមរាប ទៅកាន់វៀតណាម និងបន្តទៅជប៉ុន ហើយត្រូវបានរកឃើញថា ឆ្លងវីរុសកូវីដ-១៩។ ក្រសួងសុខាភិបាលកម្ពុជា កំពុងសិក្សាលម្អិតពីសាវតាររបស់បុរសជនជាតិជប៉ុននោះថា គាត់ធ្លាប់ទៅកន្លែងណា និងធ្លាប់មានទំនាក់ទំនងជាមួយអ្នកណាខ្លះ។

បច្ចុប្បន្ន ពលរដ្ឋខ្មែរ៤នាក់ (ស្រី២នាក់) ត្រូវបានដាក់ឲ្យនៅដាច់ដោយឡែកពីគេ ដើម្បីពិនិត្យសុខភាព ក្រោយស្រាវជ្រាវដឹងថា ពួកគេ ធ្លាប់ធ្វើការផ្ទាល់ជាមួយនឹងបុរសជនជាតិជប៉ុន ដែលឆ្លងវីរុសកូវីដ-១៩នោះ។ នៅមានមនុស្ស៤០នាក់ទៀត (មិនបញ្ជាក់ជនជាតិ) ត្រូវបានរកឃើញថា ធ្លាប់មានទំនាក់ទំនងដោយប្រយោលជាមួយបុរសជប៉ុននោះ។ អ្នកទាំង៤០នាក់នោះ ដ្បិតមិនស្ថិតក្នុងបន្ទប់ព្យាបាល តែត្រូវស្ថិតក្នុងការតាមដានសុខភាពពីក្រុមគ្រួពេទ្យ ហើយក្រុមគ្រូពេទ្យ ក៏បានណែនាំពួកគេ ឲ្យប្រុងប្រយ័ត្នខ្ពស់ផងដែរ ដូចជា ពាក់ម៉ាស់ការពារនិងឧស្សាហ៍លាងដៃ ជាដើម។

រដ្ឋាភិបាលកម្ពុជា បានត្រៀមថវិកា៣០លានលានដុល្លារ សម្រាប់ចំណាយលើការទប់ទល់នឹងវីរុសកូវីដ-១៩។ ប្រមុខរដ្ឋាភិបាល ប្រកាសថា ស្ថិតក្នុងកាលៈទេសៈនេះ ការងារជាអាទិភាពទីមួយរបស់កម្ពុជា គឺការរួមគ្នាប្រយុទ្ធប្រឆាំងនឹងវីរុសកូវីដ-១៩៕