COVID-19
អន្តរជាតិ
កូរ៉េខាងត្បូងតវ៉ា ក្រោយជប៉ុនបញ្ជាឲ្យអ្នកដំណើរកូរ៉េខាងត្បូងត្រូវនៅដោយឡែក១៤ថ្ងៃ
នាយករដ្ឋមន្រ្តីជប៉ុន ស៊ិនហ្សូ អាបេ ថ្លែងក្នុងពិធីមួយ។ រូបភាព Xinhua
×![]()
ដោយ: តន ចាន់រិទ្ធារ៉ា
ក្រសួងការបរទេសកូរ៉េខាងត្បូង នៅថ្ងៃទី៦ ខែមីនា បានបង្ហាញការសោកស្ដាយជាពន់ពេករបស់ខ្លួនទៅនឹងវិធានការរបស់ជប៉ុនដែលដាក់អ្នកដំណើរកូរ៉េខាងត្បូងឲ្យនៅដោយឡែករយៈពេល១៤ថ្ងៃ សំដៅទប់ស្កាត់ការឆ្លងជំងឺរលាកសួតបង្កដោយកូរ៉ូណាវីរុស (COVID-19) ។ វិធានការរបស់ជប៉ុននេះ ក៏បញ្ចូលចិនផងដែរ។ ជាមួយនឹងការមិនពេញចិត្ត ក្រសួងការបរទេសកូរ៉េខាងត្បូង ក៏ព្រមានចាត់វិធានការតបជប៉ុនវិញផងដែរ។
នៅថ្ងៃទី៥ ខែមីនា នាយករដ្ឋមន្ត្រីជប៉ុន ស៊ិនហ្សូ អាបេ បានប្រកាសចំណាត់ការថ្មីក្នុងការពង្រឹងការទប់ស្កាត់ការរាលដាលជំងឺ COVID-19 ដោយបានបញ្ជាឲ្យអ្នកដំណើរដែលធ្វើដំណើរពីកូរ៉េខាងត្បូង និងចិន ត្រូវនៅដោយឡែករយៈពេល១៤ថ្ងៃ និងមិនអនុញ្ញាតឲ្យប្រើប្រាស់មធ្យោបាយសាធារណៈណាមួយឡើយ។ ទន្ទឹមគ្នានោះ ជប៉ុន ក៏មានផែនការផ្អាកការលើកទិដ្ឋាការ៩០ថ្ងៃសម្រាប់អ្នកដំណើរកូរ៉េខាងត្បូងផងដែរ។
កូរ៉េខាងត្បូង បានប្រតិកម្មយ៉ាងខ្លាំងនឹងវិធានការរបស់ជប៉ុនពេលនេះ។ ក្នុងសេចក្ដីថ្លែងការណ៍ថ្ងៃទី៦ ខែមីនា ក្រសួងការបរទេសកូរ៉េខាងត្បូង បានបង្ហាញការសោកស្ដាយជាខ្លាំងចំពោះចំណាត់ការគ្មានហេតុផល និងជ្រុលហួសហេតុរបស់ជប៉ុន ដែលមិនបានជជែកគ្នាជាមួយកូរ៉េខាងត្បូងជាមុនសិនអ្វីឡើយ។ សេចក្ដីថ្លែងការណ៍ដដែលបន្តថា សេអ៊ូល តែងបានរំឭកតូក្យូឲ្យប្រុងប្រយ័ត្នពីការចាត់វិធានការបន្ថែមណាមួយ។
«យើងទទូចជប៉ុនឲ្យពិចារណាវិធានការនេះឲ្យបានលឿន។» នេះជាការស្នើរបស់ក្រសួងការបរទេសកូរ៉េខាងត្បូងដែលផ្សាយដោយទីភ្នាក់ងារព័ត៌មាន Yonhap ។ ជាមួយគ្នានោះ ក្រសួងនេះ ក៏គ្រោងកោះហៅទូតជប៉ុនប្រចាំសេអ៊ូលដើម្បីតវ៉នឹងវិធានការដែលនឹងត្រូវអនុវត្តចាប់ពីសប្ដាហ៍ក្រោយរហូតដល់ដំណាច់ខែមីនា។
ក្រសួងការបរទេសកូរ៉េខាងត្បូង ក៏ដាក់ការសង្ស័យលើជប៉ុនដែលប្រកាសវិធានការរឹតត្បិតរបស់ខ្លួន ខណៈដែលវិធានការរទប់ស្កាត់របស់កូរ៉េខាងត្បូង កំពុងផ្ដល់លទ្ធផលវិជ្ជមាននោះ។ សេអ៊ូលទំនងសង្ស័យថា តូក្យូមានគោលដៅផ្សេងទៀតទើបប្រកាសវិធានការថ្មីពេលនេះ។
ចំណាត់ការរបស់ជប៉ុន ត្រូវបានប្រកាស ស្របពេលដែលការរាលដាលករណីឆ្លង COVID-19 នៅកូរ៉េខាងត្បូង។ កន្លងទៅ ជប៉ុន បានហាមប្រាមការធ្វើដំណើរពីទីក្រុង Daegu និងខេត្ត North Gyeongsang ដែលជាប្រភពចម្លងដ៏ធំនៅកូរ៉េខាងត្បូង។ មុននេះ ចិន ក៏រឹតបន្តឹងការធ្វើដំណើរពីកូរ៉េខាងត្បូងដែរ ដែលកាលនោះ សេអ៊ូលក៏តវ៉ាខ្លាំងដែរ ព្រោះពេលវីរុសកំពុងរាលដាលខ្លាំង ខ្លួនមិនបានចាត់វិធាការតឹងរ៉ឹងបែបនោះឡើយ៕
Tag:
COVID-19
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com
