COVID-19
ជាតិ
សង្គមជាតិ
កញ្ញា សុជាតា បង្កើតសមាគមស្ត្រីមេផ្ទះ ផលិតម៉ាស់ក្រមាលក់ក្នុងតម្លៃសមរម្យ
× ភ្នំពេញ៖ កញ្ញា ពិន សុជាតា ជាអ្នកផលិតសម្ភារប្រើប្រាស់ដែលច្នៃពីស្លឹកត្នោត និងក្រមា មានស្រុកកំណើតនៅខេត្តកំពង់ឆ្នាំង បានផលិតម៉ាស់ក្រមាសម្រាប់លក់ឲ្យពលរដ្ឋ ដើម្បីការពារជំងឺផ្តាសាយ ក្អក ជាពិសេសជំងឺកូវីដ-១៩ (COVID-19) ក្រោយពីកញ្ញា សង្កេតឃើញម៉ាស់ឡើងថ្លៃនៅទីផ្សារកម្ពុជា។ មានវ័យ២៦ឆ្នាំ កញ្ញា សុជាតា បានជួយឲ្យស្ត្រីមេផ្ទះជាច្រើននាក់មានការងារធ្វើ ដូចជាការផលិតសម្ភារដែលច្នៃពីក្រមា និងស្លឹកត្នោត ដើម្បីបង្កើនចំណូលដល់ស្ត្រីមេផ្ទះ។
កញ្ញា ពិន សុជាតា មានជំនាញ និងបើកជាសិប្បកម្មផលិតសម្ភារប្រើប្រាស់ដែលច្នៃពីក្រមា អស់រយៈពេល៣ឆ្នាំមកហើយ ដែលមានជា កាបូបលុយ កាបូបដាក់ប៊ិក បន្តោងសោ បូចងសក់ និងកាដូសម្រាប់ថ្ងៃអាពាហ៍ពិពាហ៍។ មុននឹងកញ្ញាមានសិប្បកម្មផលិតសម្ភារដែលច្នៃពីក្រមានេះ កញ្ញា សុជាតា ក៏បានបង្កើតជាសហគមន៍ស្ត្រីមេផ្ទះចំនួន៣០០ ទៅ៥០០គ្រួសារដែរ ដែលស្ថិតនៅខេត្តកំពង់ឆ្នាំង កំពង់ស្ពឺ តាកែវ និងសៀមរាប។ ផលិតផលដែលច្នៃពីក្រមា មានដូចជា កាបូបលុយ កាបូបដាក់ប៊ិក បន្តោងសោ បូចងសក់ និងកាដូសម្រាប់ថ្ងៃអាពាហ៍ពិពាហ៍ ដែលផលិតផលទាំងនោះ កញ្ញា ដាក់លក់នៅក្បែរសារមន្ទីរជាតិក្នុងភ្នំពេញ នៅតាមបណ្តាស្តង់ពិព័រណ៍ពាណិជ្ជកម្មនានានិងនាំចេញទៅក្រៅប្រទេសដូចជាបារាំងនិងវៀតណាមជាដើម។
ក្រៅពីផលិតសម្ភារប្រើប្រាស់ដែលច្នៃពីក្រមា កញ្ញា សុជាតា ក៏បន្តចាប់ផ្តើមផលិតម៉ាស់ក្រមាតាំងពីអំឡុងពេលជំងឺកូវីដ-១៩ ផ្ទុះដំបូងមកម្ល៉េះ សម្រាប់ទុកប្រើខ្លួនឯង ដោយកញ្ញាយល់ឃើញថា ពេលប្រើទៅអាចការពារ និងទប់ស្កាត់ពីជំងឺឆ្លងផ្សេងៗបាន ហើយកញ្ញាក៏បន្តផលិតម៉ាស់ក្រមា៥០០ម៉ាស់ក្នុងមួយថ្ងៃ សម្រាប់លក់ទៅឲ្យអតិថិជនដែលនៅតាមបណ្តាខេត្ត ដើម្បីឲ្យពលរដ្ឋប្រើប្រាស់ដោយតម្លៃសមរម្យដែលអាចទទួលយកបាន។ កញ្ញា ប្រាប់ថា បើទិញរាយ ម៉ាស់មួយ មានតម្លៃ៣០០០រៀល ហើយបើទិញដុំវីញ (ចាប់ពី១០០ឡើងទៅ) នឹងមានបញ្ចុះតម្លៃ។
នារីវ័យ២៦ឆ្នាំរូបនេះ មិនត្រឹមតែគិតពីការចំណាយរបស់ពលរដ្ឋលើការទិញម៉ាស់ថ្លៃទេ កញ្ញាក៏ចង់ឲ្យស្ត្រីខ្មែរមានការងារមួយសមរម្យ ដែលអាចរកចំណូលដើម្បីចិញ្ចឹមគ្រួសារផងដែរ។ សុជាតា និយាយថា៖«រាល់ផលិតផលរបស់ខ្ញុំទាំងអស់ គឺជួយសហគមន៍ផង ទីមួយយើងកាត់បន្ថយចំណាកស្រុកខុសច្បាប់ ទីពីរយើងជួយបង្កើនប្រាក់ចំណូលដល់ពួកគេក្នុងមួយថ្ងៃអាចរកចំណូលបានចាប់ពី៣ម៉ឺនរៀលឡើងទៅ។ បើយើងប្រៀបធៀបពីការងារដេរម៉ាស់នេះ វាមិនចាញ់ការងាររោងចក្រប៉ុន្មានទេ»៕
Tag:
ម៉ាស់
ស្ត្រីមេផ្ទះ
ជំងឺកូវីដ-១៩
© រក្សាសិទ្ធិដោយ thmeythmey.com