ការប្រកូតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគបានឈានដល់សប្តាហ៍ទី៤ ដោយនៅថ្ងៃសៅរ៍ ទី៧ មីនា នេះមានការប្រកួតចំនួន៣គូ ដែលធ្វើឡើងនៅទីលានផ្សេងៗគ្នា។ ក្នុងនោះពីរគូធ្វើឡើងនៅរាជធានីភ្នំពេញនិងមួយគូទៀតរៀបចំនៅខេត្តសៀមរាប។
លោក ប្រាក់ សុវណ្ណារ៉ា ត្រូវដឹកនាំក្រុមអគ្គស្នងការដ្ឋាននគរបាលជាតិ(ប៉ូលិស)ប្រជែងតទល់ជាមួយបឹងកេត ដែលជាអតីតក្រុមលោកធ្លាប់ដឹកនាំឈ្នះជើងឯកលីគកំពូលកាលពីឆ្នាំ២០១៦។ ការប្រកួតប្រព្រឹត្តទៅវេលាម៉ោង៣:៣០នាទីរសៀលថ្ងៃទី៧ ខែមីនា ឆ្នាំ២០២០ នេះ នាកីឡដ្ឋានខេមបូឌាអ៊ែវ៉េ។
សម្រាប់លោក ប្រាក់ សុវណ្ណារ៉ា ការជួបជាមួយបឹងកេតមិនមែនជារឿងងាយស្រួលសម្រាប់ប៉ូលិសនោះទេ ដ្បិតបឹងកេតជាក្រុមមានសមត្ថភាពខ្លាំង និងសម្បូរកីឡាករមានគុណភាពខ្ពស់ ទាំងកីឡាករកម្ពុជានិងបរទេស។ តែយ៉ាងណាគ្រូបង្វឹករូបនេះជឿជាក់ថា ជំនួបនៅរសៀលនេះនឹងមានតានតឹង និងទាក់ទាញបំផុតសម្រាប់ទស្សនិកជន។ ដ្បិតក្រុមទាំងពីរសុទ្ធតែបានរៀបចំក្រុមបានយ៉ាងល្អសម្រាប់ត្រៀមការប្រកួតមួយនេះ។
«ទោះបីខ្ញុំមិននិយាយក៏អ្នករាល់គ្នាដឹងដែរ បឹងកេតសម្បូរកីឡាករមានទេពកោសល្យទាំងកីឡាករខ្មែរនិងបរទេស ជាពិសេសជួរខាងលើ គឺអាចបង្កគ្រោះថ្នាក់ ទោះក្រុមណាក៏ភ័យខ្លាចដែរ នេះជាចំណុចខ្លាំងរបស់ពួកគាត់។ យើងសង្កេតឃើញថា ពីរប្រកួតកន្លងមកយើងមិនដែលឃើញពួកគេធ្វេសប្រហែសនោះទេ ទាំងតំបន់ប្រយុទ្ធ និងការពារ។ ខ្ញុំរំពឹងថា ការប្រកួតនៅថ្ងៃនេះនឹងល្អមើល»។ នេះជាការលើកឡើងរបស់លោក ប្រាក់ សុវណ្ណារ៉ា។
ទោះបីក្រុមអគ្គស្នងការដ្ឋាននគរបាលជាតិរងបរាជ័យពីរប្រកួតជាប់គ្នាក៏ដោយ តែគ្រូបង្វឹកកម្រិត Pro-License រូបនេះអះអាងថា នៅឆ្នាំនេះប៉ូលិសមានការរៀបចំក្រុមបានល្អជាង បើធៀបនឹងឆ្នាំមុន។ បើយើងមើលពីបរាជ័យពីរប្រកួតកន្លងមករបស់ប៉ូលិស ពួកគេចាញ់គូប្រកួតតែមួយគ្រាប់ប៉ុណ្ណោះ ក្នុងនោះចាញ់វិសាខា និងណាហ្គាវើលក្នុងលទ្ធផល ២-១ ដូចគ្នា។
ជាមួយគ្នានេះលោក Apisit Im-Amphai គ្រូបង្វឹកក្រុមបឹងកេតបានបញ្ជាក់ថា លោកនឹងផ្លាស់ប្តូរទម្រង់លេងថ្មីពេលជួបជាមួយប៉ូលិសនៅរសៀលនេះ។ ការលើកឡើងបែបនេះ ក៏ដោយសារតែបឹងកេតចង់ឈ្នះក្នុងការប្រកួតមួយនេះ បន្ទាប់ពីបាត់បង់ពីរពិន្ទុក្នុងជំនួបជាមួយណាហ្គាវើលកាលពីសប្តាហ៍មុន។
តែយ៉ាងណា គ្រូបង្វឹកសញ្ជាតិថៃរូបនេះ មិនហ៊ានមើលស្រាលសមត្ថភាពគូប្រកួតនោះទេ ដ្បិតប៉ូលិសជាក្រុមមានការរៀបចំបានល្អនិងមានសមត្ថភាពខ្លាំង ជាពិសេសមានគ្រូបង្វឹកមានសមត្ថភាពខ្ពស់ ដែលធ្លាប់ដឹកនាំក្រុមជម្រើសជាតិ និងធ្លាប់ដឹកនាំបឹងកេតឲ្យឈ្នះពានលីគកំពូលទៀតផង។ លោកជឿជាក់ថា ការប្រកួតនៅថ្ងៃនេះនឹងក្លាយជាការប្រកួតមួយដ៏ទាក់ទាញ និងល្អមើល។
នៅម៉ោង៣:៣០នាទីរសៀលនេះដែរ ក៏មានការប្រកួតពីរគូផ្សេងទៀតផងដែរក្នុងនោះក្រុមអាស៊ីអឺរ៉ុបត្រូវបើកទ្វារកីឡដ្ឋានអេអ៊ីយូស្ពតផាកទទួលក្រុមអគ្គិសនីកម្ពុជា ខណៈណាហ្គាវើលប្រើកីឡដ្ឋាន S.R.U ស្វាគមន៍សូលទីឡូអង្គរនៅទឹកដីខេត្តសៀមរាប៕