COVID-19
ជាតិ
រដ្ឋបាលរាជធានីភ្នំពេញ ប្រាប់ពលរដ្ឋកុំព្រួយ កម្ពុជាមានស្បៀងបម្រុងទុកលើស និងអាចនាំចេញបានទៀត រូបភាពពីហ្វេសប៊ុក
× ភ្នំពេញ៖ រដ្ឋបាលរាជធានីភ្នំពេញ បានស្នើឲ្យពលរដ្ឋរក្សាភាពស្ងប់ស្ងាត់ កុំជ្រួលច្របល់តាមពាក្យចចាមអារ៉ាម ខណៈកម្ពុជាបានផលិតស្បៀងលើសពីការបម្រុង រហូតដល់នាំចេញទៅបរទេសទៀត។ នេះជាការអំពាវនាវរបស់រដ្ឋបាលរាជធានីភ្នំពេញ ក្រោយប្រជាពលរដ្ឋមួយចំនួនបាននាំគ្នាសម្រុកទិញទំនិញស្ដុកទុក ជាពិសេសស្បៀងអាហារប្រចាំថ្ងៃ ដោយព្រួយបារម្ភពីវីរុសកូវីដ១៩ ។
តាមរយៈសេចក្តីជូនដំណឹងរបស់ខ្លួន នៅថ្ងៃទី៦ មីនា រដ្ឋបាលរាជធានីភ្នំពេញ បានលើកឡើងថា ការសម្រុកទៅទិញទំនិញរបស់ប្រជា ធ្វើឲ្យជនឆ្លៀតឱកាសមួយចំនួនគេងចំណេញ និងដំឡើងថ្លៃទំនិញដែលនាំឲ្យខាតប្រយោជន៍របស់ពលរដ្ឋ។ បន្ថែមលើសេចក្តីជូនដំណឹងនេះ អ្នកនាំពាក្យសាលារាជធានីភ្នំពេញ លោក ម៉េត មាសភក្តី អះអាងថាស្បៀងអាហារបម្រុងនៅរាជធានីភ្នំពេញ ពុំបានប្រឈមនឹងការខ្វះខាតនោះទេ។
លោក ម៉េត មាសភក្តី ក៏ស្នើឲ្យប្រជាពលរដ្ឋ ជឿជាក់លើព័ត៌មានរបស់ក្រសួងសុខាភិបាល និងរដ្ឋបាលរាជធានីភ្នំពេញ ជាជាងព័ត៌មានលើហ្វេសប៊ុក។ លោកបន្តថា៖«ប្រជាពលរដ្ឋ គួរតែព្យាយាមការពារ និងថែរក្សា តាមការណែនាំរបស់ក្រសួងសុខាភិបាលវិញ។ ការប្រុងប្រយ័ត្នជាការល្អ ប៉ុន្តែកុំឲ្យប្រុងប្រយ័ត្នហួសហេតុពេក ដែលនាំគ្នាចំណាយថវិកាទៅទិញស្បៀងទុក»។
ដើម្បីរក្សាសណ្ដាប់ធ្នាប់ ស្ថិរភាពទំនិញ រដ្ឋបាលរាជធានីភ្នំពេញ ស្នើឲ្យបងប្អូនប្រជាពលរដ្ឋទាំងអស់រក្សាភាពស្ងប់ស្ងាត់ ប្រកបមុខរបរចិញ្ចឹមជីវិតដូចប្រក្រតី មិនជ្រួលច្របល់តាមពាក្យចចាមអារ៉ាម និងអនុវត្តតាមវិធីបង្ការរបស់ក្រសួងសុខាភិបាល៕
Tag:
សាលារាជធានី
COVID19
© រក្សាសិទ្ធិដោយ thmeythmey.com