COVID-19
អន្តរជាតិ
COVID-19៖ កូរ៉េខាងត្បូង ប្រកាសលុបចោលការលើកលែងទិដ្ឋាការសម្រាប់អ្នកដំណើរជប៉ុន នាយករដ្ឋមន្រ្តីជប៉ុន ស៊ិនហ្សូ អាបេ និងប្រធានាធិបតីកូរ៉េខាងត្បូង មូន ចេអ៊ីន ។ រូបភាព AFP
× ការប្រឹងប្រែងដើម្បីទប់ស្កាត់ការរាលដាលជំងឺផ្លូវដង្ហើមបង្កដោយកូរ៉ូណាវីរុស (COVID-19) បែរជាធ្វើឲ្យកូរ៉េខាងត្បូង និងជប៉ុនមើលមុខគ្នាមិនចំទៅវិញ។ នៅថ្ងៃទី៦ ខែមីនា កូរ៉េខាងត្បូង បានប្រកាសលុបចោលការលើកលែងទិដ្ឋាការសម្រាប់អ្នកដំណើរជប៉ុន ដើម្បីឆ្លើយតបវិធានការរបស់ជប៉ុនដែលរឹតត្បិតការធ្វើដំណើរពីកូរ៉េខាងត្បូង ព្រោះបារម្ភពីការចម្លង COVID-19 ។ កូរ៉េខាងត្បូងថែមបោះសម្ដីថា ជប៉ុនយល់មិនដល់ប្រព័ន្ធដាក់ចត្តាឡីស័ករបស់ខ្លួនទៅទៀត។
ក្នុងសន្និសីទសារព័ត៌មានល្ងាចថ្ងៃទី៦ ខែមីនា អនុរដ្ឋមន្ត្រីទីមួយក្រសួងការបរទេសកូរ៉េខាងត្បូង Cho Sei-young បានប្រកាសពីវិធានការថ្មីដែលអនុវត្តលើជនជាតិជប៉ុនចាប់ពីពាក់កណ្ដាលយប់ថ្ងៃទី៩ ខែមីនាតទៅ។ វិធានការនោះរួមមាន ការផ្អាកកម្មវិធីមិនយកទិដ្ឋាការ៩០ថ្ងៃពីអ្នកដំណើរជប៉ុន ក៏ដូចជាលុបចោលទិដ្ឋាការដែលផ្ដល់ហើយ។
មុនការប្រកាសវិធានការតបវិញនេះ ក្រសួងការបរទេសកូរ៉េខាងត្បូង ក៏បានព្រមានជាមុនផងដែរ បន្ទាប់ពីនាយករដ្ឋមន្ត្រីជប៉ុន ស៊ិនហ្សូ អាបេ ប្រកាសផែនការដាក់ឲ្យនៅដោយឡែករយៈពេល១៤ថ្ងៃលើអ្នកដំណើរពីកូរ៉េខាងត្បូង។ ចំណាត់ការរបស់ជប៉ុន ស្ដែងចេញពីការបារម្ភការសាយភាយវីរុសប្រភេទថ្មីពីកូរ៉េខាងត្បូងចូលជប៉ុន ខណៈដែលករណីឆ្លងវីរុសនៅកូរ៉េខាងត្បូងមានអត្រាខ្ពស់ទីពីរបន្ទាប់ពីចិនទៅហើយ។
ទីភ្នាក់ងារព័ត៌មានកូរ៉េខាងត្បូង Yonhap បានស្រង់សម្ដីលោក Cho ថា រដ្ឋាភិបាលសេអ៊ូល ពិតជាសោកស្ដាយចំពោះការសម្រេចចិត្តរបស់តូក្យូដែលមិនបានជូនដំណឹង ឬពិភាក្សាគ្នាជាមុន។ បើតាមមន្ត្រីជាន់ខ្ពស់រូបនេះ ជប៉ុន ហាក់ដូចជាខ្វះការយល់ដឹងពីប្រព័ន្ធចត្តាឡីស័កនៅកូរ៉េខាងត្បូងដែលទាន់សម័យ និងពិសេសជាងគេ។
ជាមួយគ្នានេះ ទីក្រុងសេអ៊ូល ក៏ព្រមានចាត់វិធានការថែមទៀតដើម្បីឆ្លើយតបការសម្រេចចិត្តរបស់តូក្យូដែលអនុញ្ញាតឲ្យយន្តហោះធ្វើដំណើរពីកូរ៉េខាងត្បូង អាចចុះចតតែនៅព្រលាន Narita ឬនៅ Kansai ប៉ុណ្ណោះ។ ពេលនេះ កូរ៉េខាងត្បូង កំពុងពិចារណាថា នឹងអនុញ្ញាតឲ្យយន្តហោះជប៉ុនចុះចតតែនៅព្រលានណាមួយក្នុងចំណោមព្រលាន Incheon, Seoul, Gimhae ឬ Jeju ។
លើសពីនោះ កូរ៉េខាងត្បូង ដែលកំពុងក្ដៅស្លឹកត្រចៀកខ្លាំងនោះ ក៏មានផែនការដំឡើងកម្រិតអាសន្ននៃការធ្វើដំណើរទៅជប៉ុនឲ្យដល់កម្រិតពីរ ដែលមានន័យថា ប្រជាជនកូរ៉េខាងត្បូង ពុំគួរធ្វើដំណើរទៅជប៉ុនឡើយ បើគ្មានការងារចាំបាច់។ បច្ចុប្បន្ន ជប៉ុន បានអនុវត្តបែបនេះចំពោះប្រជាជនរបស់ខ្លួន ខណៈបានហាមការធ្វើដំណើរមានគោលដៅពីទីក្រុង Daegu និង Cheongdo ដែលកូរ៉ូណាវីរុសអុកឡុកខ្លាំង៕
Tag:
COVID-19
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com