ជាតិ
បទយកការណ៍ / បទសម្ភាសន៍
សារមន្ទីរតានី មានគម្រោងផលិតភាជន៍បុរាណឡើងវិញ ដើម្បីបំផុសឱ្យពលរដ្ឋគាំទ្រនិងអភិរក្សស្នាដៃដូនតា
× សៀមរាប៖ កុលាលភាជន៍ជាវត្ថុប្រើប្រាស់នាសម័យបុរាណ ដែលផលិតចេញពីដីដុត។ សព្វថ្ងៃ ការប្រើប្រាស់សម្ភារបែបនេះ មិនសូវមានច្រើនទេ ឬសឹងតែគ្មានតែម្ដងនៅតាមផ្ទះរបស់ប្រជាពលរដ្ឋ គឺជំនួសដោយសម្ភារទំនើបៗដែលច្នៃពីវត្ថុធាតុដើមផ្សេងៗ។ តែយ៉ាងណា វត្ថុបុរាណទាំងនោះនៅតែមានតម្លៃសម្រាប់អ្នកស្រឡាញ់ផ្នែកវប្បធម៌ និងសិល្បៈបុរាណ ដោយពួកគេចង់លើកស្ទួយសិល្បៈទាំងនោះឱ្យរស់ឡើងវិញ។ សារមន្ទីរកុលាលភាជន៍អង្គរភូមិតានី មានគម្រោងផលិតកុលាលភាជន៍ទាំងនោះឡើងវិញ ដោយយកលំនាំសិល្បៈបុរាណ លើកស្ទួយមរតកដូនតាឱ្យនៅគង់វង្ស។
ព័ត៌មានលម្អិត សូមស្ដាប់បទសម្ភាសរវាងអ្នកសារព័ត៌មានថ្មីៗ ជាមួយលោក វង្ស សាវុទ្ធី បុគ្គលិកបច្ចេកទេសនៃសារមន្ទីរកុលាលភាជន៍អង្គរភូមិតានី ដូចតទៅ៖
សារមន្ទីរកុលាលភាជន៍អង្គរភូមិតានី បានយកកុលាលភាជន៍មួយចំនួនដែលផលិតឡើងវិញ ទៅតាំងបង្ហាញក្នុងពិព័រណ៍សមិទ្ធផលការងារ ក្នុងការប្រារព្ធខួប២៥ឆ្នាំ ថ្ងៃបង្កើតអាជ្ញាធរជាតិអប្សរា ដែលរៀបចំឡើងពីថ្ងៃទី១៥ ដល់ថ្ងៃទី២២ កុម្ភៈ នៅបរិវេណមុខប្រាសាទអង្គរវត្ត។ កុលាលភាជន៍ទាំងនោះ ត្រូវបានផលិតឡើងវិញដោយយកលំនាំដើមពីវត្ថុសិល្បៈបុរាណ តែប្រើបច្ចេកទេសដុតទំនើបជាង។
លោក វង្ស សាវុទ្ធី បានពន្យល់ពីពាក្យកុលាលភាជន៍យ៉ាងដូច្នេះថា៖« សូមញែកពាក្យនេះបន្ដិច កុលាលភាជន៍ជាភាសាសំស្ក្រឹត ដែលកុលាលមានន័យថា «ដីដុត» ភាជន៍មានន័យថា «របស់អ្វីដែលអាចទុករបស់អ្វីមួយបាន» អ៊ីចឹង កុលាលភាជន៍មានន័យថា «ផលិតផលដែលចេញពីដីដុត» ហើយកុលាលភាជន៍នេះ ភាសាក្រិកមានន័យថា «សេរ៉ាមិច»។
ចំពោះគោលបំណង នៃការបង្កើតកុលាលភាជន៍ឡើងវិញនេះ ត្រូវបានលោក វង្ស សាវុទ្ធី ពន្យល់ថា វាជាការរំឭកនូវស្នាដៃដូនតា បង្ហាញពីការលើកស្ទួយស្នាដៃ ការស្រឡាញ់ និងថែទាំវត្ថុសិល្បៈទាំងនោះមិនឱ្យបាត់បង់។ លោក សាវុទ្ធី បន្ថែមថា មរតកដូនតាខ្មែរមានច្រើនសន្ធឹក តែការប្រើប្រាស់កុលាលភាជន៍ឡើងវិញ ក៏ជាផ្នែកមួយសម្រាប់រំឭកស្នាដៃ និងការអភិរក្សផងដែរ៕
Tag:
កុលាលភាជន៍
សារមន្ទីរកុលាលភាជន៍អង្គរភូមិតានី
វប្បធម៌
សិល្បៈ
© រក្សាសិទ្ធិដោយ thmeythmey.com