ផ្ទុយពីជនឱកាសនិយមមួយចំនួន អ្នកស្រី នុត សម្ផស្ស បានចូលរួមចំណែកសកម្មភាពមនុស្សធម៌ ដោយចែកទឹកលាងដៃសម្លាប់មេរោគជាង៥ពាន់ដប ដល់ពលរដ្ឋមិនគិតថ្លៃ

COVID-19

អត្ថបទពាណិជ្ជកម្ម

ផ្ទុយពីជនឱកាសនិយមមួយចំនួន អ្នកស្រី នុត សម្ផស្ស បានចូលរួមចំណែកសកម្មភាពមនុស្សធម៌ ដោយចែកទឹកលាងដៃសម្លាប់មេរោគជាង៥ពាន់ដប ដល់ពលរដ្ឋមិនគិតថ្លៃ

08, Mar 2020 , 4:19 pm

រូបភាព

ដោយ: ថ្មីៗ

ភ្នំពេញ៖ អ្នកស្រី នុត សម្ផស្ស បានផលិតទឹកលាងដៃសម្លាប់មេរោគដែលមានគុណភាព ចែកជូនដល់ប្រជាពលរដ្ឋក្នុងស្រុក ចំនួនជាង៥,០០០ដប ដោយមិនគិតថ្លៃ។ ការផ្តល់ជូននូវទឹកលាងដៃនេះ គឺធ្វើឡើងដើម្បីចូលរួមលើកកម្ពស់អនាម័យសុខភាពសាធារណៈ និងសាមគ្គីភាពសង្គម ក្នុងការបង្ការឬទប់ស្កាត់នៃការឆ្លងមេរោគនានា ពិសេសមេរោគCOVID-19។ នេះជាការលើកឡើងរបស់អ្នកស្រី សម្ផស្ស ដែលជាសហគ្រិន និងជាស្ថាបនិក នៃរោងចក្រផលិតសាប៊ូOKA គ្រប់ប្រភេទក្នុងស្រុក។

ការរីករាលដាលនៃមេរោគ COVID-19 ក្នុងពិភពលោក បានបង្កើតឱ្យមានរូបភាពនៃការធ្វើអាជីវកម្មក្នុងស្រុកមួយចំនួន ប្រាសចាកពីគុណធម៌ និងភាពទទួលខុសត្រូវក្នុងសង្គម ដើម្បីទទួលនូវប្រាក់ចំណេញខ្ពស់ណាមួយ នៃផលិតផលរបស់ខ្លួន។ ស្របពេលដែលកម្ពុជាកំពុងប្រឈមនៃការរីករាលនូវមេរោគCOVID-19 ដ៏សាហាវនេះ ផលិតផល និងសម្ភារសម្រាប់ទប់ស្កាត់ និងបង្ការ នៃការឆ្លងមេរោគនេះ ដូចជាម៉ាស និងទឹកលាងដៃសម្លាប់មេរោគ ដែលដាក់នៅលើទីផ្សារ ត្រូវបានអាជីវករមួយចំនួនដំឡើងថ្លៃលើសទ្វេដង នៃតម្លៃធម្មតា ដែលធ្វើពលរដ្ឋមួយចំនួន គ្មានលទ្ធភាពទិញសម្ភារទាំងនោះ ឬចំណាយខ្ពស់សម្រាប់ប្រើប្រាស់ប្រចាំថ្ងៃ។

ដោយមើលឃើញបញ្ហានៃការបង្កើតរូបភាពបែបនេះ អ្នកស្រី នុត សម្ផស្ស បានបង្កើតទឹកលាងដៃសម្លាប់មេរោគដែលមានគុណភាព និងស្តង់ដារ ដើម្បីការពារនៃការឆ្លងមេរោគថ្មីនេះ ជូនដល់ប្រជាពលរដ្ឋ ពិសេសសិស្សានុសិស្សនៅសាលារៀន កុមារកំព្រា និងកុមារគរ-ថ្លង់ នៅតាមមណ្ឌលនានាឥតគិតថ្លៃ អស់ចំនួនជាង៥,០០០ដប ហើយ។

ស្ថាបនិករោងចក្រអិលអេសវី ដែលបង្កើតនូវផលិតផលសាប៊ូ OKA គ្រប់ប្រភេទរូបនេះ បានមានប្រសាសន៍ថា សម្រាប់អាជីវករគ្រប់រូប ថ្វីដ្បិតធ្វើអាជីវកម្មផ្សេងៗពីគ្នាក៏ពិតមែន ប៉ុន្តែគ្រប់រូបភាពនៃការធ្វើអាជីវកម្មទាំងនោះ មានគោលបំណងរួមគ្នាតែមួយគត់ គឺស្វែងរកនូវប្រាក់ចំណេញអតិប្បរិមាពីអាជីវកម្មរៀងៗខ្លួន។ ប៉ុន្តែអាជីវករ ដែលយកបញ្ហាសង្គមមកធ្វើជាឱកាសនៃអាជីវកម្មនានា ដើម្បីរកប្រាក់ចំណេញនោះ គឺត្រឹមតែជាអ្នកគ្មានទំនួលខុសត្រូវក្នុងសង្គមទេ តែថែមទាំងជាអ្នកបង្កើតភាពអគុណធម៌ក្នុងសង្គមទៀត។

នាយិកានៃក្រុមហ៊ុន OKA វ័យជាង៤០ឆ្នាំរូបនេះ បានបន្តនិយាយដោយសង្កត់ធ្ងន់យ៉ាងដូច្នេះ៖ «បើយើងមិនបានធ្វើអ្វីជួយដល់សង្គមពេលមានបញ្ហា សូមយើងកុំបង្កើតបញ្ហាបន្ថែមដល់សង្គម»។ បើតាមអ្នកស្រី សម្ផស្ស ក្នុងបរិបទដែលកម្ពុជា កំពុងខ្វះសម្ភារបង្ហារ និងទប់ស្កាត់នៃមេរោគCOVID-19នេះ ការផលិតបាននូវទឹកលាងដៃសម្លាប់មេរោគរបស់ក្រុមហ៊ុនអ្នកស្រី គឺឱកាសមាសប្រាក់ នៃទទួលបានប្រាក់ចំណេញដ៏ច្រើន ដោយយកផលិតផលដែលផលិតបាននោះដាក់លក់នៅលើទីផ្សារ ជាមួយនឹងតម្លៃទ្វេដង។ អ្នកស្រី បានបញ្ជាក់ដូច្នេះ៖«ខ្ញុំផលិត និងចែកចាយទឹកលាងដៃជាង៥ពាន់ដប ដែលមានចំណុះ ៦០មីលីលីត្រ ដោយឥតទទួលបានកម្រៃមកវិញសូម្បីតែមួយសេននេះ បើខ្ញុំសម្រេចដាក់លក់ទឹកលាងដៃនោះ នៅទីផ្សារបច្ចុប្បន្នវិញ ដោយគិតត្រឹមតម្លៃទាបបំផុត៣ដុល្លារក្នុងមួយដប ក៏ខ្ញុំទទួលបានប្រាក់១៥,០០០ដុល្លារដែរ។

លើសពីនេះទៅទៀត អ្នកស្រី នុត សម្ផស្ស មានឆន្ទៈក្នុងការផលិតទឹកលាងដៃសម្លាប់មេរោគ ចែកជូនដល់ពលរដ្ឋខ្មែរបន្ថែមទៀត សម្រាប់ការបង្ការខ្លួនពីមេរោគCOVID-19 ដែលកំពុងរាតត្បាតនេះ។ ជាមួយនឹងគ្នានេះ អ្នកស្រីក៏ផ្តល់ឱកាស និងលើកទឹកចិត្តដល់សហគ្រិននិងអ្នកមានទ្រព្យធននានា ដែលបំណងឱ្យក្រុមហ៊ុនOKAផលិតទឹកលាងដៃដែលមានគុណភាពសម្រាប់កម្មវិធីមនុស្សក្នុងសង្គម ក្រុមហ៊ុនOKA នឹងជួយផលិតដោយឥតគិតថ្លៃលើសេវាផលិតឡើយ ដើម្បីរួមគ្នាដោះស្រាយ និងទប់ស្កាត់បញ្ហាសង្គម ដែលបង្កឡើងដោយCOVID-19នេះ៕