ខណៈមេដឹកនាំលើជុំវិញពិភពលោកស្ទើរទាំងអស់ជាបុរសនោះ គេក៏ឃើញមានស្ត្រីកាន់តំណែងសំខាន់ និងកាច់ចង្កូតប្រទេសមួយចំនួនដែរ។ តំបន់អឺរ៉ុប ដែលមានការគោរពគោលការណ៍យេនឌ័រ និងការគោរពសិទ្ធិនារីបានប្រសើរនោះ ស្ត្រីត្រូវបានបោះឆ្នោតឲ្យកាន់តំណែងធំៗច្រើនជាងគេ ពិសេសមុខតំណែងនាយករដ្ឋមន្ត្រី។
១. ប្រធានគណៈកម្មការអឺរ៉ុប អឺស៊ុឡា វ៉ុន ដឺ លៃអេន (Ursula von der Leyen)៖ ស្ត្រីជនជាតិអាល្លឺម៉ង់រូបនេះ ក្លាយជាប្រធានគណៈកម្មការអឺរ៉ុបនៅឆ្នាំ ២០១៩ ។ លោកស្រីធ្លាប់ជារដ្ឋមន្ត្រីការពារជាតិអាល្លឺម៉ង់។
២. អធិការបតីអាល្លឺម៉ង់ អែនជែឡា មឺហ្គែល (Angela Merkel)៖ នរណាដែលថា មិនស្គាល់អធិបការបតីអាល្លឺម៉ង់ អែនជែឡា មឺហ្គែល នោះ។ អ្នកស្រីបានក្លាយជាអ្នកនយោបាយកាន់តំណែងអធិការបតីបានយូរជាងគេនៅអាល្លឺម៉ង់ គឺពីឆ្នាំ២០០៥ ដល់សព្វថ្ងៃ។
៣. នាយករដ្ឋមន្ត្រីហ្វាំងឡង់ Sanna Marin៖ អ្នកស្រី Marin ជាប់ឈ្មោះជានាយករដ្ឋមន្ត្រីកាន់តំណែងក្មេងជាងគេលើពិភពលោក បន្ទាប់ត្រូវបានសភាគាំទ្រក្នុងឆ្នាំ២០១៩ ។
៤. នាយករដ្ឋមន្ត្រីន័រវេស Erna Soldberg៖ អ្នកស្រី Soldberg កាន់តំណែងនាយករដ្ឋមន្ត្រីន័រវេសតាំងពីឆ្នាំ២០១៣មក។ អ្នកស្រីត្រូវបានផ្ដល់រហស្សនាមថា «Iron Erna» ស្រដៀងនឹងអតីតនាយករដ្ឋមន្ត្រីអង់គ្លេស Margaret Thatcher «The Iron Lady»។
៥. នាយករដ្ឋមន្ត្រីស៊ែប៊ី Ana Brnabić៖ ជានាយករដ្ឋមន្ត្រីស៊ែប៊ីតាំងពីឆ្នាំ២០១៧ មក អ្នកស្រី Ana ស្ត្រីទីមួយកាន់តំណែងប្រមុខរដ្ឋាភិបាលដែលស្រឡាញ់ភេទដូចគ្នា។
៦. នាយករដ្ឋមន្ត្រីដាណឺម៉ាក Mette Frederiksen៖ អ្នកស្រី Frederiksen ដឹកនាំដាណឺម៉ាកតាំងពីឆ្នាំ ២០១៩ មក។ ក្នុងវ័យ៤២ឆ្នាំ អ្នកស្រីជានាយករដ្ឋមន្ត្រីក្មេងជាងគេក្នុងប្រវត្តិប្រទេស និងជានាយករដ្ឋមន្ត្រីស្ត្រីទីពីរផង។
៧. នាយករដ្ឋមន្ត្រីអ៊ីស្លង់ Katrín Jakobsdóttir ៖ ជានាយករដ្ឋមន្ត្រីចាប់ពីឆ្នាំ ២០១៧ ដល់បច្ចុប្បន្ន អ្នកស្រី Jakobsdóttir ជានាយករដ្ឋមន្ត្រីទី២៨ របស់បប្រទសកោះអ៊ីស្លង់។
៨. នាយករដ្ឋមន្ត្រី បែលហ្សិក Sophie Wilmès៖ អ្នកស្រី Wilmes ដឹកនាំរាជាណាចក្របែលហ្ស៊ិកតាំងពីឆ្នាំ២០១៩ មក ក្នុងនាមជានាយករដ្ឋមន្ត្រីចាំផ្ទះ ខណៈដែលបក្សនយោបាយនានាកំពុងចរចារៀបចំបង្កើតរដ្ឋាភិបាលថ្មី។
៩. ប្រធានាធិបតីអេស្តូនី Kersti Kaljulaid៖ អ្នកស្រី Kaljulaid ក្លាយជាប្រធានាធិបតីអេស្តូនីចាប់ពីឆ្នាំ២០១៦ មក។ អ្នកស្រីជាស្ត្រីទីមួយកាន់តំណែងនេះគិតតាំងពីការប្រកាសឯករាជ្យនៅឆ្នាំ១៩១៨។
១០. ប្រធានាធិបតីហ្សកហ្ស៊ី Salome Zurabishvili៖ អ្នកស្រី Zurabishvili ជាប្រធានាធិបតីស្ត្រីទីមួយហ្សកហ្ស៊ី ចាប់ឆ្នាំ២០១៨ មក។
១១. ប្រធានាធិបតីស្លូវ៉ាគី Zuzana Čaputová ៖ អ្នកស្រី Čaputová កាន់តំណែងប្រធានាធិបតីចាប់ពីឆ្នាំ២០១៩ មក៕