COVID-19៖ សរុបរួមនៅកូរ៉េខាងត្បូង អ៊ីតាលី និងអ៊ីរ៉ង់ មានដល់ជាង២១០០០ករណី

COVID-19

អន្តរជាតិ

COVID-19៖ សរុបរួមនៅកូរ៉េខាងត្បូង អ៊ីតាលី និងអ៊ីរ៉ង់ មានដល់ជាង២១០០០ករណី

09, Mar 2020 , 10:50 am

រូបភាព

បុរសម្នាក់ពាក់ម៉ាស់ ដើរកាត់ព្រះវិហារShincheonji កូរ៉េខាងត្បូង, រូបភាព៖ AFP

ដោយ: ធៀន ភារិន្ទ

គិតត្រឹមថ្ងៃទី៨ ខែមីនា តួលេខសរុបនៃការឆ្លងជំងឺផ្លូវដង្ហើមបង្កដោយកូរ៉ូណាវីរុស (COVID-19) នៅកូរ៉េខាងត្បូង អ៊ីតាលី និងអ៊ីរ៉ង់ មានលើស២១០០០ករណី។ ជាប្រទេសមានការរាលដាលខ្លាំងក្នុងតំបន់នីមួយៗ កូរ៉េខាងត្បូង បានរកឃើញករណីឆ្លងជាង ៧ពាន់ករណី អ៊ីតាលីជាង ៧ពាន់ករណី និង អ៊ីរ៉ង់រកឃើញជាង ៦ពាន់ករណី។

ជាប្រទេសនៅតំបន់អាស៊ីខាងកើត កូរ៉េខាងត្បូង បានរកឃើញករណីឆ្លង COVID-19 ជាបន្តបន្ទាប់ និងច្រើនជាងគេបំផុត បន្ទាប់ចិន។ បើតាមការចុះផ្សាយនៅថ្ងៃទី៩ ខែមីនា របស់ទីភ្នាក់ងារព័ត៌មាន Yonhap កូរ៉េខាងត្បូង បានរកឃើញករណីឆ្លងCOVID-19 ចំនួន ២៤៨ករណីបន្ថែមទៀត។ ការណ៍នេះ បានធ្វើឲ្យCOVID-19 នៅកូរ៉េខាងត្បូងកើនដល់ ៧៣៨២ករណី ខណៈពេលអ្នកស្លាប់ បានកើនដល់៥៣ករណី និងអ្នកជាសះស្បើយ ១៦៦ករណី។

ចំណែកនៅប៉ែកខាងអឺរ៉ុបវិញ អ៊ីតាលី ត្រូវបានគេមើលឃើញថាមានករណីឆ្លង និងស្លាប់ច្រើនជាងគេបំផុតនៅក្នុងតំបន់។ ត្រឹមតែថ្ងៃទី៨ ខែមីនាមួយប៉ុណ្ណោះ អ៊ីតាលីរកឃើញករណីឆ្លងរហូតដល់ ១៤៩២ករណី និងអ្នកស្លាប់ ១៣៣ករណីឯណោះ។ តួលេខឆ្លងសរុបនៅអ៊ីតាលី មានករណីCOVID-19 មាន៧៣៧៥ករណី និងអ្នកស្លាប់ ៣៦៦ករណី។ ចំណែកអ្នកជាសះស្បើយនៅក្នុងប្រទេសមួយនេះ ក៏មានការកើនឡើងគួរឲ្យកត់សម្គាល់ផងដែរ ពោលគឺមានចំនួន ៦២២ករណី។

ជាប្រទេសស្ថិតនៅក្នុងតារាងទី៤នៃប្រទេសរកឃើញ COVID-19 ច្រើនជាងគេ អ៊ីរ៉ង់ ក៏ត្រូវបានអុកឡុកដោយ COVID-19 យ៉ាងខ្លាំងផងដែរ។ ក្នុងថ្ងៃទី៨ ខែមីនា អ៊ីរ៉ង់បានរកឃើញអ្នកឆ្លងCOVID-19 ៧៤៣ករណី និងករណីស្លាប់ ៤៩ករណី។ ការណ៍នេះ បានធ្វើឲ្យករណីឆ្លងសរុបនៅក្នុងប្រទេសកើនដល់៦៥៦៦ករណី។ ក្នុងចំនួនជាង ៦ពាន់ករណីនេះ អ្នកស្លាប់រហូតដល់ ១៩៤ករណី និងអ្នកជាសះស្បើយចំនួន ២១៣៤ករណីឯណោះ។

តាមអនុសាសន៍របស់អង្គការសុខភាពពិភពលោក ដើម្បីបង្ការការឆ្លងពីCOVID-19 ប្រជាជនទាំងអស់ ត្រូវពាក់ម៉ាស់ លាងដៃឲ្យបានញឹកញាប់ជាមួយសាប៊ូ ឬទឹកលាងដៃ មិនត្រូវយកដៃទៅប៉ះពាល់មុខញឹកញាប់ពេក និងវិធានការការពារផ្សេងៗទៀត។ ជាពិសេស ប្រសិនបើមានរោគសញ្ញាណាមួយមិនប្រក្រតី ដូចជាក្តៅខ្លួនលើសពី ៣៧អង្សារ ក្អក កណ្តាស់ ឬហៀរសម្បោរច្រើនថ្ងៃជាដើម ត្រូវទៅមន្ទីរពេទ្យជាបន្ទន់៕