ជាតិ
សេដ្ឋកិច្ច
ផ្លូវជាតិលេខ៥៥ ឈ្មោះក្រៅផ្លូវ«បុប្ផាលាក់ខ្លួន»ភ្ជាប់ពីទីរួមខេត្តពោធិ៍សាត់ ទៅព្រំដែនថៃបានដំណើរការហើយ
ផ្លូវជាតិលេខ៥៥ ដែលជាង១៨០គីឡូម៉ែត្រ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅព្រំដែនថ្មដា ជាប់ជាមួយខេត្តត្រាត នៃប្រទេសថៃ។ រូបថត៖ ទំព័រហ្វេសប៊ុក ក្រសួងសាធារណៈការ និងដឹកជញ្ជូន៕
×![]()
ភ្នំពេញ៖ ផ្លូវជាតិលេខ៥៥ ដែលបានចំណាយថវិកាជាង១៣០លានដុល្លារ ពីរដ្ឋាភិបាលនៃប្រទេសចិន បានដាក់ឱ្យដំណើរការជាផ្លូវការ នាព្រឹកថ្ងៃទី៩មីនា ឆ្នាំ២០២០។ ផ្លូវនេះ មានប្រវែងសរុប១៨២,១៦គីឡូម៉ែត្រ ដោយតភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅព្រំដែនថ្មដា ជាប់ជាមួយខេត្តត្រាត នៃប្រទេសថៃ ដែលពីមុនមានឈ្មោះជាផ្លូវអន្ទង់អាំង ត្រូវបានប្តូរទៅជាឈ្មោះផ្លូវ«បុប្ផាលាក់ខ្លួន» វិញ។
ក្នុងពិធីដាក់ឱ្យដំណើរការផ្លូវជាតិលេខ៥៥ លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បាននិយាយប្រាប់ដល់ក្រុមអ្នកសារព័ត៌មាន ថា ផ្លូវនេះត្រូវបានសាងសង់ស្របទៅតាមស្តង់ដារផ្លូវថ្នល់កម្រិត៣ នៃបទដ្ឋានបច្ចេកទេសរបស់សាធារណរដ្ឋប្រជាមានិតចិន ដែលមានទទឹងតួផ្លូវសរុប៩ម៉ែត្រ ក្រាលកៅស៊ូពីរស្រទាប់ប្រភេទ(DBST) ក្នុងទំហំទទឹង ៨ម៉ែត្រ។
ការសាងសង់ផ្លូវជាតិលេខ៥៥នេះ បានចំណាយរយៈពេលអស់ជាង៣ឆ្នាំ ពោលគឺចាប់ពីខែមីនាឆ្នាំ២០១៥ ដល់ខែឧសភាឆ្នាំ២០១៨។ នេះជាការលើកឡើងរបស់លោក ស៊ុន ចាន់ថុល ដោយលោកបានបញ្ជាក់ដូច្នេះ ផ្លូវនេះចំណាយថវិកាសាងសង់សរុប១៣២.៨០លានដុល្លារ ជាហិរញ្ញប្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភណ្ឌមិនទាន់ផ្ទុះ ពន្ធអាករផ្សេងៗ។
រដ្ឋមន្ត្រីក្រសួងសាធារណៈការ បានបន្តថា ផ្លូវជាតិលេខ៥៥ អាចចាត់ទុកថាជាផ្លូវដំបូងគេនៅកម្ពុជា ដែលបានសាងសង់បត់បែនឆ្លងកាត់តាមភ្នំនិងព្រៃព្រឹក្សាខ្ពស់ទៀតតាមជួរភ្នំក្រវ៉ាញ។ លោក ស៊ុន ចាន់ថុល បានបញ្ជាក់ថា ផ្លូវនេះ នឹងជួយសម្រួលដល់ការតភ្ជាប់ទំនាក់ទំនងគមនាគមន៍ រវាងខេត្តពោធិ៍សាត់ ខេត្តបាត់ដំបង និងខេត្តកោះកុង ក៏ដូចជាការធ្វើសមាហរណកម្មនានាក្នុងប្រទេស ជាមួយតំបន់ ដោយ សំដៅចូលរួមចំណែកលើកកម្ពស់ប្រសិទ្ធភាព នៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និងទេសចរណ៍ បានឆាប់រហ័ស និងចំណាយតិច។ ជាពិសេសជាមួយប្រទេសជិតខាង តាមរយៈច្រកទ្វារព្រំដែនកម្ពុជា-ថៃ នៅថ្មដា ខេត្តពោធិ៍សាត់ នៅចាំយាម ខេត្តកោះកុង និងកំពង់ផែសមុទ្រទឹកជ្រៅរបស់យើង នៅខេត្តព្រះសីហនុ និងខេត្តកោះកុង៕
Tag:
ផ្លូវជាតិ
© រក្សាសិទ្ធិដោយ thmeythmey.com
