អន្តរជាតិ
អាស៊ាន បន្តចែករំលែកបទពិសោធឲ្យទីម័រខាងកើត មុនចូលជាសមាជិកថ្មី រូបភាព Vietnam News
× សមាជិកសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន នៅតែបន្តគាំទ្រ និងចែករំលែកបទពិសោធជាមួយនឹងទីម័រខាងកើត សម្រាប់សំណើសុំចូលជាសមាជិកអាស៊ាន ក៏ដូចជាការវាយតម្លៃលើសមត្ថភាព និងភាពរួចរាល់របស់ប្រទេស។ ការណ៍ដែលអាស៊ាន ធ្វើបែបនេះ ក៏ដោយសារតែមើលឃើញថា ទីម័រខាងកើត នៅមានចំណុចច្រើន ត្រូវបំពេញមុនចូលជាគ្រួសាររបស់អាស៊ានជាផ្លូវការ។
នាកិច្ចប្រជុំក្រុមប្រឹក្សាការងារសម្របសម្រួលរបស់អាស៊ានលើកទី៩ នៅថ្ងៃទី ៦ មីនាកន្លងទៅ លោកអនុរដ្ឋមន្ត្រីការបរទេសវៀតណាម Nguyễn Quốc Dũng បានអះអាងថា ក្រុមការងាររបស់អាស៊ាន បានមានកិច្ចពិភាក្សាយ៉ាងសកម្មមួយលើការពង្រឹងសមត្ថភាពរបស់ទីម័រខាងកើត ក្នុងការក្លាយជាសមាជិកថ្មីរបស់អាស៊ាន។ នេះបើយោងតាមការចុះផ្សាយរបស់សារព័ត៌មាន Vietnam News។
តាមប្រភពព័ត៌មានដដែលនោះ លោកអនុរដ្ឋមន្ត្រី និងជាប្រធានអង្គប្រជុំ បានស្នើឲ្យក្រុមការងារជំនាញរបស់អាស៊ាន សិក្សា និងពិនិត្យលើផលប៉ះពាល់ដែលអាចកើតមានដោយសារតែការសុំចូលជាសមាជិកភាពរបស់ទីម័រខាងកើត។ លោក ក៏បានសុំឲ្យក្រុមការងារជំនាញវាយតម្លៃស្ថានភាពរបស់ទីម័រខាងកើត ដោយឈរលើសសរស្តម្ភបី គឺ នយោបាយ និងសន្តិសុខ សេដ្ឋកិច្ច និងវប្បធម៌។
តាមមន្ត្រីការទូតជាន់ខ្ពស់របស់វៀតណាមរូបនេះ មកទល់ពេលនេះ សមាជិកអាស៊ាន បានឯកភាពគ្នាលើរបាយការណ៍ស្តីពីនយោបាយ និងសន្តិសុខរបស់ទីម័រខាងកើត ហើយអ្វីដែលសេសសល់នោះគឺ ក្រុមការងារបច្ចេកទេស នឹងបន្តវាយតម្លៃលើសមត្ថភាព និងភាពរួចរាល់របស់ទីម័រខាងកើតក្នុងក្របខណ្ឌសេដ្ឋកិច្ច និងវប្បធម៌វិញម្តង មុនពេលដាក់សំណើចុងក្រោយទៅកាន់មេដឹកនាំអាស៊ានពិនិត្យ និងសម្រេច។
គួរជម្រាបបន្តិចថា ទីម័រខាងកើត គឺជារដ្ឋក្មេងខ្ចីជាងគេនៅក្នុងតំបន់អាស៊ីអាគ្នេយ៍។ ទីម័រខាងកើត បានដាក់សំណើផ្លូវការសុំចូលជាសមាជិកអាស៊ាននៅឆ្នាំ២០១១។ ទីម័រខាងកើត ធ្លាប់បានបង្ហាញក្តីរំពឹងថាត្រូវបានអាស៊ានបញ្ចូលជាសមាជិកផ្លូវការតាំងពីឆ្នាំ២០១៧មកម្ល៉េះ ក៏ប៉ុន្តែជាក់ស្តែងនោះ រដ្ឋអាស៊ានមួយចំនួន មិនទាន់អាចទទួលយកទីម័រខាងកើតបានឡើយ ដ្បិតប្រទេសនេះ នៅមានគម្លាតឆ្ងាយជាមួយនឹងសមាជិកចាស់ទាំងសេដ្ឋកិច្ច និងសន្តិសុខ៕
Tag:
ទីម័រខាងកើត
វៀតណាម
អាស៊ាន
© រក្សាសិទ្ធិដោយ thmeythmey.com