COVID-19៖ ចិន នឹងបើកសាលារៀនខ្លះ ជើងហោះហើរ និងកន្លែងកម្សាន្តឡើងវិញ

COVID-19

អន្តរជាតិ

COVID-19៖ ចិន នឹងបើកសាលារៀនខ្លះ ជើងហោះហើរ និងកន្លែងកម្សាន្តឡើងវិញ

09, Mar 2020 , 9:59 pm

រូបភាព

Shanghai Disneyland បានបិទទ្វារនាថ្ងៃទី២៥ ខែមករា, រូបភាព៖ Reuters

ដោយ: ធៀន ភារិន្ទ

ស្របពេលស្ថានភាពកាន់តែធូរស្រាល ចិនចាប់ផ្ដើមបន្ធូរបន្ថយការរឹតត្បិតខ្លះ។ គិតត្រឹមថ្ងៃទី៨ ខែមីនា ចិន បានបិទមន្ទីរពេទ្យសម្រាប់ព្យាបាលអ្នកជំងឺCOVID-19 មួយចំនួនបណ្តោះអាសន្នសិននៅវូហាន បន្ទាប់អស់អ្នកជំងឺព្យាបាល។ មិនត្រឹមតែបិទមន្ទីរពេទ្យទេ ចិនក៏ត្រៀមបើកសាលារៀននៅតាមខេត្តមួយចំនួន បើកជើងហោះហើរខ្លះ និងកន្លែងកម្សាន្តដោយផ្នែកឡើងវិញផងដែរ។ នេះត្រូវបានគេមើលឃើញថា គឺជាសញ្ញាវិជ្ជមានមួយ។

ក្នុងរយៈពេលពីរថ្ងៃចុងក្រោយ ស្ថានភាពCOVID-19 នៅចិន មានករណីឆ្លងក្នុងប្រទេសត្រឹមតែជាង ៤០ករណីប៉ុណ្ណោះក្នុងមួយថ្ងៃ។ ការណ៍នេះ គឺជាចំនួនធ្លាក់ចុះមកតិចបំផុត បើគិតចាប់ពីថ្ងៃទី២០ ខែមករាកន្លងមក។ ចំណែកករណីស្លាប់វិញ ក្នុងថ្ងៃទី៨ ខែមីនា ចិនមានត្រឹមតែ ២៧ករណី។

ខណៈដែលស្ថានភាព COVID-19 នៅចិនមានភាពធូរស្បើយ ក្រុមហ៊ុន សាលារៀន កន្លែងកម្សាន្ត បើកដំណើរការឡើងវិញ។ បើតាមការអះអាងរបស់កន្លែងកម្សាន្ត Disney នាទីក្រុងសៀងហៃ ក្រុមហ៊ុននេះ បានបើកដំណើរការតំបន់លក់ទំនិញ និងកន្លែងកម្សាន្ត រួមជាមួយសណ្ឋាគារ និងឧទ្យានឡើងវិញហើយ។ ចំណែកផ្នែកដែលមានការជិះលេងកម្សាន្ត នៅតែបន្តបិទដដែល។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

ចំណែកក្រុមហ៊ុនអាកាសចរណ៍ឯណោះវិញ ក៏ត្រៀមបើកដំណើរការជើងហោះរបស់ខ្លួនឡើងវិញផងដែរ បន្ទាប់ពីផ្អាកមួយរយៈ។ ក្រុមហ៊ុន Hubei Airport Group បានបញ្ជាឲ្យអាកាសយានដ្ឋាននៅតាមខេត្តទាំងអស់បើកដំណើរការឡើងវិញ។ នេះគឺជាសញ្ញាមួយ ដែលអាចបង្ហាញថាក្រុមហ៊ុនអាកាសចរទាំងនោះ កំពុងរៀបចំការហោះហើរឡើងវិញ។

បន្ថែមពីលើនេះ ក្រុមហ៊ុនគ្រឿងសង្ហារិម Ikea របស់ស៊ុយអែត ក៏បានបើកសាខាលក់គ្រឿងសង្ហារិមរបស់ខ្លួនចំនួន ១៦ឡើងវិញផងដែរ ប៉ុន្តែត្រឹមរយៈពេលខ្លីប៉ុណ្ណោះ បន្ទាប់ពីផ្អាកដំណើរការតាំងពីចុងខែមករាកន្លែងមក។

មិនត្រឹមតែក្រុមហ៊ុនឯកជនប៉ុណ្ណោះទេដែលបើកដំណើរការខ្លះៗ ប៉ុន្តែសាលារៀន ក៏បានបើកទ្វារឲ្យសិស្សសាលាចូលរៀនផងដែរ។ បើតាមសេចក្តីប្រកាសរបស់ខេត្ត Qinghai នាចុងខែកុម្ភៈ វិទ្យាល័យ និងសាលាបណ្តុះបណ្តាលជំនាញ នឹងបើកឲ្យសិស្សចូលរៀនវិញនៅថ្ងៃទី៩ ខែមីនានេះ។ ចំណែកអនុវិទ្យាល័យ នឹងបើកដំណើរការនៅពេលក្រោយ។ ចំណែកនៅខេត្តGuizhou វិញ អនុវិទ្យាល័យ វិទ្យាល័យ នឹងបើកទ្វានៅថ្ងៃទី១៦ ខែមីនាខាងមុខ។

គិតត្រឹមថ្ងៃទី៨ ខែមីនា ចិនបានបិទមន្ទីរពេទ្យសម្រាប់ព្យាបាលអ្នកជំងឺCOVID-19 មួយចំនួន ដោយសារតែអស់អ្នកជំងឺ។ ក្នុងចំណោមមន្ទីរពេទ្យចំនួន១៦នាទីក្រុងវូហាន ចិនបានបិទចំនួន ១១កន្លែង។ សូមបញ្ជាក់ថា ចិនបានយកពហុកីឡាដ្ឋាន សាលារៀន រោងចក្រ មជ្ឈមណ្ឌលកីឡា យកមកធ្វើជាមន្ទីរពេទ្យសម្រាប់ព្យាបាលអ្នកជំងឺ COVID-19 នាអំឡុងពេលចិនកំពុងតែវឹកវរខ្លាំងដោយសារកូរ៉ូណាវីរុស៕