ភ្នំពេញ៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ចាត់ទុក ការប្រារព្ធពិធីអបអរសាទរទិវា «ASEM Day» នៅឆ្នាំ២០២០នេះ «ពិតជាពិសេស និងវិសេសវិសាលបំផុត» សម្រាប់កម្ពុជា។ ត្រង់នេះ លោកប្រមុខការទូតកម្ពុជារូបនេះ អះអាងថា ហេតុផលនោះ កម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣(ASEM13) នៅរាជធានីភ្នំពេញនៅថ្ងៃទី១៦-១៧ ខែវិច្ឆិកា ឆ្នាំ២០២០។
ថ្លែងសុន្ទរកថាក្នុងឱកាសសាទរទិវា «ASEM DAY» នាថ្ងៃ១០ ខែមីនា នៅទីធ្លារមុខវត្តបុទុមវត្តី លោក ប្រាក់ សុខុន មានប្រសាសន៍ដូច្នេះថា៖«ការប្រារព្ធទិវា ASEM Day ថ្ងៃនេះ គឺជាការបង្ហាញពីការត្រៀមខ្លួន និងការប្តេជ្ញាចិត្តខ្ពស់បំផុតរបស់កម្ពុជា ក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣»។
នៅចំពោះមុខអ្នកចូលរួមរាប់រយនាក់ដែលភាគច្រើនជាយុវជន លោកឧបនាយករដ្ឋមន្ត្រី ប្រាក់ សុខុន គូសបញ្ជាក់ទៀតថា ក្រៅពីគោលបំណងលើកកម្ពស់ការយល់ដឹងពីសារសំខាន់របស់ជំនួបកំពូល ASEM និងព្រឹត្តិការណ៍ទាំងអស់ពាក់ព័ន្ធនឹង ASEM ដែលកម្ពុជារៀបចំធ្វើក្នុងឆ្នាំនេះ ព្រឹត្តិការណ៍នេះ គឺពាក់ព័ន្ធជាពិសេសដល់យុវជន។ លោក សង្កត់ធ្ងន់ថា៖«យុវជនគឺជាអនាគតរបស់យើង កាលណាពួកគេចាប់បានឱកាសនៃភាពជាដៃគូអាស៊ី-អឺរ៉ុបនេះកាន់តែឆាប់ នោះពួកគេនឹងត្រៀមខ្លួនកាន់តែប្រសើរដើម្បីធានានូវ អនាគតដ៏វែងឆ្ងាយរបស់ពួកគេដែលទៅហួសពីព្រំដែនកម្ពុជាទៅទៀត»។
ថ្លែងក្នុងសុន្ទរកថាដដែលនេះ លោករដ្ឋមន្ត្រី ប្រាក់ សុខុន ក៏បានលើកឡើងពីបញ្ហាដែលពិភពលោកកំពុងជួបប្រទះ ហើយនោះគឺជា ការរាតត្បាតនៃជំងឺ COVID-19 ។ លោក ថ្លែងដូច្នេះថា ខណៈពិភពលោកកំពុងរវល់ទប់ស្កាត់ការរីករាលដាលនៃជំងឺ COVID-19 សន្និសីទជាច្រើនដែលបានគ្រោងរៀបចំទុកជាមុនអស់ជាច្រើនខែនៅតាមតំបន់នានាទូទាំងពិភពលោក ត្រូវបានលុបចោល ឬពន្យារពេល ដោយសារការភ័យខ្លាចនៃជំងឺផ្លូវដង្ហើមនេះ។
លោក ប្រាក់ សុខុន រដ្ឋមន្ត្រីការបរទេស មើលស្តង់វិទ្យាស្ថានចក្ខុវិស័យអាស៊ី ហៅកាត់ថា «AVI»
ម្យ៉ាងវិញទៀត លោករដ្ឋមន្ត្រី លើកឡើងថា មកដល់ពេលនេះប្រទេសកម្ពុជា ជួបប្រទះករណី COVID-19 តិចតួចបំផុត (២ករណីប៉ុណ្ណោះ ហើយក្នុងនោះម្នាក់ជាសះស្បើយ) ក៏ប៉ុន្តែរដ្ឋាភិបាល កំពុងចាត់វិធានការយ៉ាងប្រុងប្រយ័ត្នទុកជាមុន ដើម្បីប្រយុទ្ធប្រឆាំងនឹងបញ្ហានេះ ហើយក៏កំពុងសហការយ៉ាងជិតដិតជាមួយអង្គការសុខភាពលំដាប់ពិភពលោកនានាផងដែរ។
សូមបញ្ជាក់ថា កិច្ចប្រជុំកំពូលអាស៊ី-អឺរ៉ុប (ASEM) ត្រូវបានបង្កើតឡើងក្នុងឆ្នាំ១៩៩៦ ដើម្បីជំរុញកិច្ចសន្ទនា និងកិច្ចសហប្រតិបត្តិការរវាងអាស៊ី និងអឺរ៉ុប។ បច្ចុប្បន្ននេះ ASEM មានដៃគូចំនួន៥៣ ក្នុងនោះមាន២១ប្រទេសមកពីអាស៊ី និង៣០ប្រទេសមកពីអឺរ៉ុប ព្រមទាំងអគ្គលេខាធិការដ្ឋានអាស៊ាន និងសហភាពអឺរ៉ុប ជារួម ប្រទេសដៃគូ ASEM តំណាងឲ្យ ៦៥ភាគរយ នៃសេដ្ឋកិច្ចពិភពលោក, ៦០ភាគរយនៃប្រជាជនពិភពលោក, ៥៥ភាគរយនៃពាណិជ្ជកម្មពិភពលោក និង ៧៥ភាគរយ នៃទេសចរណ៍ពិភពលោក។ កម្ពុជា បានក្លាយជាដៃគូរបស់ ASEM ចាប់តាំងពីឆ្នាំ២០០៤មកម្ល៉េះ។
ASEM បានដើរតួនាទីយ៉ាងសំខាន់ក្នុងការលើកកម្ពស់ភាពជាដៃគូ និងកិច្ចសហប្រតិបត្តិការអាស៊ី-អឺរ៉ុបដើម្បីលើកកម្ពស់សន្តិភាព វិបុលភាពសេដ្ឋកិច្ច និងវឌ្ឍនភាព សង្គម។ ហើយ ASEM បានក្លាយជាគ្រឹះដ៏សំខាន់មួយនៃប្រព័ន្ធពហុភាគីនិយម និងអភិបាលកិច្ចសកល។ នេះបើតាមលោក ប្រាក់ សុខុន។
សម្រាប់ជំនួបកំពូលអាស៊ី-អឺរ៉ុបលើកទី១៣ ដែលកម្ពុជានឹងធ្វើជាម្ចាស់ផ្ទះនេះ វាមានមូលបទថា «ការពង្រឹងពហុភាគីនិយម ដើម្បីកំណើនរួមគ្នា»។ បើតាមលោករដ្ឋមន្ត្រី មូលបទនេះផ្តោតសំខាន់លើការរួមបញ្ចូលគ្នានៃទស្សនៈសំខាន់ៗចំនួនបួនគឺ ពហុភាគីនិយម កំណើនការអភិវឌ្ឍប្រកបដោយ ចីរភាព និងវិបុលភាព ដែលនឹងរួមចំណែកពង្រឹងភាពជាដៃគូអាស៊ី-អឺរ៉ុប ដើម្បីធានាថា ពហុភាគីនិយមនាំមកនូវកំណើនប្រកបដោយបរិយាប័ន្ន និងវិបុលភាពរួម។
បើតាមការរំពឹងទុករបស់រដ្ឋាភិបាលកម្ពុជា កិច្ចប្រជុំកំពូលអាស៊ី-អឺរ៉ុបលើកទី១៣នេះ នឹងជំរុញបំណង ប្រាថ្នា និងអត្ថប្រយោជន៍រួមរបស់ដៃគូ ASEM ទាំងអស់បន្ថែមទៀតឱ្យបន្តផ្តោតលើការកសាង ភាពជាដៃគូអាស៊ី-អឺរ៉ុបដ៏រឹងមាំ រស់រវើក និងគ្រប់ជ្រុងជ្រោយ។
ក្រៅពីជំនួបកំពូលអាស៊ី-អឺរ៉ុបលើកទី១៣នេះ កម្ពុជាក្នុងនាមជាម្ចាស់ផ្ទះ ក៏នឹងរៀបចំព្រឹត្តិការណ៍អមផ្សេងៗជាច្រើន ពេញមួយឆ្នាំតែម្តង។ ព្រឹត្តិការណ៍ទាំងអស់នោះរួមមាន ៨ធំៗ នោះគឺ ១)កិច្ចប្រជុំភាពជាដៃគូសភាអាស៊ី-អឺរ៉ុប ២)វេទិកាធុរកិច្ចនិងសេដ្ឋកិច្ចអាស៊ី-អឺរ៉ុប ៣)កិច្ចប្រជុំ កំពូលនៃអ្នកដឹកនាំវ័យក្មេងរបស់មូលនិធិអាស៊ី-អឺរ៉ុប ៤)កិច្ចពិភាក្សាតុមូលអ្នកនិពន្ធនៃមូលនិធិអាស៊ី-អឺរ៉ុប ៥)វេទិកាការងារអាស៊ី-អឺរ៉ុប ៦)វេទិកាប្រជាជនអាស៊ី-អឺរ៉ុបនិង ៧)មហោស្រពវប្បធម៌ អាស៊ី-អឺរ៉ុប និង ៨) វេទិកាស្តីពីស្ត្រីក្នុងការរក្សាសន្តិភាពនិងសន្តិសុខ៕