ជាតិ
សង្គមជាតិ
ប្រមុខរដ្ឋាភិបាល ប្រាប់ឲ្យពិនិត្យសុខភាពជនបរទេសឲ្យច្បាស់លាស់ មុនចូលកម្ពុជា
× ពីធិធីប្រគល់សញ្ញាបត្រជូននិស្សិតនៃវិទ្យាស្ថានវ៉ាន់ដា នៅមជ្ឈមណ្ឌលកោះពេជ្រ នាព្រឹកថ្ងៃទី១០ ខែមីនា ឆ្នាំ២០២០ សម្តេចនាយករដ្ឋមន្ត្រី ហ៊ុន សែន បានណែនាំអាជ្ញាធរ ឲ្យប្រើក្បួនវេជ្ជសាស្ត្រច្បាស់លាស់ ក្នុងការពិនិត្យសុខភាពភ្ញៀវបរទេស ដូចជាការពិនិត្យកម្ពៅជាដើម មុននឹងអនុញ្ញាតឲ្យពួកគេ ឈានជើងចូលទឹកដីកម្ពុជា។
ប្រមុខរដ្ឋាភិបាល ថ្លែងដូច្នេះថា៖«គ្រប់ច្រកទាំងអស់របស់យើង យើងត្រូវមានការរឹតបន្តឹងអំពីផ្នែកវេជ្ជសាស្ត្រ ដែលអង្គការសុខភាពពិភពលោកតម្រូវ»។ យ៉ាងណា មេដឹកនាំកម្ពុជា បញ្ជាក់ថា ការរឹតបន្តឹងតាមព្រលានយន្តហោះនិងតាមច្រកព្រំដែននេះ មិនមែនជាការរើសអើងជនបរទេសឡើយ។
សំឡេង៖
កម្ពុជា ទើបនឹងរកឃើញជនជាតិខ្លួនម្នាក់នៅខេត្តសៀមរាប បានឆ្លងវីរុសកូវីដ-១៩ ពីបុរសជនជាតិជប៉ុន ដែលជាថៅកែ។ បច្ចុប្បន្ន បុរសខ្មែរ ដែលឆ្លងកូវីដ-១៩នោះ ត្រូវបានដាក់ឲ្យស្ថិតក្នុងបន្ទប់ព្យាបាលដាច់ដោយឡែកពីគេ។ កាលពីចុងខែមករា ឆ្នាំ២០២០ កម្ពុជា ក៏បានរកឃើញជនជាតិចិនម្នាក់ដែរ ដែលផ្ទុកវីរុសកូវីដ-១៩ តែគាត់ បានជាសះស្បើយឡើងវិញ។
នៅយប់ថ្ងៃទី១០ ខែមីនា ឆ្នាំ២០២០នេះ រដ្ឋមន្ត្រីក្រសួងសុខាភិបាល បានប្រកាសថា កម្ពុជារកឃើញអ្នកឆ្លងវីរុសកូវីដ-១៩ម្នាក់ទៀត នៅកំពង់ចាម គឺស្ត្រីជនជាតិអង់គ្លេសអាយុ៦៥ឆ្នាំ។ គាត់ ធ្វើដំណើរតាមជើងហោះហើរ ចេញពីទីក្រុងឡុងដ៍ ចូលមកទីក្រុងហាណូយ បន្ទាប់មកគាត់ ចូលទីក្រុងហូជីមិញ ហើយក៏ឡើងលើនាវាមួយ ចេញពីទីក្រុងហូជីមិញ មកកម្ពុជា នៅថ្ងៃទី៧កុម្ភៈ៕
© រក្សាសិទ្ធិដោយ thmeythmey.com