ឥណ្ឌូណេស៊ី ចាប់មនុស្ស៦នាក់ក្រោយចែកចាយព័ត៌មានក្លែងក្លាយពី COVID-19 លើបណ្ដាញសង្គម

COVID-19

អន្តរជាតិ

ឥណ្ឌូណេស៊ី ចាប់មនុស្ស៦នាក់ក្រោយចែកចាយព័ត៌មានក្លែងក្លាយពី COVID-19 លើបណ្ដាញសង្គម

10, Mar 2020 , 9:39 pm

រូបភាព

ប្រភពរូប៖ AFP

ដោយ:

ជនជាតិឥណ្ឌូណេស៊ី ៦ នាក់ ត្រូវបានចាប់ខ្លួនក្រោយចែកចាយព័ត៌មានក្លែងក្លាយតាមអនឡាញជុំវិញជំងឺផ្លូវដង្ហើមកូរ៉ូណា COVID-19 ។ សមត្ថកិច្ចឥណ្ឌូណេស៊ី បញ្ជាក់បែបនេះ នៅថ្ងៃអង្គារ ១០ ខែមីនា ខណៈករណីឆ្លងជំងឺ COVID-19 របស់ប្រជាជាតិអាស៊ីអាគ្នេយ៍មួយនេះបន្តកើនឡើង។

ស្ត្រីម្នាក់ក្នុងទីក្រុង Surabaya ដែលទីក្រុងធំបំផុតលំដាប់ទី២របស់ឥណ្ឌូណេស៊ី ត្រូវបានឃាត់ខ្លួន កាលពីថ្ងៃចន្ទ ទី៩ មីនា ពីបទបំភ្លៃព័ត៌មានលើបណ្ដាញសង្គមហ្វេសប៊ុកថា អ្នកជំងឺម្នាក់ កំពុងសម្រាកព្យាបាលសម្រាប់ជំងឺ COVID-19 ក្នុងទីក្រុងនេះ។ ប៉ូលិសឥណ្ឌូណេស៊ី បញ្ជាក់បែបនេះ ដោយដកស្រង់ចុះផ្សាយដោយទីភ្នាក់ងារព័ត៌មាន AFP ។

ចំណែក ជនជាតិឥណ្ឌូណេស៊ី ៥នាក់ផ្សេងទៀត ក៏ត្រូវបានឃុំឃាំងសម្រាប់បំពុលព័ត៌មានលើបណ្ដាញសង្គម ដែលក្នុងនោះរួមមាន ការអះអាងថា ស្ត្រីអ្នកកាន់សាសនាឥស្លាមម្នាក់ដែលហោះទៅកានអារ៉ាប៊ីសាអូឌីតសម្រាប់ពិធីសាសនាមួយ បានស្លាប់ភ្លាមៗដោយសារជំងឺ COVID-19 នៅព្រលានយន្តហោះអន្តរជាតិរបស់រដ្ឋធានីហ្សាការតា ។

ជនសង្ស័យទាំង៦នាក់ ត្រូវបានចោទប្រកាន់ពីបទបំពានច្បាប់ ដែលហាមឃាត់ការចែកចាយព័ត៌មានក្លែងក្លាយ ហើយបទចោទប្រកាន់នេះ អាចជាប់ពន្ធនាគាររហូតដល់ ៦ ឆ្នាំ។

បើតាម AFP មន្ត្រីជាន់ខ្ពស់ម្នាក់នៃក្រសួងព័ត៌មានឥណ្ឌូណេស៊ី លោក Semuel Abrijani Pangerapan អះអាងថា ចំណាត់ការនេះ គួរចាត់ទុកជាមេរៀនមួយសម្រាប់មនុស្សដទៃទៀត កុំឲ្យបំពុលព័ត៌មានជុំវិញកូរ៉ូណាវីរុសក្នុងប្រទេសឥណ្ឌូណេស៊ី។

គួររម្លឹកផងដែរថា កាលពីខែមុន ស្ត្រីឥណ្ឌូណេស៊ីចំនួន ២ នាក់ ត្រូវបានចាប់ខ្លួនសម្រាប់ការបង្ហោះព័ត៌មានក្លែងក្លាយពាក់ព័ន្ធនឹងជំងឺ COVID-19 ក្នុងប្រទេសដែលមានអ្នកលេងបណ្ដាញសង្គមសរុប ១៣០លាននាក់។

គិតត្រឹមថ្ងៃចន្ទទី ០៩ ខែមីនា អាជ្ញាធរឥណ្ឌូណេស៊ី បានប្រកាសរកឃើញករណីឆ្លងជំងឺ COVID-19 ដល់ ១៩ ករណីហើយ៕