ជាតិ
សាកលវិទ្យាភូមិន្ទភ្នំពេញ រៀបចំវេទិកាការងារ ជួយនិស្សិត រកការងារធ្វើ
× ភ្នំពេញ៖ សាកលវិទ្យាល័យភូមិន្ទភ្នំពេញ បានរៀបចំវេទិកាការងារលើកទី២សម្រាប់ឆ្នាំ២០២០ ដើម្បីផ្ដល់ឱកាសដល់សិស្សនិស្សិតដែលចង់រកការងារ។ វា អាចជួយសិស្សនិស្សិត ឲ្យទទួលបានបទពិសោធន៍ ក៏ដូចជាចំណូលពីការចូលបម្រើការស្របពេលដែលកំពុងសិក្សា។
កាលពីព្រឹកថ្ងៃទី៦ ខែមីនា ឆ្នាំ២០២០ ក្នុងអាគារសហព័ន្ធកីឡាការ៉ាតេកម្ពុជា នៃមជ្ឈមណ្ឌលជាតិហ្វឹកហាត់កីឡាការ៉ាតេ ស្ថិតក្នុងបរិវេណសាកលវិទ្យាល័យភូមិន្ទភ្នំពេញ មានស្ថាប័នចំនួន៣៤ បានដាក់បង្ហាញពីឱកាសការងារដល់សិស្សនិស្សិត រួមជាមួយបុគ្គលិកដែលនៅចាំផ្តល់ព័ត៌មាន។ សិស្សនិស្សិតនៃសាកលវិទ្យាល័យភូមិន្ទភ្នំពេញ និងបណ្ដានិស្សិតយ៉ាងច្រើនពីសាកលវិទ្យាល័យនានា បានចូលរួមសាកសួរទៅបុគ្គលិកក្រុមហ៊ុន និងបំពេញពាក្យដាក់ធ្វើការងារទៅតាមស្ថាប័នផ្សេងៗ។
យុវជន យី សំអាត យល់ថា ការរៀបចំវេទិកាការងារនេះគឺវាពិតជាល្អ ព្រោះក្រុមហ៊ុនទាំងអស់អាចមានឱកាសក្នុងការជ្រើសរើសបុគ្គលិកទៅតាមតម្រូវការ ហើយវាក៏ជាភាពងាយស្រួលដល់និស្សិតដើម្បីមានឱកាសទទួលបានការងារស្របពេលកំពុងសិក្សា និងមានជម្រើសថែមទៀតផង។ យុវជនរូបនេះ លើកឡើងថា«ខ្ញុំជានិស្សិតម្នាក់ដែលធ្លាប់ទទួលបានការងារពីពិព័រណ៍ការងារថ្នាក់ជាតិនៅកោះពេជ្រ ហើយខ្ញុំទទួលបានបទពិសោធន៍ច្រើនពីការងារនោះ»។
យី សំអាត (អ្នកចូលរួម)
យុវជនវ័យ២៥ឆ្នាំដដែលនេះ បន្ថែមថា វា ជាលើកទី៣ហើយ ដែលខ្លួនបានចូលរួមក្នុងពិព័រណ៍ ឬក៏វេទិកាការងារ ហើយយល់ថា វា ជាការប្រសើរដូចគ្នា ខុសត្រង់ថាវេទិកាការងារលើកទី២នេះ មានចំនួនស្ថាប័នតិច ហើយមនុស្សក៏មិនសូវច្រើនដូចកម្មវិធីថ្នាក់ជាតិប៉ុណ្ណោះ។
ចំណែក យុវជន ឆែម វណ្ណៈ ក៏យល់ថា ការរៀបចំវេទិកាការងារនេះ ពិតជាល្អប្រាកដណាស់សម្រាប់និស្សិត មិនចំពោះតែនិស្សិតនៃសាកលវិទ្យាល័យមួយចំនួនទេ ប៉ុន្តែជាការផ្ដល់ឱកាសដល់និស្សិតទូទាំងប្រទេស អាចមានជម្រើសការងារច្រើនទៅតាមចំណង់ចំណូលចិត្ត។ វណ្ណៈ និយាយថា៖«បណ្ដាស្ថាប័នដែលមកជ្រើសរើសបុគ្គលិកក្នុងវេទិកាការងារនេះ សុទ្ធតែក្រុមហ៊ុនមានការទទួលស្គាល់ និងល្បីឈ្មោះ ដែលអាចឲ្យនិស្សិតចូលបម្រើការងារទទួលបានបទពិសោធន៍ស្របពេលកំពុងសិក្សាផងដែរ»។
ឆែម វណ្ណះ (អ្នកចូលរួម)
រីឯ យុវតី ង៉ា លក្ខិណា មានវ័យ២៥ឆ្នាំ ទើបនឹងបានចូលរួមក្នុងវេទិកាការងារនេះជាលើកទី១ តាមរយៈមិត្តភក្តិ ហើយក៏បានបានដាក់ពាក្យសុំបម្រើការងារទៅស្ថាប័នមួយចំនួនផងដែរ។ យុវតីរូបនេះ មានទស្សនៈថា៖«វេទិកាការងារនេះ គឺពិតជាល្អមែនទែន ដែលខ្ញុំអាចដឹងពីតម្រូវការរបស់ក្រុមហ៊ុន និងមានជម្រើសក្នុងការជ្រើសរើសការងារដែលខ្ញុំចង់បានថែមទៀតផង។ ពេលនេះខ្ញុំអាចដាក់ពាក្យសុំបម្រើការងារបានដោយខ្លួនឯង»។
ង៉ា លក្ខិណា (អ្នកចូលរួម)
លោក មឿន ចន្ទ្រា ជាអ្នករៀបចំ និងជាអ្នកសម្របសម្រួលកម្មវិធី បានបញ្ជាក់ថា វេទិកាការងារលើកទី២ ឆ្នាំ២០២០ នៅសាកលវិទ្យាល័យភូមិន្ទភ្នំពេញ មានស្ថាប័នចំនួន៣៤ ចូលរួម និងមានក្រុមនិស្សិត៥០នាក់ (ក្រុមនិស្សិតស្មគ្រចិត្តនៃសាកលវិទ្យាល័យ) ហើយសម្រាប់ស្ថាប័នដែលមកចូលរួម គឺបង់៣០ដុល្លារ ឲ្យសាលា សម្រាប់ការរៀបចំនេះ៕
លោក មឿន ចន្រ្ទា (ជាប្រធានក្រុមបង នៃសាកលវិទ្យាល័យភូមិន្ទភ្នំពេញ និងជាអ្នកសម្របសម្រួលកម្មវិធី)
© រក្សាសិទ្ធិដោយ thmeythmey.com