COVID-19
អន្តរជាតិ
COVID-19៖ លោក ត្រាំ ប្រកាសផ្អាកការធ្វើដំណើរពីអឺរ៉ុបទៅអាមេរិកចំនួន៣០ថ្ងៃ
× ប្រធានាធិបតីអាមេរិក ដូណាល់ ត្រាំ នៅថ្ងៃទី១១ ខែមីនា (ម៉ោងអាមេរិក) បានប្រកាសផ្អាករាលការធ្វើដំណើរទាំងអស់រវាងអាមេរិក និងតំបន់អឺរ៉ុបដើម្បីទប់ស្កាត់ការរាលដាលជំងឺផ្លូវដង្ហើមបង្កដោយកូរ៉ូណាវីរុស (COVID-19) ចំនួន៣០ថ្ងៃ។ អង់គ្លេស ដែលនៅទ្វីបអឺរ៉ុប ជាករណីលើកលែង។ លោក ត្រាំ បានបន្ទោសប្រទេសតំបន់អឺរ៉ុប ដែលមិនព្រមរឹតបន្តឹងការធ្វើដំណើរពីចិនដែលធ្វើឲ្យការឆ្លងនៅតំបន់មួយនេះកើនឡើងយ៉ាងឆាប់រហ័ស។
ទាំងអាមេរិក ទាំងអឺរ៉ុប សុទ្ធតែបានរាយការណ៍ការកើនឡើងយ៉ាងគំហុកករណីឆ្លងកូរ៉ូណាវីរុស ដែលផ្ទុះដំបូងនៅក្រុងវូហាន ខេត្តហ៊ូប៉ីរបស់ចិន។ ករណីឆ្លងនៅអាមេរិក កើនលើសមួយពាន់ ស្របពេលដែលអ៊ីតាលី ជាប្រទេសរងគ្រោះធ្ងន់ជាងគេនៅតំបន់អឺរ៉ុប។ អេស្ប៉ាញ និងអាល្លឺម៉ង់ ក៏មានករណីឆ្លងវីរុសប្រភេទថ្មីនេះច្រើនដែរ។ ដើម្បីទប់ស្កាត់ការនាំវីរុសថ្មីបន្ថែមទៀត អាមេរិក សម្រេចលុបចោលការធ្វើដំណើរទាំងអស់ជាមួយអឺរ៉ុប។
«ដើម្បីកុំឲ្យវីរុសចូលទឹកដីយើងបាន យើងនឹងផ្អាករាល់ការធ្វើដំណើរពីអឺរ៉ុបទៅកាន់អាមេរិករយៈពេល៣០ថ្ងៃបន្ទាប់។ បញ្ញត្តិថ្មី នឹងចាប់អនុវត្តពីពាក់កណ្ដាលយប់ថ្ងៃទី១៣ ខែមីនាតទៅ។» ប្រធានាធិបតីអាមេរិក ដូណាល់ ត្រាំ ប្រកាសបែបនេះក្នុងសេចក្ដីថ្លែងការណ៍តាមទូរទស្សន៍នៅយប់ថ្ងៃទី១១ ខែមីនា។ លោកបន្តថា ចក្រភពអង់គ្លេស នឹងមិនរាប់បញ្ចូលក្នុងការវិធានការថ្មីនេះឡើយ។
លោក ត្រាំ បានអះអាងថា អឺរ៉ុបមានករណីឆ្លងកើនឡើងខ្លាំងព្រោះរដ្ឋាភិបាលមិនបានបញ្ឈប់ការធ្វើដំណើរពីចិន ដែលជាកន្លែងវីរុសផ្ទុះឡើងដំបូង។ នៅបណ្ដាញសង្គម Twitter របស់ខ្លួន លោក ត្រាំ បញ្ជាក់ថា លោកត្រៀមជាស្រេចដើម្បីប្រើប្រាស់អំណាចពេញលេញដែលមានក្នុងដៃរបស់លោកដើម្បីដោះស្រាយកូរ៉ូណាវីរុសដែលជាបញ្ហាប្រឈមបច្ចុប្បន្ន។ ក្រោមវិធានការថ្មី សូម្បីតែការដឹកជញ្ជូនទំនិញ ក៏ត្រូវរងផលប៉ះពាល់ដែរ។
ការរាលដាលរបស់ COVID-19 ក្នុងប្រទេស និងតំបន់ច្រើនជាង១១០ជុំវិញពិភពលោក ធ្វើឲ្យអង្គការសុខភាពពិភពលោកប្រកាសជំងឺនេះ ជាជំងឺឆ្លងជាសាកល។ បច្ចុប្បន្ន ចិននៅតែជាប្រទេសមានករណីឆ្លងច្រើនជាងគេដដែល ប៉ុន្តែការឆ្លងថ្មីៗបានថយចុះជាបន្តបន្ទាប់ ហើយស្ថានការណ៍គ្រប់គ្រងវីរុសនៅចិន ក៏មានសញ្ញាវិជ្ជមានផងដែរ។ ដូចគ្នានេះ នៅកូរ៉េខាងត្បូង ទោះជាមានករណីឆ្លងច្រើក្ដី តួលេខឆ្លងថ្មី ក៏មាននិន្នាការថយចុះដែរ។
អឺរ៉ុប ជាតំបន់ដែលករណីឆ្លងបន្តកើនឡើងឥតឈប់ឈរ។ ប្រទេសសមាជិកសហភាពអឺរ៉ុបទាំងអស់ សុទ្ធតែបានរាយការណ៍ពីករណីឆ្លងទាំងអស់។ ក្រៅពីនោះ តំបន់ផ្សេងទៀតក៏មានករណីឆ្លងដែរ ប៉ុន្តែស្ថិតក្នុងអត្រាតិចតួចបើប្រៀបធៀបនឹងចិន ឬកូរ៉េខាងត្បូង។ ជាសរុប អ្នកឆ្លង COVID-19 ទូទាំងពិភពលោកមានជិត១២ម៉ឺននាក់ ក្នុងនោះស្លាប់ប្រមាណ៤៣០០នាក់ និងសះស្បើយជាង៦៦ ០០០នាក់ផងដែរ៕
Tag:
COVID-19
អាមេរិក
អឺរ៉ុប
ដូណាល់ ត្រាំ
© រក្សាសិទ្ធិដោយ thmeythmey.com