អន្តរជាតិ
អ្នកស្រី ស៊ូជី នៅតែមិនអាចធ្វើប្រធានាធិបតី ដោយសារខ្វះការគាំទ្រពីក្រុមយោធា
រូបភាព AFP
×![]()
ដោយ: តន ចាន់រិទ្ធារ៉ា
អ្នកស្រី អ៊ុងសាន ស៊ូជី នឹងនៅតែមិនអាចធ្វើប្រធានាធិបតីមីយ៉ាន់ម៉ាបាន បន្ទាប់ពីសេចក្ដីព្រាងកែរដ្ឋធម្មនុញ្ញដែលស្នើដោយបក្សអ្នកស្រីដើម្បីលុបចោលមាត្រាចែងពីការរឹតត្បិតអ្នកស្រី មិនអាចទទួលបានសំឡេងគ្រប់គ្រាន់ក្នុងការបោះឆ្នោតក្នុងសភាសហព័ន្ធនៅថ្ងៃទី១១ ខែមីនា។ សេចក្ដីព្រាងនេះ ជាផ្នែកមួយនៃគម្រោងកែរដ្ឋធម្មនុញ្ញទ្រង់ទ្រាយធំរបស់រដ្ឋាភិបាលដើម្បីឲ្យរដ្ឋធម្មនុញ្ញមីយ៉ាន់ម៉ាមានលក្ខណៈប្រជាធិបតេយ្យពិតប្រាកដ។
ក្នុងការបោះឆ្នោតថ្ងៃទី១១ ខែមីនា សេចក្ដីព្រាងវិសោធនកម្មរដ្ឋធម្មនុញ្ញមាត្រា៥៩ ដែលចែងពីលក្ខខណ្ឌធ្វើជាប្រធានាធិបតី ទទួលសំឡេងគាំទ្រពីសមាជិកសភាចំនួន៣៩៣នាក់ និងប្រឆាំង២៤២នាក់។ ដោយមិនអាចរកសំឡេងគាំទ្រលើស៧៥ភាគរយ (ច្រើនជាង៤៩១នាក់) សំណើមួយនេះ មិនត្រូវបានអនុម័តឡើយ។
មាត្រា៥៩ ហាមឃាត់បុគ្គលណាម្នាក់ពីការក្លាយជាប្រធានាធិបតីមីយ៉ាន់ម៉ា ប្រសិនបើប្ដីឬប្រពន្ធ, ឪពុកឬម្ដាយ, កូនៗ ជាពលរដ្ឋបរទេស។ មាត្រានេះ ត្រូវគេមើលឃើញថា តាក់តែងឡើងដើម្បីរារាំងអ្នកស្រី អ៊ុងសាន ស៊ូជី ធ្វើជាប្រធានាធិបតីតែម្ដង ព្រោះស្វាមីអ្នកស្រី និងកូនប្រុសពីរនាក់ទៀត មានសញ្ជាតិអង់គ្លេស។ បច្ចុប្បន្ន អ្នកស្រី ស៊ូជី កាន់តំណែងជាទីប្រឹក្សារដ្ឋ ដ្បិតមិនអាចធ្វើប្រធានាធិបតីបាន ទោះបក្ស NLD របស់អ្នកស្រី ដឹកនាំរដ្ឋាភិបាលក្ដី។
ការកែមាត្រានេះ ស្ថិតក្នុងសេចក្ដីព្រាងចំនួន១១៧ដែលស្នើដោយបក្ស NLD ។ ការបោះឆ្នោតដើម្បីអនុម័តសេចក្ដីព្រាងបានចាប់ផ្ដើមតាំងពីថ្ងៃទី១០ មីនាមក ហើយរំពឹងថា អាចបញ្ចប់នៅខែមេសាខាងមុខ។ ចំណុចផ្សេងដែលបក្សកាន់អំណាចចង់កែប្រែរួមមាន ការកាត់បន្ថយអាយុអប្បរមាប្រធានាធិបតីមកត្រឹម៤៥ឆ្នាំ, ការកាត់បន្ថយចំនួនសមាជិកសភាតែងតាំងដោយយោធា និងការកាត់បន្ថយអំណាចអគ្គមេបញ្ជាការកងទ័ពជាដើម។
រដ្ឋធម្មនុញ្ញមីយ៉ាន់ម៉ាដែលតាក់តែងដោយយោធាដ៏មានឥទ្ធិពល បានរងការរិះគន់យ៉ាងខ្លាំងទាំងក្នុងស្រុក និងក្រៅស្រុក។ ការកែរដ្ឋធម្មនុញ្ញ ជាគោលនយោបាយចម្បងមួយរបស់បក្សសម្ព័ន្ធជាតិដើម្បីប្រជាធិបតេយ្យ (NLD) ដែលកំពុងដឹកនាំប្រទេសសព្វថ្ងៃ។ យ៉ាងណាមិញ បំណងកែរដ្ឋធម្មនុញ្ញនេះ ជួបបញ្ហាយ៉ាងខ្លាំង ព្រោះក្រុមយោធាកាន់កាប់សំឡេង២៥ភាគរយក្នុងសភាមីយ៉ាន់ម៉ា ដែលនេះគឺគ្រប់គ្រាន់ដើម្បីរាំងខ្ទប់ការកែប្រែណាមួយ។
យោធាដែលគ្រប់គ្រងប្រទេសជាង៦០ឆ្នាំ មុនការផ្ទេរអំណាចទៅកាន់រដ្ឋាភិបាលពាក់កណ្ដាលស៊ីវិលនៅឆ្នាំ២០០៨ នៅតែមានឥទ្ធិពលខ្លាំងក្នុងឆាកនយោបាយមីយ៉ាន់ម៉ាតាមរយៈរដ្ឋធម្មនុញ្ញដែលខ្លួនសរសេរខ្លួនឯង។ ក្រៅពីសំឡេង២៥ភាគរយក្នុងសភាគ្រប់កម្រិត យោធាមីយ៉ាន់ម៉ា នៅកាន់កាប់ក្រសួងសំខាន់បីមាន ការពារជាតិ មហាផ្ទៃ និងកិច្ចការព្រំដែន ហើយអគ្គមេបញ្ជាការកងទ័ព មានសិទ្ធិដឹកនាំប្រទេសក្នុងស្ថានភាពអាសន្នទៀតផង៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
