វេជ្ជបណ្ឌិត៖ មើលព័ត៌មានរន្ធត់ ២ម៉ោងក្នុង១ថ្ងៃ រយៈពេល២សប្តាហ៍ អាចមានជំងឺផ្លូវចិត្ត

COVID-19

ជាតិ

សុខភាព

វេជ្ជបណ្ឌិត៖ មើលព័ត៌មានរន្ធត់ ២ម៉ោងក្នុង១ថ្ងៃ រយៈពេល២សប្តាហ៍ អាចមានជំងឺផ្លូវចិត្ត

12, Mar 2020 , 9:19 pm

រូបភាព

អ្នកស្រី ឱ វណ្ណឌីន រដ្ឋលេខាធិការ និងជានាំពាក្យរបស់ក្រសួងសុខាភិបាល។

ដោយ: អ៊ូ សុខមាន (OU Sokmean)

ភ្នំពេញ៖ អ្នក ដែលចំណាយពេលមើលព័ត៌មានតក់ស្លុត ឬព័ត៌មានរន្ធត់ ២ម៉ោងក្នុង១ថ្ងៃ រយៈពេល២សប្តាហ៍ក្រោយ អ្នកនោះ នឹងកើតជំងឺផ្លូវចិត្ត។ ជំងឺផ្លូវចិត្តនេះ ភាគច្រើនកើតលើស្ត្រីដែលចំណាយពេលច្រើនទៅមើលព័ត៌មានបែបភ័យខ្លាចទាំងនោះ នៅលើបណ្តាញសង្គម បូករួមនឹងការបំភ័យនានាពីបរិយាកាសនៅជុំវិញខ្លួន។ នេះជាការលើកឡើងរបស់អ្នកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យរបស់ក្រសួងសុខាភិបាល។

អ្នកស្រី ឱ វណ្ណឌីន អះអាងថា អ្នកដែលចំណាយពេលច្រើនទៅមើលព័ត៌មានភ័យខ្លាច តក់ស្លុត និង រន្ធត់ ដែលផ្សាយនៅលើបណ្តាញសង្គម គឺកើតឡើងនូវជំងឺញ័រ ហើយបន្តមើលព័ត៌មានបែបនេះរហូតដល់២ទៅ៣សប្តាហ៍ក្រោយ អ្នកនោះនឹងកើតបញ្ហាផ្លូវចិត្ត ដែលធ្វើឲ្យឆាប់ញ័រ ឆាប់ភ័យ និងឆាប់ខ្លាចជាដើម ពេលដែលមានហេតុការណ៍ឬព្រឹត្តិការណ៍មិនល្អណាមួយកើតឡើង។

អ្នកស្រី និយាយក្នុងកម្មវិធីស្តីពី COVID-19 និងព័ត៌មានក្លែងក្លាយ កាលពីថ្ងៃទី១១ ខែមីនា ឆ្នាំ២០២០ ដូច្នេះថា៖«ប្រសិនបើក្នុងជីវិតប្រចាំថ្ងៃរបស់យើង យើងចំណាយពេល២ម៉ោងសម្រាប់មើលតែរឿងរន្ធត់ តក់ស្លុតភ័យខ្លាច...ធ្វើឲ្យអ្នកនោះមានបញ្ហាផ្លូវចិត្តក្នុងរយៈពេល២សប្តាហ៍ក្រោយ។ អ៊ីចឹង សូមបងប្អូនរបស់យើងកុំព្យាយាមមើលព័ត៌មានណាដែលតក់ស្លុតព័ត៌មានណាដែលរន្ធត់ ឬ ព័ត៌មានក្លែងក្លាយ (ដែលមានចេតនាធ្វើឲ្យភ័យខ្លាច) ដោយយើងត្រូវប្រឹងស្រាវជ្រាវរកប្រភពព័ត៌មានណា ដែលអាចជឿទុកចិត្តបាន»។

អ្នកស្រី ឱ វណ្ណឌីន បានអះអាងថា មានព័ត៌មាន និងអ្នកប្រើប្រាស់សង្គមហ្វេសប៊ុក បានសរសសេរ និងចុះផ្សាយពីករណីពលរដ្ឋដួលសន្លប់ គឺដោយសារតែមេរោគ COVID-19 ដែលធ្វើពលរដ្ឋភ័យខ្លាច តក់ស្លុត និងរន្ធត់ មិនហ៊ានជួយដល់សន្លប់ទាំងនោះ ធ្វើឲ្យបាត់បង់គុណធម៌សង្គម គឺជាព័ត៌មានក្លែងក្លាយ ឬមិនពិត។

អ្នកនាំពាក្យរូបនេះ បញ្ជាក់សាជាថ្មីថា ករណីមនុស្សដួលសន្លប់នោះ គឺមិនមែនមកពីការឆ្លងមេរោគCOVID-19ឡើយ។ មេរោគ COVID-19 គឺសម្ងំក្នុងខ្លួនមនុស្ស១៤ថ្ងៃក្រោយឆ្លង បានវាចេញរោគសញ្ញា ហើយក្នុងរយៈពេល១៤ដែលមេរោគCOVID-19ស្ថិតនៅក្នុងខ្លួនមនុស្ស វាបង្ហាញអាការក្តៅខ្លួនក្នុងរង្វង់៣៧អង្សាសេ ឈឺក ឡើងស្លេក និងមានអារម្មណ៍ថប់ៗផ្លូវដង្ហើម តែមិនមែនដួលសន្លប់ភ្លាមៗឡើយ។ ដូច្នេះ ពលរដ្ឋកុំព្យាយាមមើលព័ត៌មានណាដែលមិនពិត ដោយភ័យខ្លាចរហូតភ្លេចការពារខ្លួនពីមេរោគCOVID-19 ថែមទាំងធ្វើឲ្យមានបញ្ហាផ្លូវចិត្តទៅវិញ នៅពេលមើលព័ត៌មានតក់ស្លុក និងរន្ធត់បែបនេះ។

អ្នកស្រី ជំរុញឲ្បប្រជាពលរដ្ឋ ស្វែងរកព័ត៌មានពិត និងវិធីបង្ការនានាដែលពាក់ព័ន្ធនឹង COVID-19 នៅលើបណ្តាញសង្គម ដែលផ្សាយដោយរាជរដ្ឋភិបាល ក្រសួងសុខាភិល នាយកដ្ឋានប្រយុទ្ធប្រឆាំងជំងឺឆ្លង (CDC) អង្គការសុខភាពពិភពលោក (WHO) និង ប្រព័ន្ធផ្សព្វផ្សាយព័ត៌មានណាមួយ ដែលលោកអ្នកជឿទុកចិត្ត។

អ្នកស្រី ឱ វណ្ណឌីន មានប្រសាសន៍ថា៖«នៅពេលយើងចំណាយពេលលេងហ្វេសប៊ុកច្រើនពេក (មើលអ្វីមិនគួរមើល) យើងចំណាយពេលទៅធ្វើអ្វីដែលមិនគួរធ្វើ យើងនឹងបាត់បង់ភាពម្ចាស់ការ យើងបាត់បង់លើការគិតគួរ ក្នុងការការពារកុំឲ្យឆ្លងមេរោគCOVID-19 ដោយអាល័យតែភ័យនេះ ភ័យនោះ។ ហើយការផ្សព្វផ្សាយនូវព័ត៌មានក្លែងក្លាយនេះ ធ្វើឲ្យប្រជាពលរដ្ឋយើង ភ័យ តក់ស្លុក អាច២-៣សប្តាហ៍ក្រោយ មានបញ្ហាសុខភាពផ្លូវចិត្ត»។

អ្នកស្រី បន្តថា៖«យើងត្រូវដឹងថាផ្លូវចិត្តរបស់យើង ខួរក្បាលរបស់យើង គឺមានតួនាទីសំខាន់ជាងគេក្នុងរាងកាយមនុស្សយើង។ បើសិនផ្លូវចិត្តយើងអត់មានសុខភាពល្អ វានឹងបង្កលក្ខណៈទៅជាញ័រ ទៅជាភ័យ ទៅជាថប់ដង្ហើម ហើយគិតថាខ្លួនឯងកើតCOVID-19នេះ ធ្វើឲ្យផ្អើលគេ ផ្អើលឯង»។

អ្នកស្រី បន្ថែមថា មេរោគ COVID-19 មាន៨០ភាគរយជាករណីដែលឆ្លងក្នុងកម្រិតស្រាល និង២០ភាគទៀតជាករណីឆ្លងធ្ងន់ធ្ងរ ដែលកើតលើបុគ្គលមានជំងឺប្រចាំកាយ ដូចជា ជំងឺទឹកនោមផ្អែម មហារីក ជំងឺបេះដូង ជាពិសេសជំងឺសួតតែម្តង ដែលមេរោគCOVID-19នេះ វាយលុកលឿនបំផុត។

អ្នកស្រី បានអំពាវនាវប្រជាពលរដ្ឋ កុំឲ្យចំណាយពេលទៅលើព័ត៌មានមិនពិតនិងព័ត៌មានភ័យខ្លាច តែត្រូវយកពេលវេលា ថែទាំសុខភាពវិញ ដោយសម្រាក បរិភោគ រក្សាជាតិទឹក និង វីតាមីនឲ្យបានគ្រប់គ្រាន់នៅក្នុងខ្លួន ដើម្បីឲ្យសរីរាង្គក្នុងខ្លួនមនុស្សខ្លាំងនិងដើម្បីជំនួយដល់ប្រព័ន្ធប្រឆាំងមេរោគក្នុងខ្លួនមនុស្សឲ្យខ្លាំង ក្នុងការប្រយុទ្ធប្រឆាំងនឹងមេរោគផ្សេងៗ មិនមែនសំដៅតែលើCOVID-19ទេ គឺគ្រប់មេរោគទាំងអស់ នៅពេលប្រព័ន្ធការពារក្នុងខ្លួនមនុស្សខ្លាំង មេរោគនោះពិបាកនឹងបំផ្លាញប្រព័ន្ធនានាក្នុងសរីរាង្គមនុស្សណាស់។

អ្នកនាំពាក្យក្រសួងសុខាភិបាល បានលើកឡើងថា ៣ករណីនៃអ្នកជំងឺផ្លូវដង្ហើមប្រភេទថ្មីបង្កដោយមេរោគCOVID-19 នៅកម្ពុជា គឺពលរដ្ឋមិនគួរភ័យខ្លាចនោះទេ បើធៀបនឹងជំងឺរលាកផ្លូវដង្ហើមខាងលើ (មិនមែនបង្កដោយ COVID-19 ) មានរហូតដល់ជាង២លានករណី ដែលកើតលើប្រជាជនខ្មែរនៅទូទាំងប្រទេស។

នៅថ្ងៃទី១២ ខែមីនានេះ កម្ពុជា បានរកឃើញការឆ្លងមេរោគ COVID-19 ២ករណីទៀត ដែលធ្វើឲ្យកម្ពុជា កើនឡើង៥ករណីហើយ។ ៥ករណីនោះ មានខ្មែរម្នាក់ ចិនម្នាក់ និងអង់គ្លេស៣នាក់។

លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន។

លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន ថ្លែងថា ក្រសួងព័ត៌មាន នឹងស្នើឲ្យក្រសួងប្រៃសណីយ៍ និងទូរគមនាគមន៍ លុបគេហទំព័រព័ត៌មានឬហ្វេសប៊ុកទាំងឡាយណា ដែលផ្សាយព័ត៌មានក្លែងក្លាយ។ លោក បន្តថា គណនីនិងទំព័រហ្វេសប៊ុក ដែលបង្កើតព័ត៌មានក្លែងក្លាយ ក្រសួងព័ត៌មានបានធ្វើការផ្ទាល់ជាមួយក្រុមហ៊ុនហ្វេសប៊ុក និងធ្វើការជាមួយក្រសួងមហាផ្ទៃ ដើម្បីអនុវត្តតាមនិតីវិធីច្បាប់។

លោក ផុស សុវណ្ណ បញ្ជាក់ថា៖«តើអត្ថបទ ឬហេតុការណ៍ដែលគណនីនិងទំព័រហ្វេសប៊ុក បានបង្ហោះ ផ្ទុយនឹងស្តង់ដាររបស់សហគមន៍ហ្វេសប៊ុកដែរឬទេ? បើផ្ទុយ យើងស្នើសុំឲ្យក្រុមហ៊ុនហ្វេសប៊ុក លុបអត្ថបទដែលផ្សាយហ្នឹង ហើយបើនៅតែបន្តផ្សាយព័ត៌មាន ឬដំណឹងក្លែងក្លាយដែលបង្កលក្ខណៈរន្ធត់ ភ័យខ្លាចទៀត យើងស្នើឲ្យលុបគណនីឬទំព័រហ្វេសប៊ុកនោះ ចោលតែម្តង»។

សូមរម្លឹកថា កម្ពុជា បានស្នើឲ្យក្រុមហ៊ុនហ្វេសប៊ុក លុបគណនីហ្វេសប៊ុកមួយ រួចមកហើយ ដោយសារតែផ្សាយព័ត៌មានមិនពិតពីជំងឺកូវីដ-១៩។ ទន្ទឹមនឹងនេះ អាជ្ញាធរកម្ពុជា ក៏ធ្លាប់ហៅម្ចាស់គណនីនិងទំព័រហ្វេសប៊ុកមួយចំនួន ទៅណែនាំនិងព្រមានដែរ ក្រោយផ្សាយព័ត៌មានក្លែងក្លាយពីជំងឺកូវីដ-១៩៕