COVID-19
អន្តរជាតិ
លោក ឌូទើតេ ប្រកាសបិទក្រុងម៉ានីល ហើយត្រៀមហៅចិនឲ្យជួយ បើ COVID-19 រាលដាលខ្លាំង ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ។ រូបភាព Manila Bulletin
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី១២ ខែមីនា បានប្រកាសវិធានការបិទការធ្វើដំណើរចេញចូលរដ្ឋធានីម៉ានីលទាំងស្រុង ដើម្បីទប់ស្កាត់ការរាលដាលជំងឺផ្លូវដង្ហើមបង្កដោយកូរ៉ូណាវីរុសប្រភេទថ្មី (COVID-19) ។ ចរាចរាណ៍ផ្លូវគោក ផ្លូវទឹក និងផ្លូវអាកាសចេញចូលទីក្រុងមានប្រជាជន១២លាននាក់នេះ នឹងបិទទាំងស្រុងចាប់ពីថ្ងៃទី១៥ ខែមីនាតទៅ។ បើស្ថានការណ៍ធ្ងន់ធ្ងរ លោក ឌូទើតេ បង្ហើបថា នឹងរកចិនឲ្យជួយ។
ចំនួនករណីឆ្លង COVID-19 នៅហ្វីលីពីន បានកើនឡើងយ៉ាងឆាប់រហ័សក្នុងសប្ដាហ៍នេះ ដោយចាប់ពីថ្ងៃទី៩ ខែមីនាមក ការឆ្លងបានកើនឡើងពី២៤ករណីដល់៥២ករណីឯណោះ ខណៈចំនួនអ្នកស្លាប់មានចំនួន៥នាក់។ ដើម្បីទប់ស្កាត់ការរាលដាលវីរុសក្នុងប្រទេស ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ក៏ប្រកាសបិទរដ្ឋធានីម៉ានីលដើម្បីបង្ការការឆ្លងក្នុងទីក្រុងដ៏សំខាន់របស់ប្រទេស។
ក្នុងសេចក្ដីថ្លែងការណ៍តាមទូរទស្សន៍នៅថ្ងៃទី១២ ខែមីនា លោក ឌូទើតេ អះអាងថា ការធ្វើដំណើរចេញចូលទីក្រុងម៉ានីល នឹងត្រូវហាមឃាត់ សាលារៀនទាំងអស់ នឹងត្រូវបិទមួយខែ ឯការជួបជុំទ្រង់ទ្រាយធំក៏ត្រូវផ្អាកទាំងអស់ដែរ។ លើសពីនោះ ជនបរទេសដែលមកពីប្រទេសមានហានិភ័យខ្ពស់ និងការឆ្លងខ្លាំងក្លា ក៏ត្រូវហាមឃាត់ផងដែរ។
«នេះជាការបិទទីក្រុង។ នេះជាបញ្ហាលើការការពារអ្នកពី COVID-19 ។» លោក ឌូទើតេ ប្រកាសបែបនេះក្នុងសារទៅកាន់ប្រជាជន។ យ៉ាងណាមិញ លោក មិនទាន់បញ្ជាក់ភ្លាមទេថា វិធានការទាំងនោះ នឹងមានប្រសិទ្ធភាពអនុវត្តចាប់ពីពេលណា ប៉ុន្តែបម្រាមធ្វើដំណើរចេញចូលទីក្រុងម៉ានីលផ្លូវគោក ផ្លូវទឹក និងផ្លូវអាកាស នឹងចាប់ផ្ដើមពីចុងសប្ដាហ៍នេះ។
វិធានការរបស់ហ្វីលីពីន បានប្រកាសក្រោយអង្គការសុខភាពពិភពលោក ចាត់ទុក COVID-19 ជាជំងឺរាតត្បាតសាកល ប៉ុន្តែស្ថិតក្នុងស្ថានភាពគ្រប់គ្រងបាន។ នៅថ្ងៃទី១២ មីនា លោក ឌូទើតេ ដែលមានវ័យ៧៤ឆ្នាំ ក៏បានធ្វើតេស្តរកវីរុសនេះ ព្រោះលោកស្ថិតក្នុងចង្កោមមនុស្សវ័យចំណាស់ដែលប្រឈមមុខនឹងហានិភ័យខ្ពស់នឹងការឆ្លង COVID-19 នេះ ហើយម្យ៉ាង លោកជួបជាមួយមន្ត្រីសាធារណៈជាច្រើនដែលជួបផ្ទាល់ជាមួយមនុស្សម្នាផងដែរ។
ក្នុងករណី COVID-19 នៅហ្វីលីពីន មិនធូរស្រាលនោះ លោក ឌូទើតេ ក៏និយាយពីលទ្ធភាពដែលហ្វីលីពីនស្នើសុំជំនួយពីចិន។ លោកបញ្ជាក់បែបនេះថា៖ «ប្រហែលជាមានពេល ក្នុងករណីបញ្ហាមិនល្អ ដែលខ្ញុំស្នើសុំឲ្យចិនជួយ។ ខ្ញុំសង្ឃឹមថា ស្ថានភាព នឹងមិនដើរដល់ដំណាក់កាលនោះទេ ប៉ុន្តែយើងប្រហែលត្រូវការជំនួយ»៕
Tag:
ហ្វីលីពីន
រ៉ូឌ្រីហ្គោ ឌូទើតេ
COVID-19
© រក្សាសិទ្ធិដោយ thmeythmey.com