ជាតិ
ស៊ុយអែតផ្តល់ថវិកាជាង៣លានដុល្លារដល់កម្ពុជា ដើម្បីលើកកម្ពស់ការអប់រំ និងស្រាវជ្រាវសិទ្ធិមនុស្ស ស្ថានទូតស៊ុយអែត បានចុះកិច្ចព្រមព្រៀងផ្តល់ថវិកាចំនួន៣,២លានដុល្លារ ឲ្យទៅវិទ្យាស្ថានរ៉ាអូលរ៉ាលេនបឺក សម្រាប់លើកម្ពស់ការអប់រំ និងការស្រាវជ្រាវផ្នែកសិទ្ធិមនុស្សនៅកម្ពុជា
× ភ្នំពេញ៖ រាជរដ្ឋាភិបាលស៊ុយអែត បានផ្តល់ថវិកាចំនួន៣,២លានដុល្លារ ទៅឲ្យវិទ្យាស្ថានរ៉ាអូលរ៉ាលេនបឺកសម្រាប់ច្បាប់សិទ្ធិមនុស្ស និងច្បាប់មនុស្សធម៌(RWI)នៅកម្ពុជា ។ ថវិកាទាំងនេះ សម្រាប់ជួយពន្លឿនការពង្រឹងសមត្ថភាពស្ថាប័នឧត្ថមសិក្សា ដើម្បីរួមចំណែកផ្សព្វផ្សាយសិទ្ធិមនុស្ស និងសមភាពយេនឌ័រនៅកម្ពុជាឲ្យកាន់តែប្រសើរឡើង។
ថវិកា៣,២លានដុល្លារនេះ នឹងអាចទ្រទ្រង់លើការងារផ្នែកការស្រាវជ្រាវសិទ្ធិមនុស្ស ទាំងបញ្ហាយេនឌ័រ បរិស្ថាន និងបង្កើតឲ្យមានវេទិកានានាដើម្បីបង្កើនការពិភាក្សា និងបង្កើនកិច្ចប្រតិបត្តិការនៅក្នុងវិស័យផ្សេងៗនៅកម្ពុជាក្នុងរយៈពេល៣ឆ្នាំ ចាប់ពីឆ្នាំ២០២០ ដល់ឆ្នាំ២០២២។
លោក សាមូអែល ហ៊ូទីក ប្រធានកិច្ចសហប្រតិបត្តិការអភិវឌ្ឍន៍អន្តរជាតិនៃស្ថានទូតស៊ុយអែតប្រចាំនៅកម្ពុជា ជឿជាក់ថា សកម្មភាពការងារនៃវិទ្យាស្ថានរ៉ាអូលរ៉ាលេនបឺក នឹងអាចរួមចំណែកក្នុងការផ្សព្វផ្សាយចំណេះដឹងផ្នែកសិទ្ធិមនុស្សដល់ប្រជាពលរដ្ឋ និងវិស័យឯកជននៅកម្ពុជា។
ស្ថានទូតស៊ុយអែត បានចុះកិច្ចព្រមព្រៀងផ្តល់ថវិកាចំនួន៣,២លានដុល្លារ ឲ្យទៅវិទ្យាស្ថានរ៉ាអូលរ៉ាលេនបឺក សម្រាប់លើកម្ពស់ការអប់រំ និងការស្រាវជ្រាវផ្នែកសិទ្ធិមនុស្សនៅកម្ពុជា
ស្ថានទូតស៊ុយអែត បានដកស្រង់សម្តី លោក សាមូអែល ហ៊ូទីក ដូច្នេះថា៖«ជំនួយគាំទ្រនេះ គឺស្របទៅនឹងយុទ្ធសាស្ត្ររបស់រាជរដ្ឋាភិបាលស៊ុយអែតសម្រាប់កិច្ចសហការប្រតិបត្តិការអភិវឌ្ឍអន្តរជាតិជាមួយនឹងប្រទេសកម្ពុជា ក៏ដូចជាគោលនយោបាយដឹកនាំទៅរកលទ្ធិប្រជាធិបតេយ្យ ដោយផ្តោតលើការផ្សព្វផ្សាយ និងការការពារសិទ្ធិមនុស្សជាមូលដ្ឋាន»។
លោកស្រី ហាន់ហា ចនសិន នាយិកាវិទ្យាស្ថានរ៉ាអូលរ៉ាលេនបឺក បានបញ្ជាក់ថា សមិទ្ធផលនានាដែលកើតចេញពីបញ្ញាវន្ត គឺអាចនឹងមានសុទិដ្ឋិនិយមសម្រាប់ប្រជាពលរដ្ឋកម្ពុជានៅថ្ងៃអនាគត។ លោកស្រីមានប្រសាសន៍ដូច្នេះថា៖«ពួកយើងនឹងបន្តការពង្រឹងកិច្ចសហប្រតិបត្តិការផ្នែកសិទ្ធិមនុស្សនៅក្នុងកម្ពុជា។ ខ្ញុំមានអារម្មណ៍រីករាយដោយបានរួមចំណកសម្រាប់ភាពជោគជ័យនៃការងារនេះរហូតមកដល់បច្ចុប្បន្ន»។
វិទ្យាស្ថានរ៉ាអូលរ៉ាលេនបឺក បានអនុវត្តការងារផ្នែកសិទ្ធិមនុស្សតាំងពីឆ្នាំ២០១៣ ដោយសហការជាមួយនឹងសាកលវិទ្យាល័យ និងវិទ្យាស្ថានផ្សេងៗនៅកម្ពុជា ដើម្បីបណ្តុះបណ្តាល និងអប់រំដល់អ្នកជំនាន់ក្រោយ៕
Tag:
ថវិកា
ស៊ុយអែត
ការអប់រំ
ការស្រាវជ្រាវ
© រក្សាសិទ្ធិដោយ thmeythmey.com