COVID-19
អន្តរជាតិ
អាមេរិក និងអេស្ប៉ាញ ប្រកាសអាសន្ន ជុំវិញ COVID-19 ប្រធានាធិបតីអាមេរិក ដូណាល់ ត្រាំ, រូបភាព៖ AFP
× នាថ្ងៃទី១៣ ខែមីនា ប្រធានាធិបតីអាមេរិក ដូណាល់ ត្រាំ បានប្រកាសអាសន្នថ្នាក់ជាតិ ស្របពេលជំងឺរលាកសួត ដែលបង្កដោយកូរ៉ូណាវីវុស (COVID-19) កំពុងតែអុកឡុកនៅក្នុងប្រទេស។ ក្រៅពីអាមេរិក នៅអេស្ប៉ាញឯណោះវិញ ក៏ត្រៀមប្រកាសដាក់ប្រទេសក្នុងភាពអាសន្ននៅថ្ងៃទី១៤ ខែមីនានេះដែរ។
ស្ថានការណ៍រីកសាយភាយCOVID-19 កំពុងតែកើនឡើងយ៉ាងខ្លាំងនៅក្រៅប្រទេសចិន។ ក្នុងចំណោមប្រទេសទាំងនោះ អេស្ប៉ាញ និងអាមេរិក បានរកឃើញCOVID-19 ជាបន្តបន្ទាប់។ គិតត្រឹមថ្ងៃទី១៣ ខែមីនា អាមេរិកមានCOVID-19 ប្រមាណ ២ពាន់ករណី ស្របពេលអេស្ប៉ាញមានជាង ៥ពាន់ករណី។
បន្ទាប់ពីតួលេខCOVID-19 ឡើងយ៉ាងគំហុកបែបនេះ ប្រធានាធិបតី ដូណាល់ ត្រាំ នាថ្ងៃទី១៣ ខែមីនា បានប្រកាសដាក់អាមេរិកស្ថិតក្នុងភាពអាសន្ន តាមរយៈសន្និសិទមួយនៅសេតវិមាន។ បើតាមការបញ្ជាក់របស់លោកត្រាំ រដ្ឋាភិបាលអាមេរិក នឹងផ្តល់អំណាចពេញលេញដល់រដ្ឋាភិបាលសហព័ន្ធទាំងអស់ប្រឆាំងCOVID-19។ ជាពិសេសអាមេរិក ត្រៀមលុយរហូតដល់ទៅ ៤០ពាន់លានដុល្លារ សម្រាប់ជាមូលនិធិដល់រដ្ឋសហព័ន្ធទាំងអស់ផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ចំណែកនៅអេស្ប៉ាញវិញ រដ្ឋាភិបាល ក៏ត្រៀមដាក់ប្រទេសស្ថិតក្នុងភាពអាសន្នរយៈពេល ១៥ថ្ងៃដែរ។ ការប្រកាសអាសន្ននេះ អេស្ប៉ាញ នឹងធ្វើឡើងនៅថ្ងៃទី១៤ ខែមីនានេះ។ បើតាមការបញ្ជាក់របស់នាយករដ្ឋមន្ត្រី លោក Pedro Sanchez អេស្ប៉ាញ នឹងប្រកាសអាសន្នកម្រិត១ ក្នុងចំណោមបីកម្រិត។ ការប្រកាសអាសន្ន ដែលមានរយៈពេលយ៉ាងហោចណាស់១៥ថ្ងៃ នឹងផ្តល់អំណាចដល់រដ្ឋាភិបាលកាន់តែទូលាយជាងមុន ដើម្បីទប់ស្កាត់ករណីឆ្លងនៅក្នុងប្រទេស និងការការពារសុវត្ថិភាពរបស់ប្រជាជន។
សូមបញ្ជាក់ថា មួយរយៈចុងក្រោយនេះ ករណីឆ្លងនៅអឺរ៉ុប និងអាមេរិក បានកើនឡើងយ៉ាងគំហុក។ ដើម្បីទប់ស្កាត់ការរីកសាយភាយនៃ COVID-19 រដ្ឋាភិបាលជាច្រើន បានចេញវិធានការជាបន្ទាប់បន្ទាប់។ ចំណាត់ការទាំងនោះមានដូចជា បិទសាលារៀន ហាមឃាត់ការជួបជុំគ្នាច្រើននាក់ ការផ្អាកព្រឹត្តិការណ៍កីឡា និងរឹតត្បិតការធ្វើដំណើរជាដើម៕
Tag:
អាមេរិក
អេស្ប៉ាញ
COVID-19
© រក្សាសិទ្ធិដោយ thmeythmey.com