ក្រសួងព័ត៌មាន បង្កើតគណៈកម្មការតាមដានការផ្សាយព័ត៌មានក្លែងក្លាយ និងត្រៀមចាត់វិធានការច្បាប់

ជាតិ

ក្រសួងព័ត៌មាន បង្កើតគណៈកម្មការតាមដានការផ្សាយព័ត៌មានក្លែងក្លាយ និងត្រៀមចាត់វិធានការច្បាប់

14, Mar 2020 , 7:59 pm

រូបភាព

លោក អ៊ុក ប្រាថ្នា រដ្ឋលេខាធិការក្រសួងព័ត៌មាន ត្រូវបានតែងតាំងជាប្រធានគណៈកម្មការតាមដានព័ត៌មានក្លែងក្លាយ (រូបពីក្រសួងព័ត៌មាន)

ដោយ: ផាត ដាណេ

ភ្នំពេញ៖ ក្រសួងព័ត៌មាន សម្រេចបង្កើតគណៈកម្មការមួយ សម្រាប់តាមដានការផ្សព្វផ្សាយព័ត៌មានក្លែងក្លាយ នៅតាមបណ្ដាញទំនាក់ទំនងសង្គមផ្សេងៗនៅកម្ពុជា។ ក្រសួងព័ត៌មាន លើកមូលហេតុថា ការសម្រេចបង្កើតគណៈកម្មការនេះឡើង គឺដោយសារតែមានការផ្សព្វផ្សាយព័ត៌ក្លែងក្លាយច្រើន ដែលជាការបំផុសបំផុល នាំឲ្យខូចសណ្ដាប់ធ្នាប់ និងធ្វើឲ្យមានភាពចលាចលក្នុងសង្គម។

សេចក្ដីប្រកាសព័ត៌មានរបស់ក្រសួងព័ត៌មាន ចុះថ្ងៃទី១១ ខែមីនា ឆ្នាំ២០២០ បានឲ្យដឹងថា គណៈកម្មការនេះ មានភារកិច្ចក្នុងការតាមដានការផ្សាយព័ត៌មានក្លែងក្លាយ តាមបណ្ដាញសង្គម ឬបណ្ដាញទំនាក់ទំនងផ្សេងៗទៀត។ គណៈកម្មការនេះ នឹងឆ្លើយតបទៅសាធារណជនឲ្យទាន់ពេល និងគ្រប់មធ្យោបាយរាល់ការផ្សាយព័ត៌មានមិនពិត រួមទាំងសហការជាមួយស្ថាប័នសារព័ត៌មាន និងប្រព័ន្ធផ្សព្វផ្សាយនានា។

ក្នុងការសហការរវាងក្រសួង ស្ថាប័នពាក់ព័ន្ធ ក្រុមហ៊ុន និង អង្គការនានា គឺដើម្បីរាំងខ្ទប់(block) គេហទំព័រ គណនីឬទំព័រហ្វេសប៊ុកណា ដែលផ្សាយព័ត៌មានក្លែងក្លាយ និងចាត់វិធានការតាមផ្លូវច្បាប់។ គណៈកម្មការនឹងធ្វើរបាយការណ៍ជូនទៅថ្នាក់ដឹកនាំក្រសួងពីស្ថានភាពនៃការផ្សាយ ដើម្បីអនុវត្តតាមនិតីវិធីច្បាប់។

គណៈកម្មការ មានលោក អ៊ុក ប្រាថ្នា រដ្ឋលេខាធិការក្រសួងព័ត៌មាន ជាប្រធាន អមដោយអនុប្រធាន៣រូប និង សមាជិកមួយចំនួនទៀត។ ប្រធានមន្ទីរព័ត៌មាននៅគ្រប់រាជធានី-ខេត្ត ក៏ជាសមាជិកនៃគណៈកម្មការនេះដែរ៕