COVID-19
អន្តរជាតិ
សម្តេច ហ៊ុន សែន ពិចារណាផ្អាកបរទេសពីអ៊ីរ៉ង់មួយទៀត ហើយហួសចិត្តអ្នកចំអកករណីមិនបិទចិន
× សម្តេចនាយករដ្ឋមន្ត្រី ហ៊ុន សែន បានលើកឡើងថា កម្ពុជាកំពុងពិនិត្យលើការផ្អាកបរទេសពីអ៊ីរ៉ង់មួយទៀត បន្ថែមលើការសម្រេចករណីពីអ៊ីតាលី អាល្លឺម៉ង់ អេស្ប៉ាញ បារាំង និងសហរដ្ឋអាមេរិក ក្នុងយុទ្ធនាការទប់ស្កាត់ការរាលដាល COVID-19។
ថ្លែងនាពិធីបុណ្យទន្លេពីខេត្តបាត់ដំបង នៅល្ងាចថ្ងៃទី១៤ ខែមីនា នេះ សម្តេច ហ៊ុន សែន បានគូសបញ្ជាក់ថា ចំណុចកណ្តាលនៃការផ្ទុះ COVID-19 គឺស្ថិតនៅតំបន់អឺរ៉ុប មិនមែនចិនទៀតនោះឡើយ ខណៈបច្ចុប្បន្ន ចិនកំពុងព្យាយាមជួយដល់ប្រទេសដទៃ ជាពិសេសអ៊ីតាលី ក្នុងការទប់ស្កាត់ការរាលនេះ។
ទាក់ទងនឹងការសម្រេចផ្អាកទិដ្ឋាការ និងបរទេសដែលមកពីអ៊ីតាលី អាល្លឺម៉ង់ អេស្ប៉ាញ បារាំង និងអាមេរិក រយៈពេល៣០ថ្ងៃ ត្រូវបានសម្តេចលើកឡើងថា វាជារឿងសមហេតុផល ដោយសារអ៊ីតាលី បានប្រកាសបិទប្រទេស អាមេរិក និងអេស្ប៉ាញ ដាក់ជិតក្នុងគ្រោះអាសន្ន អាល្លឺម៉ង់ បារាំង បានរឹតត្បិតការជួបជុំ។
សម្តេច ហ៊ុន សែន បានសំដែងការហួសចិត្ត ចំពោះការសើចចំអកលើករណីកម្ពុជាដែលមិនបានបិទបរទេសពីប្រទេសចិន។ ជាមួយគ្នានេះ សម្តេចបានអបអរចិនចំពោះវឌ្ឍនភាពនៃការទប់ស្កាត់ COVID-19 ដែលមានអត្រាឆ្លងតិច ខណៈបណ្តាប្រទេសអឺរ៉ុបបែរជាផ្ទុះឡើងយ៉ាងធ្ងន់ធ្ងរ។
សម្តេចបានលើកឡើងថា ការរឹតត្បិតការចេញចូលបរទេស មិនមែនជារឿងថ្មីនោះឡើយ ខណៈសិង្ហបុរី និងបណ្តាលប្រទេសជាច្រើន មានវិធានការណ៍ខ្លាំងជាងនេះទៅទៀត។
បច្ចុប្បន្ន កម្ពុជាកំពុងពិចារណាលើករណីប្រទេសអ៊ីរ៉ង់ ដែលស្ថិតក្នុងចំណោមប្រទេសដែលកំពុងរាលដាលខ្លាំង រួមទាំងចំណាត់ការបន្ទាន់ផ្សេងៗផងដែរ៕
© រក្សាសិទ្ធិដោយ thmeythmey.com