COVID-19
អន្តរជាតិ
លោក Javier Solana អតីតអគ្គលេខាធិការអង្គការ NATO ឆ្លង COVID-19
× លោក Javier Solana អតីតអគ្គលេខាធិការអង្គការសន្ធិសញ្ញាអាត្លង់ទិកខាងជើង (NATO) ត្រូវបានបញ្ជូនទៅមន្ទីរពេទ្យនៅអេស្ប៉ាញ បន្ទាប់ពីលទ្ធផលតេស្តបង្ហាញថា លោកឆ្លង COVID-19។ នេះបើតាមប្រភពដែលទីភ្នាក់ងារព័ត៌មានរ៉យទ័រ ទទួលបានកាលពីថ្ងៃទី១៣ ខែមីនា។
លោក Solana អាយុ៧៧ឆ្នាំ បានបំពេញតួនាទីជាអគ្គលេខាធិការ NATO ពីឆ្នាំ១៩៩៥ ដល់ឆ្នាំ១៩៩៩ និងជាអតីតតំណាងជាន់ខ្ពស់សហភាពអឺរ៉ុបសម្រាប់កិច្ចការបរទេសពីឆ្នាំ១៩៩៩ ដល់ឆ្នាំ២០០៩ ហើយក៏ជាអតីតរដ្ឋមន្ត្រីការបរទេសអេស្ប៉ាញ ក្រោមរដ្ឋបាលលោកនាយករដ្ឋមន្ត្រី Felipe Gonzalez ពីឆ្នាំ១៩៩២ ដល់ឆ្នាំ១៩៩៥ ផងដែរ។
លោក Solana ត្រូវបានរាយការណ៍ថា បានចូលរួមក្នុងព្រឹត្តិការណ៍ជាមួយរដ្ឋមន្ត្រីការបរទេសអេស្ប៉ាញបច្ចុប្បន្ន Arancha Gonzalez កាលពីថ្ងៃចន្ទកន្លងមក។ លោកត្រូវបានបញ្ជូនទៅមន្ទីរពេទ្យកាលពីថ្ងៃទី១១ ខែមីនា ប៉ុន្តែមិនមានលក្ខណៈធ្ងន់ធ្ងរនោះឡើយ។
បច្ចុប្បន្ន អេស្ប៉ាញ ស្ថិតនៅលំដាប់ទី៥ដែលមានករណីឆ្លង COVID-19 ច្រើនជាងគេបន្ទាប់ពីចិន អ៊ីតាលី អ៊ីរ៉ង់ និងកូរ៉េខាងត្បូង។ អេស្ប៉ាញមានអ្នកឆ្លងជិត៦៤០០នាក់ ក្នុងនោះស្លាប់១៩៦នាក់ និងសះស្បើយ៥១៧នាក់៕
© រក្សាសិទ្ធិដោយ thmeythmey.com