COVID-19៖ ធនាគារជាតិវៀតណាម ណែនាំគ្រឹះស្ថានហិរញ្ញវត្ថុទុកដាក់ប្រាក់ឲ្យត្រឹមត្រូវ មុនបញ្ចេញទៅទីផ្សារ

COVID-19

អន្តរជាតិ

COVID-19៖ ធនាគារជាតិវៀតណាម ណែនាំគ្រឹះស្ថានហិរញ្ញវត្ថុទុកដាក់ប្រាក់ឲ្យត្រឹមត្រូវ មុនបញ្ចេញទៅទីផ្សារ

16, Mar 2020 , 9:29 am

រូបភាព

ដោយ:

ធនាគារជាតិវៀតណាម បានចេញសេចក្តីថ្លែងការណ៍មួយឲ្យគ្រប់គ្រឹះស្ថានពាក់ព័ន្ធហិរញ្ញវត្ថុ ដែលមានចរាចរប្រាក់ឲ្យមានការពិនិត្យ និងទុកដាក់ប្រាក់ឲ្យបានត្រឹមត្រូវ និងអនាម័យបំផុត ដើម្បីធានា និងចៀសវាង ការប្រែក្លាយក្រដាសប្រាក់ជាកម្មវត្ថុនៃការចំលងវីរុស COVID-19។

តាមរយៈសេចក្តីថ្លែងការណ៍ផ្លូវការមួយ ធនាគារកណ្តាលវៀតណាម បានកំណត់ឲ្យគ្រឹះស្ថានហិរញ្ញវត្ថុតម្កល់ប្រាក់ដើម្បីធានាពីអនាម័យក្នុងរយៈពេលសមរម្យមួយ ស្របតាមបទដ្ឋានវេជ្ជសាស្ត្រ មុនពេលបញ្ចេញឲ្យមានចរាចរណ៍ក្នុងទីផ្សារវិញ។ នេះបើយោងតាមការចុះផ្សាយរបស់សារព័ត៌មានវៀតណាម Vietnam News នៅថ្ងៃ១៣ មីនា។

តាមប្រភព័ត៌មានដដែល គ្រឹះស្ថានហិរញ្ញវត្ថុ ក៏ត្រូវតម្រូវឲ្យបាញ់សម្លាប់មេរោគនៅតំបន់ដែលតម្កល់ប្រាក់ វេរប្រាក់ និង ATMs ផងដែរ។ ការលើកកម្ពស់ការបន្ថែមសេវាតាមប្រព័ន្ធអនឡាញឲ្យកាន់តែច្រើន ដើម្បីកាត់បន្ថយការជួបមុខគ្នាផ្ទាល់ ក៏ត្រូវបានដាក់ជាអនុសាសន៍ផងដែរ។

ជាមួយគ្នានេះ ធនាគារជាតិ ក៏បានណែនាំឲ្យគ្រឹះស្ថានទាំងនោះផ្តល់ម៉ាស់ ស្រោមដៃ និងសម្ភារៈពាក់ព័ន្ធវេជ្ជសាស្ត្រផ្សេងដល់បុគ្គលិកគ្រឹះស្ថានដែលជាក្រុមជួរមុខ និងមានប្រាស្រ័យទាក់ទងផ្ទាល់ផងដែរ៕