COVID-19
អន្តរជាតិ
ស្ថាបត្យករអ៊ីតាលីដ៏ល្បីល្បាញ លោក Gregotti ស្លាប់ក្នុងអាយុ៩២ឆ្នាំដោយសារ COVID-19
× លោក Vittorio Gregotti ដែលជាស្ថាបត្យករដ៏ល្បីល្បាញរបស់អ៊ីតាលី បានបាត់បង់ជីវិតនាថ្ងៃអាទិត្យ ទី១៥ ខែមីនា ក្នុងអាយុ៩២ឆ្នាំ ដោយសារ COVID-19។ នេះបើតាមការផ្សាយរបស់ទីភ្នាក់ងារព័ត៌មាន AGI និងសារព័ត៌មាន Corriere della Sera។
លោក Gregotti ដែលត្រូវបានចាត់ទុកជាបិតាស្ថាបត្យកម្មអន្តរជាតិនោះ មានជំងឺសួតប្រចាំកាយ ហើយត្រូវបានបញ្ជូនទៅមន្ទីរពេទ្យនៅក្រុង Milan ក្រោយតេស្តវិជ្ជមាន COVID-19 ហើយលោកស្រី Mariana Mazza ដែលជាភរិយា ក៏ត្រូវបានបញ្ជូនទៅកាន់ទីនោះផងដែរ។
កើតនៅខេត្ត Novara ខាងលិចក្រុង Milan លោក Gregotti បានបន្សល់នូវស្នាដៃដ៏ល្បីល្បាញនៅបណ្តាប្រទេសជាច្រើន ក្នុងនោះមានកីឡដ្ឋាន Barcelona Olympic Stadium នៅអេស្ប៉ាញ មជ្ឈមណ្ឌលវប្បធម៌ Belem Cutural Center នៅព័រទុយហ្គាល់ រោងល្ខោនអូប៉េរូ Arcimboldi Opera Theater នៅអ៊ីតាលី និងទីតាំងសាកលវិទ្យាល័យជាច្រើនទៀត។
បច្ចុប្បន្នអ៊ីតាលី មានអ្នកឆ្លងជាង២១០០០នាក់ ក្នុងនោះស្លាប់ជាង១៤០០នាក់ និងសះស្បើយជិត២០០០នាក់៕
© រក្សាសិទ្ធិដោយ thmeythmey.com