COVID-19
ជាតិ
អ្នកនាំពាក្យ៖ វិស័យសំណង់ មិនទាន់រងផលប៉ះពាល់ ដោយសារបញ្ហាវីរុស COVID-19 ឡើយ
×![]()
ភ្នំពេញ៖ វិស័យសំណង់នៅកម្ពុជា មិនទាន់រងផលប៉ះពាល់ ដោយសារបញ្ហាវីរុសកូរ៉ូណាប្រភេទថ្មី (COVID-19) ឡើយ។ លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានអះអាងបែបនេះ នៅក្នុងសន្និសីទកាសែត ស្តីពីវឌ្ឍនភាព និងទិសដៅការងាររបស់ក្រសួង នាព្រឹកថ្ងៃទី១៦ មីនា។
លោក សេង ឡូត បានបញ្ជាក់ថា វិស័យសំណង់កម្ពុជា គិតត្រឹមខែកុម្ភៈ ឆ្នាំ២០២០នេះ មានគម្រោងវិនិយោគ៥២៣គម្រោង កើនឡើងជាង១០០គម្រោង បើធៀបនឹងខែកុម្ភៈ ឆ្នាំ២០១៩ ដែលមានការវិនិយោគជាង៣០០គម្រោង។ បើតាមលោក សេង ឡូត ក្រុមហ៊ុនស្នើសុំវិនិយោគទាំងនេះ មកពី១៨ប្រទេស ដោយក្នុងនោះចិន ឈរលេខ១ ដែលតាមពីក្រោយដោយកូរ៉េ និងជប៉ុន។
តាមរយៈទិន្នន័យនេះ លោក សេង ឡូត បានអះអាងថា វិស័យសំណង់រក្សាស្ថិរភាពដដដែល ខណៈពិភពលោកកំពុងប្រឈមមុខ ដោយសារវីរុសCOVID-19។«គិតមកដល់ពេលនេះ វិស័យសំណង់មិនទាន់មានផលប៉ះពាល់ទេ…។ នេះជាការបញ្ជាក់របស់លោក សេង ឡូត។
គម្រោងដែលស្នើសុំវិនិយោគនេះ ភាគច្រើនគឺគម្រោងបុរី ដែលកំពុងដំណើរការគម្រោងសាងសង់ចំនួន៣២៧ ទីតាំង។ដោយឡែកបច្ចុប្បន្នអគារខ្ពស់ៗមានជាង១៨០០ទីតាំង និងអូតែលជិត១ពាន់ទីតាំង ។ នេះបើតាមអ្នកនាំពាក្យក្រសួងរៀបចំដែនដី ដែលស្នើឱ្យម្ចាស់គម្រោង និងក្រុមហ៊ុនសាងសង់ យកចិត្តទុកដាក់លើការសាងសង់ឱ្យស្របតាមស្ដង់ដារគុណភាព និងច្បាប់សំណង់ ។ ជាពិសេសធានាសុវត្ថិភាពដល់ប្រជាពលរដ្ឋដើម្បីបញ្ចៀសបញ្ហាបាក់រំលំអគារ។
លោក សេង ឡូត អះអាងថា ឆ្នាំ២០២០នេះ គឺជាឆ្នាំអនុវត្តច្បាប់ ដូច្នេះម្ចាស់គម្រោង និងក្រុមហ៊ុនសាងសង់ ត្រូវគោរពច្បាប់សាងសង់ឱ្យបានត្រឹមត្រូវ ដើម្បីបញ្ចៀសការខាតបង់នៅថ្ងៃអនាគត៕
Tag:
វិស័យសំណង់
COVID-19
© រក្សាសិទ្ធិដោយ thmeythmey.com
