ជាតិ
សង្គមជាតិ
ពេទ្យ អនុញ្ញាតឲ្យស្ត្រីបារាំង នៅមើលថែកូនអាយុ៤ខែ ដែលឆ្លងកូវីដ-១៩
× ស្ត្រីជនជាតិបារាំង ត្រូវបានអនុញ្ញាតឲ្យនៅក្នុងបន្ទប់ព្យាបាលជាមួយកូនអាយុ៤ខែ ដែលបានឆ្លងកូវីដ-១៩ ពីឪពុក។ នេះបើតាមលោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល ដែលប្រាប់សារព័ត៌មានថ្មីៗតាមទូរស័ព្ទ នៅព្រឹកថ្ងៃទី១៦ ខែមីនា ឆ្នាំ២០២០។
លោក លី សូវ៉ាន់ អះអាងថា ស្ត្រីជាម្តាយ ទទួលបានការណែនាំពិសេសពីក្រុមគ្រូពេទ្យ ពីរបៀបមើលថែកូន ដើម្បជៀសវាងការឆ្លងទៅគាត់។ លោក បន្តថា ការអនុញ្ញាតនេះ គឺធ្វើតាមការណែនាំរបស់អង្គការសុខភាពពិភពលោក។ លោក បន្ថែមថា មកដល់ពេលនេះ ទារកបារាំងនោះ មានសុខភាពធម្មតា ដោយមិនទាន់ចេញរោគសញ្ញាអ្វីឡើយ។
ឪពុករបស់ទារកនោះ ត្រូវបានក្រសួងសុខាភិបាល ធ្វើតេស្តរកឃើញវីរុសកូវីដ-១៩ និងបានផ្សព្វផ្សាយព័ត៌មាន នៅថ្ងៃទី១៥ ខែមីនា។ ក្រុមគ្រួសាររបស់គាត់ ត្រូវបានរាយការណ៍ថា រស់នៅក្នុងសង្កាត់ទួលទំពូង។ រហូតដល់ថ្ងៃទី១៥ ខែមីនា ក្រសួងសុខាភិបាល បានប្រកាសថា កូនតូចរបស់គាត់ បានឆ្លងកូវីដ-១៩ ពីគាត់។
បច្ចុប្បន្ន ឪពុក កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ចំណែកកូន ត្រូវបានបញ្ជូនទៅព្យាបាលនៅមន្ទីរពេទ្យជាតិកុមារ ដោយមានម្តាយនៅមើលថែ។ ស្ត្រីជាម្តាយ ក៏ឆ្លងកាត់ធ្វើតេស្តដែរ តែសំណាងល្អ លទ្ធលផលបង្ហាញថា គ្មានវីរុសកូវីដ-១៩ឡើយ។
គិតត្រឹមថ្ងៃទី១៦ ខែមីនា កម្ពុជា រកឃើញ១២ករណីហើយ នៃការឆ្លងកូវីដ-១៩ ដោយក្នុងនោះ រួមមាន បុរសចិនម្នាក់ បុរសខ្មែរ២នាក់ បុរសខ្មែរ-អ៊ិស្លាម២នាក់ ទារកបារាំងម្នាក់ បុរសបារាំងម្នាក់ បុរសអង់គ្លេសម្នាក់ ស្ត្រីអង់គ្លេស២នាក់ បុរសកាណាដាម្នាក់ និង បុរសប៊ែលហ្សិកម្នាក់។
ក្រសួងសុខាភិបាល ប្រកាសថា កំពុងស្រាវជ្រាវរកករណីឆ្លងវីរុសកូវីដ-១៩ នៅកម្ពុជាបន្តទៀត ៕
© រក្សាសិទ្ធិដោយ thmeythmey.com