COVID-19
អន្តរជាតិ
បារាំងប្រកាសបិទប្រទេស១៥ថ្ងៃ ខណៈអ្នកឆ្លងCOVID-19លើស៦ពាន់នាក់ ប្រធានាធិបតីបារាំង អេម៉ានុយអែល ម៉ាក្រុង (AFP)
×
ដោយ៖ គយ រតនបុរិន្ទ
ប្រធានាធិបតីបារាំង អេម៉ានុយអែល ម៉ាក្រុង បានប្រកាសចាត់វិធានការរឹតត្បិតការដើរហើររបស់ប្រជាជនខ្លួនរយៈពេល១៥ថ្ងៃ រាប់ចាប់ពីថ្ងៃអង្គារទី១៧ មីនា នេះតទៅ។ ទន្ទឹមនេះ ក្រសួងហិរញ្ញវត្ថុនឹងដាក់សំណើទៅរដ្ឋសភានាសប្តាហ៍ក្រោយ ដើម្បីសុំកញ្ចប់ថវិកា ៣០០ពាន់លានដុល្លារ ដើម្បីជួយវិស័យធុរកិច្ចតាមរយៈការផ្តល់ប្រាក់កម្ចី។
ក្នុងសុន្ទរកថាទៅកាន់ប្រជាជាតិតាមរយៈទូរទស្សន៍នៅថ្ងៃចន្ទ ទី១៦ មីនា ប្រធានាធិបតីបារាំងរូបនេះ បានស្នើរឲ្យប្រជាពលរដ្ឋសម្ងំនៅផ្ទះនិងចៀសវាងការចេញទៅដើរហើរនៅខាងក្រៅ ដរាបណាមានការចាំបាច់ក្នុងការទិញម្ហូបអាហារ ទៅធ្វើការ ឫស្វែងរកការថែទាំសុខាភិបាល។
ម្យ៉ាងវិញទៀត រដ្ឋមន្ត្រីក្រសួងមហាផ្ទៃបារាំង Christophe Castaner បានសម្រេចដាក់ពង្រាយមន្ត្រី១០ម៉ឺននាក់ ដើម្បីអនុវត្តវិធានការនេះ។ បើតាមការអះអាងរបស់លោក មនុស្សទាំងឡាយណាដែលធ្វើដំណើរ នឹងត្រូវបង្ហាញហេតុផលសមស្រប ខណៈបុគ្គលទាំងឡាយណាដែលមិនអនុវត្តតាមវិធានការខាងលើ និងត្រូវទទួលពិន័យ។
ទន្ទឹមនេះ ទាហានបារាំងក៏ត្រូវបានដាក់ពង្រាយដើម្បីដឹកជញ្ជូនអ្នកជំងឺ រីឯមន្ទីរពេទ្យយោធាក៏ត្រូវបានរៀបចំផងដែរនៅតំបន់ Alsace ភាគខាងកើតប្រទេស ដែលជាតំបន់រងគ្រោះពីជំងឺ COVID-19 ខ្លាំងជាងគេ។
ដោយឡែក រដ្ឋមន្ត្រីហិរញ្ញវត្ថុបារាំង Bruno Le Maire នឹងដាក់សំណើទៅរដ្ឋសភានៅសប្តាហ៍ក្រោយ ដើម្បីសុំកញ្ចប់ថវិកា ៣០០ពាន់លានដុល្លារ ដើម្បីជួយវិស័យធុរកិច្ចតាមរយៈការផ្តល់ប្រាក់កម្ចី។ ត្រង់ចំណុចនេះ លោកប្រធានាធិបតីបារាំងបានបន្ថែមទៀតថា៖«គ្មានក្រុមហ៊ុនបារាំង ទោះខ្នាតប៉ុណ្ណាក៏ដោយ នឹងមិនត្រូវទទួលហានិភ័យដួលរលំឡើយ»។
ក្នុងក្របខណ្ឌសហភាពអឺរ៉ុប ព្រំដែនខាងក្រៅរបស់សហភាពនឹងត្រូវបិទរយៈពេល៣០ថ្ងៃ នេះបើយោងតាមប្រសាសន៍ប្រធានាធិបតីបារាំង រីឯការធ្វើដំណើរក្នុងតំបន់ Schengen វិញនឹងត្រូវបានរឹតបន្តឹង។ ទន្ទឹមនេះ ការបោះឆ្នោតឃុំ-សង្កាត់ជុំទី២ និងកម្មវិធីកំណែទម្រង់ប្រាក់ចូលនិវត្តន៍ដ៏ចម្រូងចម្រាស់របស់រដ្ឋាភិបាលក៏ត្រូវបានផ្អាកផងដែរ។ រដ្ឋាភិបាលបារាំង នឹងរៀបចំក្រឹត្យដើម្បីប្រយុទ្ធប្រឆាំងនឹង COVID-19 ប្រសិនបើចាំបាច់។
សូមបញ្ជាក់ថា តុល្យការត្រឹមថ្ងៃចន្ទ ទី១៦ ខែមីនា ចំនួនអ្នកស្លាប់នៅបារាំងមានចំនួន ១៤៨ករណី ចំណែកការឆ្លងមានចំនួន ៦៦៣៣ ករណីហើយ ខណៈអ្នកសះស្បើយ ១២នាក់៕
Tag:
Emmanuel Macron
បារាំង
COVID-19
© រក្សាសិទ្ធិដោយ thmeythmey.com