COVID-19
អន្តរជាតិ
ឥណ្ឌា៖ សាសនិកហិណ្ឌូមួយក្រុមផឹកទឹកនោមគោ ព្រោះជឿថាអាចការពារ COVID-19 សាសនិកសាសនាហិណ្ឌូផឹកទឹកនោមគោ, រូបភាព៖ A, Qadri
× អ្នកគោរពសាសនាហិណ្ឌូមួយក្រុម នៅប្រទេសឥណ្ឌា បានផឹកទឹកនោមគោ ព្រោះជឿថាអាចការពារខ្លួន ជំងឺរលាកសួត ដែលបង្កដោយកូរ៉ូណាវីរុស(COVID-19)។ បន្ថែមពីលើនេះ អ្នកទាំងនោះ ជឿថាវាមានប្រសិទ្ធភាពខ្ពស់ប្រឆាំងគ្រប់ទម្រង់នៃបាក់តេរី (Bacteria)។
តាមរយៈខ្សែវីឌីអូមួយ ដែលបានចេញផ្សាយលើកាសែតហុងកុង South China Morning Post នៅថ្ងៃទី១៦ ខែមីនា អ្នកគោរពសាសនាហិណ្ឌូមួយក្រុម បានយកទឹកនោមគោមកផឹក ដើម្បីធ្វើជាថ្នាំសម្រាប់ការពារ COVID-19។
បើតាមការអះអាងរបស់អ្នកគោរពសាសនាហិណ្ឌូម្នាក់ កូរ៉ូណាវីរុស គឺជាបាក់តេរី ហើយទឹកនោមគោ គឺមានប្រសិទ្ធភាពណាស់ ក្នុងការសម្លាប់រាល់បាក់តេរីទាំងអស់ ដែលបង្កផលប៉ះពាល់ដល់មនុស្ស។ បន្ថែមពីលើនេះ អ្នកគោរពសាសនាហិណ្ឌូដដែល បានបន្តថា ការផឹកទឹកនោម នឹងការពារជំងឺឆ្លង និងលាងសម្អាតរាងកាយរបស់អ្នកផឹកទាំងអស់។ ក្រៅពីទឹកនោមគោ អ្នកគោរពសាសនាហិណ្ឌូមួយក្រុមនេះ មានទទួលPanchagavya ជាមុខម្ហូបសាសនា ដែលមានផ្សំពីទឹកនោមគោ ទឹកដោះគោ អាចម៍គោ ទឹកដោះគោខាប់ និងទឹកឃ្មុំ។
បន្ទាប់ពីផឹកទឹកនោមគោ និងបរិភោគម្ហូបសាសនារួច អ្នកគោរពសាសនាហិណ្ឌូមួយក្រុមនេះ បានយកទឹកនោមគោចាក់លើរូបគំនូរមួយផ្ទាំង ដែលតំណាងឲ្យកូរ៉ូណាវីរុស ដើម្បីសុំសេចក្តីសុខ និងការពារសាសនិកទាំងអស់ពី COVID-19។
យ៉ាងណាក៏ដោយ អង្គការសុខាភិបាលពិភពលោក (WHO) បានបញ្ជាក់ថា កូរ៉ូណាវីរុស គឺជាវីរុស ប៉ុន្តែមិនមែនជាបាក់តេរីឡើយ។ ម្យ៉ាងទៀត WHO បានបញ្ជាក់ថា គ្មានភស្តុតាងណាមួយ ដែលបញ្ជាក់ថា ទឹកនោមគោអាចសម្លាប់កូរ៉ូណាវីរុសបានឡើយ។
ដោយឡែក វិមាន Taj Mahal ដែលជាកន្លែងទេសចរណ៍ដ៏ល្បី រួមទាំងរូង ភ្នំEllora និង Ajanta ដែលជាទីកន្លែងសក្ការៈសាសនាក៏ដូចជា សារមន្ទីរ និងប្រាសាទនៅទូទាំងរដ្ឋ Maharashtra ក៏ត្រូវបានបិទផងដែរ។
ឥណ្ឌាសម្រេចបិទវិមាន Taj Mahal ដែលជាតំបន់ទេសចរណ៍ដ៏ល្បី រីឯតំបន់ហិរញ្ញវត្ថុនៅទីក្រុងម៉ុមបៃសម្រេចកាត់បន្ថយបុគ្គលិករបស់ខ្លួនពាក់កណ្តាលនៅក្នុងវិស័យណាដែលមិនចាំបាច់ ដើម្បីគ្រប់គ្រងការឆ្លង COVID-19។ ម៉ុមបៃដែលជាទីក្រុងដែលមានមនុស្សរស់នៅយ៉ាងច្រើនយ៉ាងកកកុញ មានប្រជាជនប្រមាន១៨លាននាក់ បានតម្រូវឲ្យអ្នកដែលធ្វើការនៅអាកាសយានដ្ឋាន និងមន្ទីរពេទ្យធ្វើការជ្រលក់ដៃក្នុងទឹកខ្មៅ ដើម្បីសម្គាល់ថាពួកគេត្រូវបានដាក់ឲ្យនៅដាច់ដោយឡែកនៅផ្ទះ។
សូមបញ្ជាក់ថា គិតត្រឹមល្ងាចថ្ងៃទី១៧ ខែមីនា ឥណ្ឌាមាន COVID-19 ចំនួន ១២៥ករណី អ្នកស្លាប់ចំនួន ៣ករណី និងអ្នកជាសះស្បើយចំនួន ១៣ករណី៕
© រក្សាសិទ្ធិដោយ thmeythmey.com