កីឡាជាតិ
ជាតិ
កីឡាជាតិលើកទី៣អាចនឹងផ្អាក ឬពន្យាពេលរៀបចំ បើ COVID-19 នៅតែបន្តរាលដាល
× ការប្រកួតកីឡាជាតិលើកទី៣ឆ្នាំនេះ អាចនឹងត្រូវផ្អាកឬពន្យាពេលរៀបចំ បើស្ថានភាពការរីករាលដាលនៃជំងឺរលាកផ្លូវដង្ហើមបង្កឡើងដោយមេរោគកូរ៉ូណាប្រភេទថ្មី COVID-19 មិនធូរស្បើយ។ គណៈកម្មាធិការជាតិអូឡាំពិកកម្ពុជានឹងជួបប្រជុំជាមួយក្រសួងអប់រំយុវជននិងកីឡាក្នុងពេលឆាប់ៗខាងមុខនេះ ដើម្បីពិភាក្សាពាក់ព័ន្ធបញ្ហានេះ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា ការប្រកួតកីឡាជាតិលើកទី៣ឆ្នាំនេះស្ថិតក្នុងភាពស្រពេចស្រពិលនៅឡើយពាក់ព័ន្ធនឹងដំណើរការរៀបចំ។ ការណ៍នេះ បន្ទាប់ពីកម្ពុជារកឃើញមានករណីឆ្លង COVID-19 ជាបន្តបន្ទាប់លើជនបរទេសនិងជនជាតិខ្មែរ។ បើតាមរដ្ឋលេខាធិការក្រសួងទេសចរណ៍រូបនេះ ការប្រកួតកីឡាជាតិលើកទី៣អាចនឹងត្រូវផ្អាក ឬពន្យាពេលរៀបចំ បើករណីឆ្លងនៅតែបន្តរីករាលដាល។
លោកបានបន្តថា គណៈកម្មាធិការជាតិអូឡាំពិកកម្ពុជានឹងជួបប្រជុំជាមួយក្រសួងអប់រំយុវជន និងកីឡា ដើម្បីពិភាក្សានិងសម្រេចថា តើការប្រកួតកីឡាជាតិលើកទី៣នឹងត្រូវរៀបចំតាមការគ្រោងទុក ឬត្រូវពន្យាពេលរៀបចំ ឬត្រូវផ្អាក។ បើតាមអគ្គលេខាធិការរូបនេះ ការសម្រេចយ៉ាងណានឹងដឹងក្នុងរយៈពេលឆាប់ៗមុខនេះ។
«យើងមិនទាន់ដឹងថាតើការប្រកួតកីឡាជាតិឆ្នាំនេះត្រូវផ្អាកឬត្រូវលើកពេលទៅរៀបចំនៅចុងឆ្នាំមិនទាន់ដឹងនោះទេ។ យើងកំពុងពិនិត្យមើលស្ថានភាព និងទិដ្ឋភាពជាក់ស្តែងសិន យើងនឹងជួបប្រជុំក្នុងពេលឆាប់ៗខាងមុខនេះ ដើម្បីពិភាក្សាពាក់ព័ន្ធបញ្ហានឹង»។ នេះជាការលើកឡើងរបស់លោក វ៉ាត់ ចំរើន ដែលអះអាងថា កាលបរិច្ឆេទនៃកិច្ចប្រជុំនេះមិនទាន់បានកំណត់នៅឡើយទេ។
តាមគម្រោងការប្រកួតកីឡាជាតិលើកទី៣គ្រោងរៀបចំចន្លោះពីថ្ងៃទី៥-១៦ ខែឧសភា ឆ្នាំ២០២០ ខាងមុខនេះ។ ការប្រកួតនេះជាផែនការយុទ្ធសាស្ត្រមួយរបស់កម្ពុជា ដើម្បីឈានទៅរៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ក្រសួងសុខាភិបាលនៅព្រឹកថ្ងៃទី១៧ ខែមីនា ឆ្នាំ២០២០ នេះ បានប្រកាសរកឃើញអ្នកឆ្លងមេរោគ COVID-19 ចំនួន១២ករណីបន្ថែមទៀត ដែលធ្វើឲ្យចំនួនអ្នកឆ្លងកើនឡើងដល់២៤ករណី។ បើតាមសេចក្តីប្រកាសព័ត៌មានរបស់ក្រសួងសុខាភិបាល ករណីថ្មីទាំង១២ រកឃើញកើតលើបុរសខ្មែរ-អ៊ិស្លាម១១ករណី ដែលទើបត្រឡប់មកពីចូលរួមកម្មវិធីសាសនានៅប្រទេសម៉ាឡេស៊ី និងខ្មែរ១ករណី ដែលទើបមកពីប្រទេសថៃ។
ចំណែក១២ករណីផ្សេងទៀត គឺករណីទី១ជាជនជាតិចិននៅខេត្តព្រះសីហនុ ករណីទី២ ជាជនជាតិខ្មែរនៅសៀមរាប។ ៣ករណីជាជនជាតិអង់គ្លេសនៅនាវា Viking Cruise ដែលសំចតនៅខេត្តកំពង់ចាម។ ករណីទី៦ជាជនជាតិកាណាដា។ ករណីទី៧ ជាជនជាតិបែលហ្ស៊ិក។ ករណីទី៨ជាជនជាតិបារាំង។ ករណីទី៩ ជាទារកអាយុ៤ខែ និងជាកូនជនជាតិបារាំង(ករណីទី៨)។ បុរសខ្មែរពីបារាំង ជាករណីទី១០ និង២ករណីទៀតជាជនជាតិខ្មែរអ៊ិស្លាមនៅខេត្តព្រះវិហារ៕
Tag:
កីឡាជាតិលើកទី៣
COVID-19
វ៉ាត់ ចំរើន
© រក្សាសិទ្ធិដោយ thmeythmey.com