FIFA នឹងប្រើឥទ្ធិពលបាល់ទាត់ដើម្បីបញ្ជ្រាបការយល់ដឹងពី COVID-19

COVID-19

កីឡាអន្តរជាតិ

អន្តរជាតិ

FIFA នឹងប្រើឥទ្ធិពលបាល់ទាត់ដើម្បីបញ្ជ្រាបការយល់ដឹងពី COVID-19

17, Mar 2020 , 10:59 pm

រូបភាព

ដោយ: ទេព ពិទូរ្យ

ទេព ពិទូរ្យ កីឡាអន្តរជាតិ អន្តរជាតិ ()

លោក Gianni Infantino ប្រធានសហព័ន្ធបាល់ទាត់អន្តរជាតិ (FIFA) នៅថ្ងៃទី១៦ ខែមីនា បានទទូចឲ្យអាជ្ញាធរប្រើប្រាស់ «អំណាចនៃបាល់ទាត់» ដើម្បីបញ្ចេញសារសំខាន់ៗទៅកាន់ពលរដ្ឋក្នុងការប្រយុទ្ធប្រឆាំងនឹង COVID-19។ ការលើកឡើងរបស់ Infantino គឺស្របតាមគំនិតផ្តួចផ្តើមរបស់អង្គការសុខភាពពិភពលោក (WHO)។

«ខ្ញុំសូមណែនាំឲ្យអ្នកប្រើកម្រិតថាមពលបាល់ទាត់ដើម្បីបញ្ជូន និងផ្សព្វផ្សាយសារសំខាន់ៗទាំងនេះទៅកាន់ប្រជាពលរដ្ឋ។ លោក Infantino បានសរសេរនៅក្នុងលិខិតចំហមួយដែលត្រូវបានទីភ្នាក់ងារព័ត៌មាន AFP ស្រង់យកទៅផ្សាយបន្ត។

ប្រធាន FIFA រូបនេះបន្តថា៖ «អ្វីដែលសំខាន់បំផុតនោះគឺអាជ្ញាធរបាល់ទាត់ត្រូវតែចាត់វិធានការចាំបាច់ទាំងអស់ដើម្បីការពារការរីករាលដាលនៃមេរោគនេះដល់សហគមន៍បាល់ទាត់ទូទៅ។ ក្នុងភាពជាដៃគូជាមួយអង្គការសុខភាពពិភពលោក យើងកំពុងចាប់ផ្តើមគំនិតផ្តួចផ្តើមកសាងការយល់ដឹងដែលត្រូវបានធ្វើឡើងដើម្បីផ្តល់អនុសាសន៍ច្បាស់លាស់ និងជាជំហានៗដើម្បីដោះស្រាយការរីករាលដាលនៃ COVID-19»។

លោក Infantino បានពន្យល់អំពីសារសំខាន់នៃឥទ្ធិពលកីឡាបាល់ទាត់ដែលអាចដើរតួនាទីចម្បងក្នុងការជួយសង្គមឲ្យយល់ដឹងពីការការពារ ក៏ដូចជាផ្សព្វផ្សាយជំងឺឆ្លងដ៏កាចសាហាវនេះ។ ប្រមុខ FIFA សញ្ជាតិស្វ៊ីស រូបនេះ ចង់ឲ្យមានកីឡាមួយចំនួន ជាពិសេសបាល់ទាត់អាចមានសកម្មភាពប្រកួតខ្លះ ដើម្បីឆ្លៀងផ្សព្វផ្សាយសារណែនាំសំខាន់ៗទៅកាន់ពិភពលោក ដោយដាក់ការជឿជាក់ថាភាពប្រក្រតីនឹងឆាប់ត្រឡប់មកដូចដើមវិញ។

មកទល់ថ្ងៃទី១៧ ខែមីនានេះ COVID-19 បានសម្លាប់មនុស្សជាង ៧០០០នាក់ និងឆ្លងជាង ១៨០០០០នាក់ នៅទូទាំងពិភពលោកចាប់តាំងពីរកឃើញដំបូងនៅក្រុងវូហាន ប្រទេសចិនកាលពីចុងខែធ្នូ។

ដោយឡែក សហព័ន្ធកីឡាបាល់ទាត់អឺរ៉ុន (UEFA) នឹងបើកកិច្ចប្រជុំមួយនៅថ្ងៃអង្គារទី១៧ មីនានេះ ដើម្បីសម្រេចថាត្រូវពន្យារពេល ឬបន្តការប្រកួត Euro ឆ្នាំ ២០២០ ដែលគ្រោងធ្វើឡើងនៅថ្ងៃទី១២ មិថុនា ដល់ថ្ងៃទី១២ ខែកក្កដាខាងមុខ៕