ជាតិ
ក្រសួងធនធានទឹក ឲ្យពលរដ្ឋបង្កើនការប្រយ័ត្នចំពោះការកើនឡើងកម្តៅ និងបាតុភូតផ្គរ រន្ទះ និងខ្យល់កន្ត្រាក់
×![]()
ដោយ៖ ស៊ែម ម៉ូនីតា
ក្រសួងធនធានទឹក និងឧតុនិយម បានស្នើឲ្យប្រជាពលរដ្ឋថែរក្សាសុខភាព ចំពោះការកើនឡើងកម្តៅ និងបង្កើនការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ ជាពិសេស បណ្តាខេត្តនៅភាគពាយ័ព្យ ចាប់ពីថ្ងៃទី ១៨-២១ ខែមីនា។ ការអំពាវនាវនេះ ធ្វើឡើងក្នុងសេចក្តីជូនស្តីពីស្ថានភាពអាកាសធាតុ ដែលចេញផ្សាយនៅថ្ងៃទៅ១៧ មីនានេះ។ 
ក្នុងសេចក្តីជូនដំណឹងដដែល ក្រសួងធនធានទឹក បានបញ្ជាក់ថា ថ្ងៃទី១៧ ដល់ថ្ងៃទី២៣ មីនា ធាតុអាកាស នឹងបន្តក្តៅនៅពេលថ្ងៃ ដោយសារតែកម្រិតសម្ពាធទាបនៅលើផ្ទៃដី និងសម្ពាធខ្ពស់នៅរយៈកម្ពស់គ្របដណ្តប់លើកម្ពុជា។ តាមក្រសួងធនធានទឹក ស្ថានភាពនេះ ធ្វើឲ្យបណ្តាខេត្តនៅតំបន់វាលទំនាបកណ្តាល មានសីតុណ្ហភាពអប្បបរមា ពី២៦-២៨ អង្សា និងសីតុណ្ហភាពអតិបរមា ពី៣៧-៣៩ អង្សា ហើយអាចមានភ្លៀងធ្លាក់ខ្សោយនៅផ្នែកខ្លះ។ ដោយឡែកនៅថ្ងៃទី១៨ -២១ មីនា ផ្នែកមួយចំនួននៃខេត្តឧត្តរមានជ័យ បន្ទាយមានជ័យ សៀមរាប ប៉ៃលិន បាត់ដំបង និងខេត្តព្រះវិហា នឹងអាចមានភ្លៀងនៅក្នុងកម្រិតពីតិច ទៅមធ្យម ជាមួយនឹងផ្គរ រន្ទះ និងខ្យល់កន្ត្រាក់។
រីឯបណ្តាខេត្តនៅតំបន់ខ្ពង់រាបភាគឦសាន នឹងមានសីតុណ្ហភាពអប្បបរមា មានពី ២៦-២៨ អង្សា និងសីតុណ្ហភាពអតិបរមា មានពី ៣៥-៣៧ អង្សា។ ក្រសួងធនធានទឹកបញ្ជាក់ដូច្នេះ រួមបន្តឲ្យដឹងថា បណ្តាខេត្តមាត់សមុទ្រ នឹងសីតុណ្ហភាពអប្បបរមា មានពី ២៦-២៨ អង្សា និងសីតុណ្ហភាពអតិបរមា មានពី ៣៥-៣៧ អង្សា។
ក្រសួងធនធានទឹក បានអំពាវនាវឲ្យប្រជាពលរដ្ឋ ថែរក្សាសុខភាព ចំពោះការកើនឡើងកម្តៅ និងបង្កើនការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ ជាពិសេសបណ្តាខេត្តនៅភាគពាយ័ព្យ ចាប់ពីថ្ងៃទី ១៨-២១ ខែមីនា៕
Tag:
ក្តៅ
រន្ទះ
ខ្យល់កន្ត្រាក់
អាកាសធាតុ
© រក្សាសិទ្ធិដោយ thmeythmey.com
