COVID-19
កីឡាអន្តរជាតិ
អន្តរជាតិ
Matuidi ជាកីឡារទីពីររបស់ Juventus ដែលឆ្លង COVID-19
× ក្លិប Juventus បានបញ្ជាក់ថា ខ្សែបម្រើ Blaise Matuidi បានធ្វើតេស្តចេញលទ្ធផលវិជ្ជមាន COVID-19។ សមាជិកក្រុមជម្រើសជាតិបារាំងរូបនេះ ជាកីឡាករទីពីររបស់ក្រុមសេះបង្កង់ដែលឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មីនេះ។
បន្ទាប់ពីខ្សែការពារ Daniele Rugani ខ្សែបម្រើ Matuidi ត្រូវបានបញ្ជាក់ថាជាករណីទីពីររបស់ Juventus។ ដូច Rugani ដែរ Matuidi ត្រូវបានធ្វើតេស្តរកឃើញ COVID-19 បើទោះជារូបគេមិនមានរោគសញ្ញាអ្វីគួរកត់សំគាល់ក៏ដោយ។
ខ្សែបម្រើសញ្ជាតិបារាំង វ័យ៣២ឆ្នាំរូបនេះ កំពុងដាក់ឲ្យនៅដាច់ដោយឡែកនិងទទួលការត្រួតពិនិត្យសុខភាពជាប្រចាំ។ ដោយសារមានសមាជិកក្រុមដល់ទៅពីររូបឆ្លងជំងឺនេះ ក្រុមសេះបង្កង់នៃលីគបាល់ទាត់កំពូលអ៊ីតាលីកំពុងបារម្ភថា អាចនឹងមានកីឡាករខ្លួនផ្សេងទៀតឆ្លងផងដែរ។
«Blaise Matuidi បានឆ្លងកាត់ការធ្វើតេស្តវេជ្ជសាស្ត្រដែលបង្ហាញថា វិជ្ជមាននៃជំងឺ COVID-19។ ក្លិប Juventus ប្រកាសដូច្នេះលើវេបសាយផ្ទាល់របស់ខ្លួន។ ម្ចាស់ការពារជើងឯ Serie A បន្ថែមថា Matuidi បានយល់ព្រមដាក់ខ្លួនឯងឲ្យនៅដាច់ដោយឡែកនៅផ្ទះរបស់គេតាំងពីថ្ងៃទី១១ ខែមីនាម្លេះ។
ដោយសារការរាលដាលនៃ COVID-19 បានធ្វើឲ្យលីគកីឡាបាល់ទាត់ធំៗនៅអឺរ៉ុបត្រូវផ្អាករហូតដល់ខែមេសា ប៉ុន្តែប្រធានសហព័ន្ធកីឡាបាល់ទាត់អ៊ីតាលី (FIGC) លោក Gabriele Gravina លើកឡើងថាអ៊ីតាលីមិនទាន់ប្រាកដពីការវិលត្រឡប់ចូលធ្វើការប្រកួតនៅខែក្រោយ ឬយ៉ាងណានោះទេ។
ដោយឡែកពានរង្វាន់ Euro ឆ្នាំ ២០២០ ក៏ត្រូវពន្យារពេលការប្រកួតរហូតដល់ខែមិថុនា ឆ្នាំ ២០២១ ដោយស្របតាមការសម្រេចរបស់ UEFA។
គិតត្រឹមថ្ងៃទី១៨ ខែមីនានេះ COVID-19 បានសម្លាប់មនុស្សជិត៨ពាន់នាក់ ឆ្លងជិត២សែននាក់ និងសះស្បើយ៨១២៧១នាក់ នៅទូទាំងពិភពលោក។ ក្រៅពីចិនដែលជាចំនុចផ្តើមនៃមេរោគនេះ អ៊ីតាលីមានឆ្លងច្រើនជាងគេ និងលើសគេសម្រាប់ប្រទេសនៅអឺរ៉ុប៕
Tag:
COVID-19
Blaise Matuidi
Juventus
© រក្សាសិទ្ធិដោយ thmeythmey.com