លោកស៊ី ជិងភីង៖ ចិន នឹងជួយអេស្ប៉ាញប្រយុទ្ធប្រឆាំង COVID-19

COVID-19

អន្តរជាតិ

លោកស៊ី ជិងភីង៖ ចិន នឹងជួយអេស្ប៉ាញប្រយុទ្ធប្រឆាំង COVID-19

18, Mar 2020 , 7:19 pm

រូបភាព

ប្រធានាធិបតីចិន ស៊ី ជិនភីង (ខាងឆ្វេង) បានជួបជាមួយនាយករដ្ឋមន្រ្តីអេស្ប៉ាញPedro Sanchez នាទីក្រុងម៉ាឌ្រីដ ក្នុងឆ្នាំ២០១៨។ រូបភាព៖ Xinhua

ដោយ: ធៀន ភារិន្ទ

ប្រធានាធិបតីចិន ស៊ី ជិនភីង នាថ្ងៃទី១៨ ខែមីនា បានប្រាប់នាយករដ្ឋមន្ត្រីអេស្ប៉ាញថា ចិន នឹងជួយប្រទេសអឺរ៉ុបមួយនេះតាមលទ្ធភាព និងគាំទ្រអេស្ប៉ាញយ៉ាងពេញទំហឹងក្នុងការប្រយុទ្ធប្រឆាំងជំងឺរលាកសួត ដែលបង្កដោយកូរ៉ូណាវីរុស (COVID-19)។

ក្នុងកិច្ចសន្ទនាតាមរយៈទូរសព្ទជាមួយនាយករដ្ឋមន្ត្រីអេស្ប៉ាញលោក Pedro Sanchez លោកស៊ី ជិនភីង ប្រធានាធិបតីចិន ក្នុងនាទីដំបូង បានសម្តែងក្តីអាណិតអាសូរចំពោះប្រជាជនអេស្ប៉ាញទាំងអស់ដែលរងគ្រោះដោយសារ COVID-19 ក្នុងនាមតំណាងឲ្យចិន និងប្រជាជនទាំងមូល។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ។

ពាក់ព័ន្ធទៅនឹងបញ្ហានេះ លោកស៊ី បានលើកឡើងថា ចិន គាំទ្រអេស្ប៉ាញយ៉ាងពេញទំហឹង ចំពោះចំណាត់ការកន្លងមក ដែលខិតខំប្រឹងប្រែងទប់ស្កាត់ និងបង្ការ COVID-19 នៅក្នុងប្រទេស។ បើតាមលោកស៊ី រដ្ឋាភិបាលទីក្រុងប៉េកាំង បានត្រៀមខ្លួនរួចរាល់ហើយ ក្នុងការផ្តល់ជំនួយដល់អេស្ប៉ាញតាមតម្រូវការ និងចែករំលែកបទពិសោធក្នុងការទប់ស្កាត់ COVID-19។

«ក្រោយភ្លៀង មេឃនឹងស្រឡះ»។ ប្រធានាធិបតីចិនបាននិយាយបែបនេះ ប្រាប់នាយករដ្ឋមន្ត្រីអេស្ប៉ាញ។ ក្នុងន័យនេះ ប្រមុខរដ្ឋចិន ចង់សំដៅថា បន្ទាប់ពីCOVID-19បញ្ជាប់ ទំនាក់ទំនងចិន និងអេស្ប៉ាញ នឹងកាន់តែរឹងមាំថែមទៀត។ ការណ៍នេះ កើតចេញពីកិច្ចសហប្រតិបត្តិការរវាងចិន និងអេស្ប៉ាញ ដែលរួមគ្នាប្រយុទ្ធប្រឆាំង COVID-19។

ជាការឆ្លើយតបទៅនឹងប្រធានាធិបតីចិន លោក Sanchez បាននិយាយថា រដ្ឋាភិបាលទីក្រុងម៉ាឌ្រីដ នឹងការពារប្រជាជនចិន ដែលរស់នៅអេស្ប៉ាញឲ្យអស់ពីលទ្ធភាព ពីCOVID-19។ ជាពិសេសលោកនាយករដ្ឋមន្ត្រី ក៏ជឿដែរថា ទំនាក់ទំនងរវាងចិន និងអេស្ប៉ាញ នឹងកាន់តែរឹងមាំថែមទៀត បន្ទាប់ពីកិច្ចការប្រយុទ្ធប្រឆាំងជំងឺឆ្លងមួយនេះ។

កាលពីថ្ងៃ១៧ ខែមីនា មូលនិធិJack Ma និង Alibaba បានបរិច្ចាគម៉ាស់ចំនួន ៥០ម៉ឺនសន្លឹកទៅក្រសួងសុខាភិបាលអេស្ប៉ាញ។ បន្ថែមពីលើនេះ សមាគមន៍ចិន Zaragoza នៅអេស្ប៉ាញ ក៏បានបរិច្ចាគម៉ាស់ចំនួន ១៥១២៣សន្លឹក ស្រោមដៃជាង ៥ពាន់គូ ទឹកអាគុល ១២៥៤ដប និងទឹកលាងដៃទៅឲ្យអាជ្ញាធរអេស្ប៉ាញថ្នាក់តំបន់ដែរ។

សូមបញ្ជាក់ថា អេស្ប៉ាញ ក៏ជាប្រទេសមួយនៅក្នុងតំបន់អឺរ៉ុប រងគ្រោះដោយសារ COVID-19ដែរ។ គិតត្រឹមព្រឹកថ្ងៃទី១៨ ខែមីនា អេស្ប៉ាញមានCOVID-19 លើសពី ១ម៉ឺនករណី អ្នកស្លាប់ ៥៣៣ករណី និងអ្នកជាសះស្បើយ ១០២៨ករណី៕