COVID-19
អន្តរជាតិ
ចិន ប្រកាសថា ថ្នាំប្រភេទ Avigan មានប្រសិទ្ធភាពព្យាបាល COVID-19 ថ្នាំ Avigan (Favipiravir) (NHK)
× អ្នកស្រាវជ្រាវរបស់រដ្ឋាភិបាលចិន បានប្រកាសថា ពួកគេបានរកឃើញប្រសិទ្ធភាពនៃថ្នាំ Avigan (Favipiravir) លើអ្នកជំងឺដែលមានផ្ទុកជំងឺ COVID-19 ។ ថ្នាំមួយនេះគឺជាផលិតផលរបស់ប្រទេសជប៉ុនផលិតឡើងក្នុងការប្រយុទ្ធប្រឆាំងជំងឺផ្តាសាយធំ (Flu) ។ នេះបើតាមការលើកឡើងរបស់ទូរទស្សន៍ជប៉ុន NHK ចុះផ្សាយកាលពីថ្ងៃទី១៨ ខែមីនានេះ។
លោកវេជ្ជបណ្ឌិត Zhang Xinmin ដែលជាអ្នកគ្រប់គ្រងមួយរូបនៅឯវិទ្យាស្ថានជាតិសម្រាប់ការអភិវឌ្ឍជីវបច្ចេកវិទ្យា បានលើកឡើងអំពីឈ្មោះថ្នាំមួយនេះនៅក្នុងពិធីសន្និសីទព័ត៌មានមួយនៅឯទីក្រុងប៉េកាំងកាលពីថ្ងៃអង្គារ ១៧ ខែមីនាកន្លងទៅ។
តាមប្រភពព័ត៌មានជប៉ុនដដែល លោកវេជ្ជបណ្ឌិតចិនរូបនេះ បានអះអាងថា ថ្នាំមួយប្រភេទនេះ ត្រូវបានរកឃើញថាមានប្រសិទ្ធភាពលើការសាកល្បងព្យាបាលនៅឯវិទ្យាស្ថានវេជ្ជសាស្ត្រចំនួនពីរកន្លែងនៅក្នុងប្រទេសចិន។ ទន្ទឹមនេះ លោក Zhang Xinmin ក៏បានបញ្ជាក់ផងដែរថា ថ្នាំមួយនេះមានប្រសិទ្ធភាពទៅលើជំងឺស្រដៀងគ្នាទៅនឹងជំងឺ COVID-19 ក្នុងនោះមានដូចជាជំងឺរលាកសួត។
ការព្យាបាលនេះត្រូវបានគេធ្វើឡើងនៅក្នុងទីក្រុងវូហាន ដែលមានអ្នកជំងឺ ២៤០នាក់ និងទីក្រុងហ្សេនជេនដែលមានអ្នកជំងឺ៨០នាក់។ នៅឯទីក្រុងហ្សេនជេនវិញ អ្នកជំងឺដែលទទួលបានថ្នាំ Avigan (Favipiravir) នេះ បានបង្ហាញលទ្ធផលវត្តមាននៃវីរុសពីវិជ្ជមានមកអវិជ្ជមានវិញ ត្រឹមតែរយៈពេលប្រមាណ៤ថ្ងៃប៉ុណ្ណោះ បើប្រៀបធៀបទៅនឹង១១ថ្ងៃចំពោះអ្នកដែលមិនបានប្រើប្រាស់ថ្នាំ។ តាមការពិនិត្យដោយប្រព័ន្ធកាំរស្មី X-Ray អ្នកជំងឺប្រមាណជា៩១ភាគរយបានទទួលភាពសះស្បើយទៅលើសួតរបស់ពួកគេក្រោយពីពេលប្រើប្រាស់ថ្នាំ។
តាមទូរទស្សន៍ NHK លោកវេជ្ជបណ្ឌិត Zhang បានបន្តទៀតថា ថ្នាំព្យាបាលនេះពិតជាមានសុវត្ថិភាព និងមិនបង្កឲ្យមានផលប៉ះពាល់ផ្សេងៗធំដុំនោះទេ ហើយវាត្រូវបានគេណែនាំឲ្យប្រើប្រាស់ជាផ្លូវការក្នុងការប្រយុទ្ធប្រឆាំងជាមួយនឹងវីរុសនេះ។ ប្រទេសចិនបានសុំសិទ្ធប្រើប្រាស់ថ្នាំមួយនេះពីប្រទេសជប៉ុន នឹងត្រូវបានទទួលការយល់ព្រមពីរដ្ឋាភិបាលក្នុងការចាប់ផ្តើមការផលិតខ្នាតធំ។
សូមបញ្ជាក់ថា គិមត្រឹមថ្ងៃពុធ ទី១៨ ខែមីនា អ្នកឆ្លងសរុបនៅទូទាំងពិភពលោក មានចំនួនជិត២០ម៉ឺនករណី ខណៈស្លាប់ជិត៨ពាន់នាក់ ហើយជាសះស្បើយមានជាង៨ម៉ឺននាក់។ តួយ៉ាង ប្រទេសចិន បានរកឃើញអ្នកជំងឺ COVID-19 ជាង៨ម៉ឺនករណី ខណៈអ្នកស្លាប់មាន៣២២៦នាក់ ហើយជាសះស្បើយ ៦៨៨៦៨នាក់។ បន្ទាប់ពីចិន អ៊ីតាលី បានរកឃើញជាង ៣ម៉ឺនករណី ខណៈអ្នកស្លាប់មានជាង២៥០០ករណី ហើយជាសះស្បើយជិត៣ពាន់នាក់៕
© រក្សាសិទ្ធិដោយ thmeythmey.com