COVID-19
អន្តរជាតិ
COVID-19៖ ចិនលែងមានករណីឆ្លងថ្មីក្នុងស្រុក តែករណីឆ្លងពីបរទេសបន្តកើនឡើង
រូបភាព Xinhua
×![]()
ដោយ: តន ចាន់រិទ្ធារ៉ា
នៅថ្ងៃទី១៨ ខែមីនា ចិនដីគោកមានករណីឆ្លងថ្មីជំងឺផ្លូវដង្ហើមបង្កដោយកូរ៉ូណាវីរុស (COVID-19) ឡើយ។ នេះជាលើកដំបូងសម្រាប់ចិនគិតតាំងពីការចាប់ផ្ដើមកត់ត្រាករណីឆ្លងប្រចាំថ្ងៃក្នុងខែមករាមក ដែលនេះក៏បង្ហាញពីប្រសិទ្ធភាពនៃវិធានការកន្លងមករបស់រដ្ឋាភិបាលចិនផងដែរ។ ប៉ុន្តែករណីឆ្លងវីរុសពីប្រទេសផ្សេងចូលទឹកដីចិន បានបន្តកើនឡើងគួរឲ្យបារម្ភ បើទោះបីជាមានវិធានការរឹតបន្តឹងលើអ្នកដំណើរទាំងអស់ក្ដី។ 
គណៈកម្មការសុខាភិបាលចិន នៅថ្ងៃទី១៩ ខែមីនា បានរាយករណ៍ការឆ្លង COVID-19 ចំនួន៣៤ករណី ដែលសុទ្ធសឹងករណីឆ្លងនាំចូលពីបរទេសទាំងអស់។ នេះជាការកើនឡើងករណីឆ្លងប្រចាំថ្ងៃដ៏ខ្ពស់ចិន ខណៈមកទល់ពេលនេះ ករណីនាំចូលវីរុសនេះនៅចិនមានចំនួន១៨៩នាក់។ ជារឿងគួរឲ្យត្រេកអរ មិនមានឡើយករណីឆ្លងក្នុងស្រុកនៅថ្ងៃទី១៨ ខែមីនា សូម្បីតែនៅទីក្រុងវូហាន ឬខេត្តហ៊ូប៉ីទាំងមូលក៏ដោយ។
បើតាមទីភ្នាក់ងារព័ត៌មានរដ្ឋចិន Xinhua តួលេខអ្នកឆ្លង COVID-19 នៅទីក្រុងវូហានមានចំនួន៥០០០៥នាក់ និងនៅខេត្តហ៊ូប៉ីមានចំនួនសរុប៦៧៨០០នាក់ដដែល។ នេះជាជំហានវិជ្ជមានមួយក្នុងយុទ្ធនាការប្រយុទ្ធប្រឆាំងវីរុសប្រភេទថ្មីរបស់ចិន ហើយវាក៏ស្ដែងពីលទ្ធផលនៃចំណាត់ការមិនធ្លាប់របស់ចិនដើម្បីទប់ស្កាត់ការរាលដាលវីរុសនេះផងដែរ។
នៅថ្ងៃទី១៨ ខែមីនាដដែល ទោះគ្មានករណីឆ្លងថ្មី តែករណីស្លាប់ដោយសារ COVID-19 មានចំនួន៨នាក់ដែលកើតនៅខេត្តហ៊ូប៉ីទាំងអស់ ដែលនាំឲ្យតួលេខអ្នកស្លាប់សរុបនៅចិនដីគោកមានចំនួន៣២៤៥នាក់។ ចាប់តាំងពីការផ្ទុះឡើងក្នុងខែធ្នូ ឆ្នាំ២០១៩ មក ជំងឺ COVID-19 បានកើតលើមនុស្សជិត៨១០០០នាក់ ហើយមកទល់ពេលនេះមានតែចំនួន៧២៦៣នាក់ទៀតប៉ុណ្ណោះ ដែលបន្តសម្រាកព្យាបាលក្នុងមន្ទីរពេទ្យ។
យ៉ាងណាមិញ បញ្ហាប្រឈមដែលលេចឡើងសម្រាប់ចិនពេលនេះ គឺការកើនឡើងករណីឆ្លងនាំចូលពីប្រទេសដែលកំពុងផ្ទុះ COVID-19 ធ្ងន់ធ្ងរដូចជាអ៊ីតាលី និងអ៊ីរ៉ង់ជាដើម។ ដើម្បីទប់ស្កាត់ការរាលដាល ទីក្រុងចិនធំៗរាប់ទាំងរដ្ឋធានីប៉េកាំងផង បានតម្រូវឲ្យអ្នកដំណើរទាំងអស់នៅដាច់ដោយឡែក១៤ថ្ងៃ ដោយចេញថ្លៃចំណាយខ្លួនឯងទៀតផង៕
Tag:
ចិន
COVID-19
© រក្សាសិទ្ធិដោយ thmeythmey.com
